Sigal

Dogana britanike, denoncon se fabrika e cigareve prodhon 22 milionë paketa të ‘falsifikuara’ çdo vit. Në mesin e atyre që përfitojnë nga cigaret kontrabandë është edhe kompania “Ujori”, agjensi doganore në pronësi të Xhuliana Sejdinit, gruaja e kryebashkiakut të Elbasanit Qazim Sejdini. Ja raporti i plotë i hetimit britanik

Dogana britanike: Fabrika në Librazhd prodhon 22 miliona paketa cigare të “falsifikuara” çdo vit

Në mesin e atyre që përfitojnë nga biznesi që po lulëzon me cigaret “Kleopatra” gjithashtu është edhe gruaja e një figure të fuqishme politike në Shqipëri nga Partia Socialiste në pushtet, edhe pse ajo insiston që nuk ishte në dijeni për dyshimet për kontrabandë

Cigaret e “falsifikuara” në Shqipëri shiten kontrabandë në Afrikën e Veriut

Një hetim i filluar nga zyra e riskut të doganave britanike, zbulon se një fabrikë në Librazhd vazhdon të prodhojë miliona cigare të ‘falsifikuara’ çdo vit. Është shumë e vështirë që të nxirren në shesh sekretet në qytetin e varfër të Librazhdit, sidomos kur janë në lojë vendet e punës. Por aktiviteti kontrovers i një fabrike cigaresh në periferi të qytetit me 50 të punësuar, duket se ka kaluar pa u vënë re që nga koha kur ajo filloi të prodhojë pa bujë miliona cigare në pako që bartin profilin e sundueses së fundit Ptolemeike të Egjiptit, Kleopatra. “Cleopatra” është marka më e njohur e cigareve në Egjipt dhe një nga më të shiturat në botë.

 

22 milionë paketa cigare të falsifikuara çdo vit nga Fabrika e Librazhdit

Dokumentet e gjykatës në Shqipëri, raportet e rrjedhura të doganave britanike, kontratat dhe intervistat me drejtuesit e fabrikës, zbulojnë se, që nga viti 2014 rreth 22 milionë paketa cigare janë prodhuar çdo vit në fabrikën “Albania Tabak në Librazhd”, përpara se të dërgohen në Libi. Sipas pronarit të markës “Cleopatra” – ‘Eastern Company’ me seli në Giza, cigaret që eksportohen në Libi shpesh kontrabandohen nëpërmjet kufirit të gjelbër në Egjipt, ku një pako me 20 cigare shitet në treg për 1 USD. Autoritetet doganore britanike e kanë gjurmuar prodhimin në Librazhd duke e shënuar atë si të falsifikuar. Paralajmërimet e tyre nxitën një hetim penal në Shqipëri në vitin 2015, i cili e ndali prodhimin për një vit. Hetimi më pas u pezullua pasi prokurorët prisnin informacione nga juridiksionet e huaja. Sipas një kontratë të siguruar nga BIRN, e lehtësuar nga telashet ligjore fabrika nënshkroi një marrëveshje në 2017 me firmën “Eques Holding Group” – me seli në Ishujt Virgjin Britanik, për të prodhuar deri në 175 milionë paketa në vit. Prokurorët shqiptarë deklaruan se e kanë rihapur rastin në vitin 2017.

Kush fshihet pas kësaj afere?

