Sot në mbrëmje në ora 19.00 në stadiumin “Elbasan – Arena” me ndeshjen e shumë pritur Kukësi –Partizani ngre siparin e tij kampionati i 81-të kombëtar i futbollit për Kategorinë Superiore. Kështu , në harkun e pesë ditëve stadium qytetit futbolldashës të Elbasanit bëhet pikë referimi në përballjet midis Partizanit dhe Kukësit për dy eventet kombëtare të topkëmbës, më parë finalja e Superkupës dhe tani ndeshja e parë e javës parë të Kampionatit të ri për Kategorinë Superiore për sezonin 2019-2020. Ky është i 81-të kampionat në radhën e tij të garës futbollistike në vendin tonë. Por, për fat të keq Elbasani dhe stadium tij nuk do të presin ekipin e qytetit tyre, por si dhe herë të tjera në këto vitet e fundit do jetë përsëri mikpritës për dy nga ekipet më të mira të futbollit shqiptar, ato të Partizanit kampion në fuqi dhe Kukësi nënkampion. E pra, sot në mbrëmje topi futbollit do fillojë të lëvizë në korsinë e garës me dhjetë skuadra pjesëmarrëse, duke e përfunduar misionin e vet për këtë sezon të ri, më 23 Maj 2020, kur do njihet dhe skuadra e re kampione, si dhe do zgjidhet dhe shumë enigma për pjesëmarrjen në Kupat e Evropës dhe rënien një kategori më poshtë. Por nesër të shtunën, do përballen në katër ndeshje të tjera tetë skuadrat me këtë kalendar:Vllaznia –Laçi, Skënderbeu -Flamurtari, Tirana-Luftëtari dhe Teuta–Bylis. E thënë qartë të dhjetë ekipet pjesëmarrëse të Kategorisë Superiore janë vendosur në korsinë e garës dhe presin vetëm sinjalin për të nisur udhëtimin e tyre të bukur sportiv. Përballje, garë, emocione, dëshira, hipoteza, gëzime për fitoret dhe zhgënjime për humbjet janë disa nga momentet që do shoqërojnë nga java në javë të gjithë këtë kampionat. Kështu nga dhjetë skuadrat pjesëmarrëse, ku katër prej tyre janë; pikërisht Partizani, Kukësi, Teuta dhe Laçi na zhgënjyen fort në turet para-eliminatore të Kupave të Evropës dhe katër prej tyre; dhe pikërisht Tirana, Vllaznia, Luftëtari dhe Flamurtari, falë akt-marrëveshjeve në ditët e fundit të afatit të vendosur për shlyerjen e detyrimeve financiare me institucionet e tatim-taksave dhe sigurimeve shoqërore fituan të drejtën për të marrë pjesë në këtë garë sportive, si dhe Skëndërbeu i ndëshkuar keq nga UEFA dhe Bylis i rikthyer pas katër sezoneve, janë në garën e të mirëve në 36 javë me plot 180 ndeshje që do zhvillohen duke formatuar tashmë pjesëmarrjen në Kampionatin e 81-të Kombëtar të futbollit për Kategorinë Superiore. Kësisoj kemi lënë pas plotë 80 kampionate kombëtare të futbollit në 87 vjet të krijimit të FSHF–së që nga 6 Prilli i vitit 1930 kur ka nisur kampionati parë kombëtar i futbollit. Dhe kampionati parë është zhvilluar me gjashtë skuadra pikërisht SK. Tirana, “Bashkimi Sportiv” Shkodër, “Teuta”–Durrës , “Urani” –Elbasan dhe Vlora. Dhe ndeshja e parë zyrtare e kampionatit parë është ajo midis; Bashkimi Sportiv” Shkodër –SK Tirana. Kjo ndeshje është zhvilluar po në Shkodër, 6 Prill 1930, pikërisht në atë qytet ku ka lindur për herë të parë dhe loja e topkëmbës, diku në vjeshtën e vitit 1913 me atë ndeshje të djemnisë shkodrane përballë një ekipi të ushtrisë austriake. Dhe ndeshja e parë zyrtare në historinë e futbollit shqiptar: “ Bashkimi –Sportiv”- Shkodër –Tirana ka përfunduar me rezultatin 3-2 në favor të shkodranëve. Të pestë golat e shënuar mbajnë autorësinë e Qazim Dervishit, Pac Koliqit dhe Gjon Kirit për shkodranët dhe Raxhep Maçit dhe Hilmi Kosovës për tiranasit. Goli i shënuar nga shkodrani Qazim Dervishi njihet dhe si goli parë historik në kampionatet shqiptare të futbollit. Gjithsesi në përfundim të kampionatit të parë kombëtar të futbollit Tirana është shpallur kampione e vendit dhe njihet zyrtarisht si e tillë. Skuadra i zhvillonte ndeshjet tek fusha e sportit, diku në Shallvare, pranë lokalit që njihet sot “Tajvani”. Kjo fushë sportive është përuruar më 31 Mars 1930 në ndeshjen miqësore SK. Tirana –“Urani” Elbasan . Kampionët e SK. Tiranës ishin këta: Irfan Gjinali, Rudolf Gurashi, Abdullah Shehri, Xhelal Kashari, Vasil Kajana, Gjon Sabati, Llazar Miha, Mark Gurashi, Bexhet Jolldashi, Isuf Dashi, Selman Stërmasi, Adem