Në protestën e ditës së djeshme për rritjrn e çmimeve, në podium u shfaq edhe një vogëlushe. Ajo mori mikrofonin dhe i kërkoi Ramës të largohej pasi nuk ishte i denjë për këtë vend.
Ashtu si në shumë vende të botës, fëmijët janë të pranishëm në protesta dhe prania e tyre nuk e shqetëson aq shumë qeverinë sa këtu, sa të çojë në reagimin e ministres së Arsimit Evis Kushi në lidhje me rastin.
Ajo i ka kushtuar një shkrim të gjatë këtij gjesti duke shkruar se “në shkollat tona një armatë e gjerë mësuesish i kushtojnë energji pa fund edukimit të nxënësve” dhe se dënon çedukimin e fëmijëve nga prindërit dhe i bën thirrje shoqërisë të dënohen fort të tilla ngjarje.
SHKRIMI I MINISTRES SË RAMËS
Rastësisht pashë në media një vajzë të vogël rreth 10 vjeçe, hipur në podiumin e protestës, që fliste për rritjen e çmimeve dhe nevojën për rritjen e pagave. Madje mbante në duar dhe fliste edhe për planin urban të një zone këtu në Tiranë.
Në një moment të caktuar vajza e vogël, e stimuluar edhe nga duartrokitjet e qytetarëve të ekzaltuar, filloi të shajë me fjalë fyese, madje të turpshme, dhe çuditërisht dhjetëra mikrofona mediash vazhdonin të drejtoheshin me shumë fokus dhe interes ndaj saj.
Dukej qartë që gjithçka ia kishin mësuar përmendësh dhe vajza e vogël i artikulonte fjalët pa kuptuar rëndësinë e tyre dhe as arsyet apo qëllimin e vërtetë të protestës.
Më ka tronditur vërtetë kjo ngjarje, sepse në shkollat tona një armatë e gjerë mësuesish i kushtojnë energji pa fund edukimit të nxënësve apo fëmijëve me gjuhën e respektit, mirëkuptimit dhe komunikimit paqësor me njëri-tjetrin.
Unë nuk jam kundër protestave, nëse ato janë të drejta, paqësore dhe kanë si qëllim një interes të lartë publik. Por unë nuk mund të pranoj keqpërdorimin e nxënësve apo fëmijëve dhe çedukimin e tyre, në kundërshtim me parimet dhe normat bazë të demokracisë dhe qytetarisë.
Prandaj unë protestoj kundër atyre prindërve që keqpërdorin, apo lejojnë që fëmijët e tyre të keqpërdoren nga të tjerët në protesta, dhe u bëj thirrje të gjithëve si shoqëri që t’i dënojmë fort dhe të reagojmë ndaj ngjarjeve të tilla.
Prindër të dashur, lërini fëmijët të rriten të qetë në fëmijërinë e tyre e të mësojnë sa më shumë vlera! Ju ftoj të jeni mbështetës edhe për mësuesit e fëmijëve tuaj, duke i përgatitur ata si qytetarë të mirë e të denjë për shoqërinë tonë.