Të pa shqetësuar, personat që po udhëheqin aferën po kërkojnë të zgjerohen. Ata përfshijnë figura nga Ballkani, Lindja e Mesme dhe Qipro, disa nga të cilët kanë qenë të lidhur me raste të mëhershme të kontrabandës, dhe disa të tjerë përfshirja e të cilëve në këtë operacion ka qenë e fshehur përmes strukturave “offshore” të cilat i kanë gjetur nga gazetarët e Rrjetit Ballkanik për Investigative, BIRN, dhe të Gazetarëve Arabë për Gazetari Investigative, ARIJ. Në mesin e atyre që përfitojnë nga biznesi që po lulëzon me cigaret Kleopatra gjithashtu është edhe gruaja e një figure të fuqishme politike në Shqipëri nga Partia Socialiste në pushtet, edhe pse ajo insiston që nuk ishte në dijeni për dyshimet për kontrabandë. Krimi i organizuar dhe sundimi i ligjit janë çështje madhore me të cilën po përballet Shqipëria ndërsa ajo tenton të bëjë progres në rrugën e vet drejt anëtarësimit në Bashkimin Evropian, pasi i është bashkuar NATO-s në vitin 2009. Menaxheri i fabrikës në Librazhd, Servet Dauti, tha se ajo punon tërësisht në harmoni me ligjin shqiptar dhe se çfarë ndodhi me cigaret pasi ato u larguan nga Shqipëria nuk është problem i tij. “Nga momenti kur prodhimi del nga Shqipëria, ne nuk kemi përgjegjësi ose obligim të dimë se çfarë ndodh me të”, tha ai. ‘Eques Holding Group’ refuzoi të komentojë për gjetjet e këtij investigimi. Ushtria e Egjiptit raporton rregullisht për konfiskime të cigareve të falsifikuara “Cleopatra”. Në këtë fotografi, 4,200 pako me cigare ishin kapur në dhjetor 2016 në kufirin e braktisur me Libinë. Të prodhuara më shumë se një mijë kilometra larg nga vendi i faraonëve, paketat e dyshuara si të falsifikuara megjithatë mbajnë profilin e njohur të Mbretëreshës Kleopatra, të dashurës së Jul Cezarit, dhe bartin mbishkrimin në gjuhën arabe “Made in Egypt by Eastern Company S.A.E.” Paketat janë të mbuluara me paralajmërime shëndetësore të autoriteteve Egjiptiane. “Eastern Company S.A.E.” e krijoi markën “Cleopatra” për Presidentin Egjiptian Gamal Abdel Nasser në vitet 1960, si një version vendas i markës të kontrabanduar amerikane “Kent”, të cilën ai pëlqente ta konsumonte. Kjo markë është prodhuar që nga atëherë, kryesisht për konsum vendor. Taksat në rritje të cigareve që nga vitet 2010 e këtej krijuan një treg të zi të lulëzuar për produktin; mungesa e ligjit në Libinë fqinje – që nga rrëzimi i diktatorit Muammar Gadaffi, në vitin 2011, e ka kthyer vendin në një parajsë të kontrabandës. Cigaret “e falsifikuara” nga Shqipëria – siç përshkruhen nga doganat britanike në një letër të majit 2015 drejtuar doganave të Egjiptit dhe të cilën e ka siguruar BIRN/ARIJ, janë të prodhuara për ‘Eques Holding Group,’ një kompani nga në pronësi të një biznesmeni iraken 38 vjeçar të quajtur Faris Al-Rifai. “Eques Holding Group” ka një licencë për përdorim e markës “Cleopatra” në Bashkimin Evropian dhe Shqipëri, të fituar nga një tjetër firmë nga Ishujt Virgjin Britanik, “Ëorldëide Spirit Supply”. “Eastern Company” nuk ka qenë e suksesshme në rrëzimin e këtyre markave tregtare, pasi nuk ka qenë në gjendje të dëshmojë se e kishte përdorur markën së fundmi në këto shtete. Por markat tregtare kanë vlerë në baza strikte gjeografike, dhe kompania “Ëorldëide” nuk e mbulon Libinë ose Egjiptin, aty ku “Eastern Company” e ka të regjistruar markën e tyre.