Karrapici, Hysen (Dake) Kusi, Mustafa Begolli, Hilmi Kosova, Emil Hajnali, Rexhep Maçi, Isuf Dashi, dhe Shefqet Ndroqi K.S Tirana do ta përsëriste këtë sukses me fitimin e titullit kampion dhe pesë herë të tjera me përjashtim të vitit 1933 kur “Skënderbeu” do t’i prishte e rregullsinë e fitimit të titujve në vitet përpara çlirimit . Gjithsesi, janë plotë 6 tituj kampion të fituar përpara çlirimit nga 7 kampionate të zhvilluara, edhe pse KS Tirana pretendon se është shpallur kampione edhe në 1911, 1939 dhe 1942 , sikundër dhe Vllaznia e Shkodrës që pretendon për një titull kampion të fituar në 1940, por që FSHF –ja nuk i ka zyrtarizuar deri sot si të tillë. Kështu nga 80 kampionatet kombëtare të futbollit 7 janë zhvilluar deri në vitin 1944 dhe 73 kampionate që nga 2 shtatori 1945 e deri sot ku kemi këtë bilanc: e kanë fituar titullin kampion këto skuadra: Tirana 24 herë, Dinamo 18 herë, Partizani 16 herë, Vllaznia 9 herë, Skënderbeu 8 herë, Elbasani 2 herë dhe Flamurtari, Teuta dhe Kukësi nga një herë janë shpallur kampion. Por titujve kampion të fituar si shume detajeve të tjera që kanë të bëjnë me skuadrat pjesëmarrëse në 80 kampionatet e zhvilluara deri tani, ndeshjet e zhvilluara nga futbollistët pjesëmarrës autorët e golave, gjyqtarët e ndeshjeve dhe fakte të tjera që duhen zhvillimit të një kampionati futbolli që përbëjnë një histori më vete duhen të botohen një buletinet periodik të FSHF-ës dhe jo ti lihen spontanitetit dhe arkivave sportive të pa sistemuara. Dhe kur flitet për një vend si Shqipëria që kampionati saj i futbollit është zhvilluar në vitin 1930 dhe vende të tjera që kanë filluar kampionatet e tyre si Franca në vitin 1933, Zvicra në vitin 1934, Portugalia në vitin 1935, Izraeli në vitin 1932, ish-Bashkimi Sovjetik në vitin 1936, Qipro në vitin 1935, Norvegjia në vitin 1938 dhe Turqia në vitin 1959 dhe kanë të sistemuara gjithçka është për të ardhur keq që ndodh kështu me historinë e futbollit shqiptar. Duke iu rikthyer kampionati 81-të kombëtar të futbollit për Kategorinë Superiore pa dashur të flasim këtu për futbollin me shumë probleme në kategorinë e parë, të dytë dhe tretë që ndryshe përbëjnë dhe tërësinë e divizioneve futbollistike, rezulton se përgatitjet për sezonin e ri kanë lënë shumë për të dëshiruar. Shumë skuadra si Flamurtari, Luftëtari, Skënderbeu dhe Vllaznia, por dhe të tjera me shumë vështirësi janë formatuar si ekipe. Fazat përgatitore janë kryer me vonesa të theksuara, kurse përbërjet e tyre nuk premtojnë shumë vlera. Dhe, meqenëse dolëm tek merkato le ta themi hapur e qartë, se ajo ka qenë si “tregu i gabit”. Plot 237 futbollistë janë të afruar dhe të larguar nga të dhjetë skuadrat pjesëmarrëse. Kështu Partizani ka afruar 10 futbollistë dhe ka larguar 11 të tillë, Kukësi ka afruar 13 dhe larguar po 13, Teuta ka afruar 11 dhe larguar 13, Skënderbeu ka afruar 12 dhe larguar 12, Flamurtari ka afruar 11 dhe larguar 13, Laçi ka afruar 11 dhe larguar 16, Tirana ka afruar 7 dhe larguar 11, Luftëtari ka afruar 21 dhe larguar 14, Bylis ka afruar 10 dhe larguar 8 dhe Vllaznia ka afruar 12 dhe ka larguar 11 futbollistë. Por merkato e verës mbyllet më 31 gusht dhe, me sa shikohet, priten lëvizje të tjera, të cilat do sjellin shumë ndryshime në përbërjet e të gjitha skuadrave. Po kështu gjatë verës është luajtur mirë “valsi i bankinave” tek 6 skuadra pjesëmarrëse që kanë ndryshuar trajnerët e tyre. Partizani, me Franko Lerdën, Kukësi me Shpëtim Duron, Skënderbeu me Ilir Dajën, Flamurtari me Dritan Satedinin, Luftëtari me Klevisi Dalipin dhe Vllaznia me Mirasad Jonuzin janë risitë për sezonin e ri në drejtimin e skuadrave . Gjithsesi tashmë thuajse gjithçka është gati për Kampionatin e 81-të Kombëtar të Futbollit në Kategorinë Superiore dhe pritet vetëm vërshëllima e parë për të filluar gara.
Kategoria Superiore
Java e parë (23 -24 gusht 2019) | |||
Dita | Skuadrat | Ora | Qyteti |
Sot: | Kukësi-Partizani | 19.00 | Elbasan |
Nesër: | Vllaznia-Laçi | 16.00 | Shkodër |
Nesër | Skënderbeu-Flamurtari | 19.00 | Korçë |
Nesër | Teuta-Bylis | 19.00 | Durrës |
Nesër | Tirana -Luftëtari | 19.00 | Tiranë |