Dështimi i financave. 100 mln të ardhura më pak në buxhetin e 2018-s

472
Sigal

Dështim i plotë i financave për 2018-n. Në buxhetin e 2018-s u derdhën 100 milionë euro më pak, sipas të dhënave zyrtare të Ministrisë së Financave. Ky dështim i të ardhura në buxhetin e Shtetit ishte i pritshëm, qeveria 2 herë e rishikoi buxhetin e shtetit, për shkak të mosrealizimit të të ardhurave. Më pak të ardhura nga planifikimi u realizuan në dogana, në vjeljen e tatimeve. Qeveria, për të zvogëluar pasojat katastrofike, u mundua që të pakësojë edhe shpenzimet. Ndoshta kjo është një nga arsyet, pse qeveria anuloi edhe koncesionin e rrugës Kashar – Thumanë, për mungesë fondesh. Të dhënat zyrtare nga Ministria e Financave tregojnë se të ardhurat totale në arkën e shtetit për gjithë vitin 2018 rezultuan 449.3 miliardë lekë nga 461.8 miliardë që ishin parashikuar në aktin normativ të qeverisë. Sipas statistikave të detajuara, gjysma e mosrealizimeve ishte nga të ardhurat jotatimore dhe ndihmat, ndërsa gjysma tjetër ka ardhur si pasojë e ecurisë së dobët në mbledhjen e akcizave dhe tatimit mbi vlerën e shtuar. Të dy këto taksa qenë 7.4 miliardë lekë ose rreth 60 milionë euro më pak se plani vjetor të ndikuara kryesisht nga rënia e euros ndaj lekut, por edhe ulja e papritur në zhdoganimin e cigareve. Në krahun tjetër të buxhetit, atë të shpenzimeve, mosrealizimet kanë qenë edhe më të mëdha se sa tek të ardhurat. Sipas të dhënave nga financat, shpenzimet faktike të buxhetit ishin gati 147 milionë euro më të ulëta se plani. Për shkak se mosrealizimi i shpenzimeve ka qenë më i madh se sa ai i të ardhurave, qeveria ka marrë më pak borxh nga kufiri i caktuar me ligj. Deficiti buxhetor për vitin e kaluar rezultoi 47 milionë euro më pak se plani, duke sinjalizuar se borxhi publik në raport me prodhimin kombëtar është ulur edhe më shumë nga sa pritej. Por sipas tabelave të financave e gjithë rënia e deficitit ka ardhur në kurriz të investimeve publike, të cilat vitin e kaluar u realizuan 7 për qind më pak se plani. Investimet janë zëri më produktiv i shpenzimeve të buxhetit, pasi nxisin ekonominë dhe krijojnë punësim. Por edhe për këtë vit, realizimi i tyre ka rezultuar problematik, veçanërisht tek projektet me financim të brendshëm.