Trafiku ndërkombëtar i kontrabandës së cigareve të Librazhdit

Megjithatë, “Cleopatra” e prodhuar në Shqipëri është eksportuar përmes portit të Durrësit në Libi edhe te një firmë e quajtur “Al Zain International Company”. Kërkesat për koment drejtuar kompanisë nuk morën përgjigje. Një raport i brendshëm nga “Eastern Company”, i siguruar nga BIRN/ARIJ, përshkruan se si cigaret “Cleopatra” që arrinin në Libi nga shtetet si Vietnami dhe Mali i Zi, kontrabandoheshin në Egjipt ku mund të shiteshin krahas paketave origjinale, që kushtojnë më pak se 1 dollar. Edhe pse nuk ka prova të drejtpërdrejtë që “Cleopatra”-t e prodhuara në Shqipëri kanë gjetur rrugën drejt Egjiptit, zyrtarët kanë raportuar konfiskime të rregullta të markës në shtetin e Afrikës së Veriut gjatë viteve të fundit. Të ardhurat për “Eastern Company” dhe qeverinë e Egjiptit gjithashtu janë goditur rëndë nga cigaret e falsifikuara. Cigaret e prodhuara në Shqipëri gjithashtu pretendojnë se prodhohen nga “Eastern Company S.A.E.”, dhe kjo e drejtë ishte dhënë nga një kompani me emër të njëjtë por me seli në Ishujt Virgjin Britanik dhe me adresë të njëjtë me “Eques Holding Group”. Nuk ka një lidhje të dukshme me “Eastern Company”-n origjinale që e ka selinë në Giza – shtëpi e piramidave të Gizës në jugperëndim të Kajros. Letra që konfirmon të drejtat e prodhimit ishte lëshuar disa muaj përpara se prokurorët shqiptarë të hapin një hetim ndaj operacioneve të fabrikës, të nxitur nga doganat britanike, HRMC. Hetimi penal rreth “shkeljes së të drejtës së pronësisë industriale”, “pastrimi i të ardhurave nga veprat penale ose aktiviteti kriminal” dhe “prodhim ilegal i artikujve/mallrave industriale apo ushqimore” u hap në fillim të vitit 2015. Sipas raporteve të lajmeve nga ajo kohë, 9 milionë cigare të falsifikuara ishin kapur në një bastisje në fabrikë, por artikujt nuk e përmendnin markën – Cleopatra – edhe pse ato dukeshin mjaft mirë nga fotografitë e bëra publike. Pas bastisjes, rasti ishte pezulluar ndërkohë që prokurorët prisnin përgjigje nga juridiksione të ndryshme të huaja, përfshirë edhe Ishujt Virgjin Britanik dhe Egjipti. Sipas një raporti të “Eastern Company”, pezullimi i dha mundësi “Albania Tabak”-ut që ta rifillojë prodhimin, me gjithë kontaktet ndërmjet doganës së Shqipërisë dhe ambasadorit të Egjiptit në Tiranë, dhe sipas letrave zyrtare të siguruara nga BIRN/ARIJ shqetësimeve të doganës britanike dhe monitorimit të saj të vazhdueshëm. Britania është një nga tregjet më të mëdha në Evropë për cigaret e falsifikuara dhe të kontrabanduara. Në korrespondencë me doganat e Egjiptit pak kohë pas bastisjes, në maj të vitit 2015, HMRC përshkroi se si një punonjës në Sofje por me përgjegjësi në Shqipëri, “ka qenë i suksesshëm së fundmi në mbylljen e një fabrike të prodhimit të cigareve që prodhonte markën e falsifikuar të Cleopatra-s”. “Qëllimi i HMRC është që ta çrrënjosë prodhimin e falsifikuar të markës “Cleopatra” me ndihmën e “Eastern Company”, bartësin e licencës legjitime të markës”, thuhej në letër. Deri tani, as “Albania Tabak”, as “Eques Holding Group” dhe “Ëorldëide Spirit” apo ndonjë punonjës i këtyre firmave nuk janë është për ndonjë krim.

Prodhimi rifillon dhe zgjerohet

Dauti, menaxheri i fabrikës, tha se ajo ishte mbyllur për gati një vit ndërkohë që vazhdonte hetimi, pas të cilit ata u lejuan që ta rihapnin. Më pas, në dhjetor të vitit 2016, HMRC informoi kolegët e tyre egjiptianë se tetë dërgesa me cigare Kleopatra ishin dërguar në Libi për “Eques Holding Group”. Në mars të vitit 2017, ajo edhe një herë raportoi në Egjipt se 11.5 milionë cigare “Cleopatra” do të eksportoheshin në Libi, përmes Maltës. Kontrata e fundit, e nënshkruar në mars të vitit 2017 dhe e siguruar nga gazetarët, thotë se “Albania Tabak” do të prodhojë deri në 3,500 ton cigare në vit për dy vjet, çfarë nënkupton se do të prodhoheshin 3.5 miliardë cigare çdo 12 muaj, ose 175 milionë paketa cigare. Dokumenti i vendos një vlerë prej 15 milionë euro porosisë. Në një intervistë për BIRN/ARIJ, Dauti mohoi të ketë bërë ndonjë gjë gabim. “Ne punojmë dhe procedojmë në harmoni të plotë me ligjin shqiptar”, tha ai. “Markat tregtare regjistrohen në Evropë dhe Shqipëri, prandaj ligjërisht asgjë nuk na pengon që ta prodhojmë atë. Por edhe nëse nuk janë të regjistruara në Shqipëri, nuk ka asgjë që na ndalon ta prodhojmë atë sipas ligjit shqiptar, pasi ne funksionojmë si kompani prodhuese dhe të gjitha hyrjet e daljet monitorohen”. “Eques Holding Group” u pajtua t’i paguajë “Albania Tabak”-ut shumën prej 0.014 për pako, ose 300 mijë euro në vit. “Sipas kontratës, ne vetëm duhet t’i paketojmë ato dhe t’i dërgojmë në Durrës”, tha Dauti. Dauti tha se makineria në fabrikën e Librazhdit ishte e vjetër dhe në gjendje për të prodhuar vetëm 1.8 milionë pako në muaj, ose 21,6 milionë për vit. Ai dhe pronari zyrtar i “Eques Holding Group”, Al-Rifai, kanë themeluar një kompani të re, “Eques Trading Company Shpk”, në afërsi të Elbasanit ku kanë aplikuar për të hapur një fabrikë të re. “Ne kemi kapacitet për tre kontejnerë në muaj”, tha Dauti për fabrikën aktuale. “Nuk mund të bëjmë më shumë se kaq edhe pse kontraktuesi kërkon sasi më të madhe. Ne nuk mund të bëjmë më shumë, sepse nuk kemi pajisje në dispozicion”. I intervistuar për herë të dytë, Dauti e mohoi planin për të hapur fabrikë të re, duke thënë se do ta rishikojnë idenë pas 6 muajsh.

Lidhjet me kontrabandën

Fabrika e cigareve “Albania Tabak” në Shqipëri, afër qytetit të Elbasanit, është një nga punëdhënësit më të mëdhenj në qytet (BIRN). Fabrika “Albania Tabak” ka qenë në pronësi të familjes Jashari nga dhjetori i vitit 2010, kur është blerë nga Ilir Jashari për 3 milionë euro para se të kalonte në pronësi të gruas dhe djalit të tij. Ilir Jashari është dënuar për trafikim droge në Itali në qershor të vitit 2010 dhe i është dhënë një dënim fillestar prej më shumë se 15 vjet burgim, dënim i cili më vonë iu zvogëlua, ndërsa ai filloi ta vuajë atë vetëm pas arrestimit në vitin 2014. Në vitin 2016 ai u transferua në një burg shqiptar dhe në vitin 2017 u lirua nga burgu, sipas një burimi të afërt me procesin. I kontaktuar përmes telefonit, ai refuzoi të komentojë. Pronësia e “Ëorldëide Spirit,” ndërkohë, është mbështjellë me sekret në Ishujt Virgjin Britanik, dhe asnjë shenjë nuk është dhënë në informacionin e ofruar për BIRN/ARIJ nga parajsa fiskale. Por aplikimit për markë tregtare të paraqitura në Zyrën e Pronësisë Intelektuale të BE-së zbuluan se firma është në pronësi të një kompanie të quajtur “Middle East Tobaço Co”, “Metco”, me seli në Qipro (“Metco” është pronare e “Ëorldëide Spirits”) me një qarkullim prej rreth 28 milionë dollarë në vitin 2014, duke iu referuar llogarive të kompanisë. Sipas dokumenteve nga çështje e vitit 2008 në Gjykatën e Lartë në Londër, ndërmjet prodhuesit britanik të cigareve “Gallagher” dhe firmës qipriote të quajtur “Tlias”, përgjatë 18 muajve duke filluar nga maji i vitit 2002, 20 mijë koli të cigareve “Gallagher” ishin dërguar në Belgjikë, Mal të Zi, Holandë, Singapor, Slloveni dhe Tenerife nga distributori kryesor i “Tlias” te “Metco” pa ndonjë kufizim në destinacionin e tyre final, në shkelje të kontratës së “Tlias”. Cigaret më pas të shitura nga “Metco” përfunduan duke u kontrabanduar në Britani të Madhe dhe kjo rezultoi me pesë persona të dënuar. Gjykatësi tha: “Duhet të besojmë se “Metco” nuk kishte të bënte asgjë me kriminelët”. Një punëtor i “Metco”, i cili refuzoi ta identifikojë veten, tha se ata “nuk ishin të interesuar për të marrë pyetje apo për t’u përgjigjur pyetjeve të BIRN/ARIJ rreth markës tregtare të” Cleopatra”-s. Sipas një kontrate të nënshkruar ndërmjet “Eques Holding Group” dhe “Ëorldëide Spirit Supply”, firmës nga Ishujt Virgjin Britanik, bartëse e “markës tregtare”, “Eques” u pajtua t’i paguajë “Ëorldëide” një dollar për çdo 10 mijë cigare të prodhuara. Kjo shumë përllogaritet afërisht 44 mijë dollarë në vit. Një tjetër kompani që nxirrte para nga bumi i cigareve në Librazhd është agjencia doganore “Ujori”, e cila është në pronësi të Xhuliana Sejdinit, gruaja e kryebashkiakut të Elbasanit, Qazim Sejdini, një aleat i kryeministrit Edi Rama. Sipas raportit të prokurorit shqiptar, të siguruar nga BIRN/ARIJ, menaxheri i fabrikës, Dauti u kishte thënë prokurorëve se “e tërë procedura e import-eksportit (ishte bërë) përmes agjencisë doganore “Ujori”. Dauti tha për BIRN/ARIJ se “Ujori”-t i ishte dhënë detyra sepse “ajo është kompania e vetme që bën gjithçka në Elbasan kështu që ne nënshkruam një kontratë me të”. Nuk dihet se sa ka fituar “Ujori” nga dërgesat e cigareve të dyshuara si të falsifikuara. Sejdini tha për BIRN se ajo nuk ishte në dijeni për hetimin ndaj “Albania Tabak”, duke shpjeguar se firma e saj ishte e përfshirë vetëm në rregullimin e letrave. “Ne nuk hapim ndonjë kamion dhe nuk e dimë çfarë ka brenda tyre dhe nuk ka arsye pse ta dimë këtë”, tha ajo. Kryebashkiaku i Librazhdit, Kastriot Gura, tha se dinte pak rreth aktiviteteve të fabrikës në këtë qytet, përtej frymëmarrjes shumë të nevojshme për ekonominë e sëmurë lokale. “E di se ata prodhojnë cigare dhe se ato kanë sjellë vende pune në qytet”, tha ai. “ata rregullisht paguajnë obligimet bashkiake dhe për ne kjo është ajo që ka rëndësi”. Gura tha se nuk i interesonin dyshimet për shkelje. “Kjo është përgjegjësi e pjesëve tjera të shtetit”. Më 12 dhjetor, pak para publikimit të këtij artikulli, Prokurorja Armanda Xhaferri, zbuloi në një deklaratë me shkrim për BIRN se zyra e saj në Elbasan, e kishte rihapur çështjen e vitit 2017, pasi kishte administruar dokumente të reja nga Ishujt Virgjin Britanik, por se hetimi ende po priste për të dhëna nga Egjipti. “Nën këto rrethana, hetimi ynë nuk ka përfunduar ende”, tha Xhaferri. Duke iu përgjigjur pyetjes, pse dogana ka lejuar një firmë nën hetime të eksportojë mallra që pretendojnë të jenë “Made in Egypt” drejt Libisë, dogana e Shqipërisë tha në një deklaratë se “Eques Holding Group” po operonte me një markë tregtare shqiptare për “Cleopatra”, edhe pse ata pranuan se “Eastern Company” e kishte regjistruar “Cleopatra Lux” si markë të veten. Dogana shtoi: “Rasti po vazhdon të hetohet nga Prokuroria e Qarkut të Elbasanit ndërsa Drejtoria e Përgjithshme e Doganave po pret rezultatet e hetimit”.