Kryesocialisti bën thirrje publike në Facebook për punësimin e të gjitha moshave, qindra vetë i përgjigjen qysh në ditën e parë
Në kohën kur pritet bashkëbisedimi ndërpartiak i forcave të koalicionit të majtë, Edi Rama ka shpallur dje pasdite, publikisht, një lajmërim duke i bërë thirrje të gjitha moshave të afta për punë, që të aplikojnë nëpërmjet kërkesave të tyre për të zgjedhur vendin e punës, në bazë të aftësive personale dhe profesionale të secilit. Megjithëse në pamjen e parë kjo duket si një metodë populiste përsëri Kryesocialisti Rama, brenda disa orëve të ditës së djeshme ka marrë me qindra përgjigje në Facebook, ku shumica e mbështesin për iniciativën, ndërkohë që, një pjesë e tyre e urojnë për publikimin e këtij njoftimi. Që në titullin e njoftimit Rama thotë: “Kush do të kontribuojë në ekipin e ri, duhet të thotë se për kë fushë dëshiron të provohet. Për skuadrën e re për Shqipërinë. Ndërsa në rreshtin e parë të njoftimit, Rama thotë: “Zgjedhjet mbaruan me një fitore të gëzueshme spektakolare. Por së shpejti një qeveri e re do të duhet të përballet me realitetin aspak të gëzueshëm të Shqipërisë që kemi premtuar të rilindim. Unë do të drejtoj qeverinë, por as unë vetëm dhe as vetëm qeveria nuk përbëjmë gjithë skuadrën e re për Shqipërinë”. Në fillim të këtij bashkëbisedimi me njerëzit, Rama thotë midis të tjerave se qeveria e ardhshme ka nevojë për kontributin dhe ndihmën e të gjithë atyre që ndjehen se mund të japin energji pozitive për ecjen përpara. Midis të tjerave, Rama shkruan: “As mund të bëjmë dot të vetëm punën e gjithë skuadrës që duhet të jetësojë reformat e thella të Kuvendit të ri të Shqipërisë. Skuadra që na duhet përbëhet si çdo skuadër e vërtetë nga shumë pjesë, të dukshme e të padukshme, që veprojnë në shumë nivele për të fituar sfidën. Fushatën tonë e bëri fantastike energjia e jashtëzakonshme e shumë njerëzve, të njohur e të panjohur. Drejtues, koordinatorë, anëtarë partie të çdo moshe, por edhe dhjetëra mijëra vullnetarë e simpatizantë të Aleancës për Shqipërinë Evropiane, brenda e jashtë vendit. Në territorin e vendit po edhe në rrjetet sociale. Prandaj, sot ju drejtohem të gjithëve ju, çdo shqiptari të zot e të etur për ndryshim, për t’ju pyetur çfarë mendjeje keni për më tutje”, shprehet Rama. Më tej ai saktëson se njerëzit duhet të sqarojnë se çfarë roli mund ët kryejnë në këtë qeverisje. Ai shprehet: “Dhe atyre që dëshirojnë, u lutem të mendojnë çfarë roli mund të luajnë për këtë skuadër, si mund t’i përdorin aftësitë e tyre për të ndihmuar në realizimin e ndryshimit që i nevojitet vendit tonë. Qoftë atyre brenda qoftë atyre jashtë Shqipërisë, u them se unë dëshiroj fort që më të zotët të përfshihen në përpjekjen për përballimin me sukses të sfidës së jashtëzakonshme që ka përpara qeveria e re. Themeli i kësaj përballjeje historike me të shkuarën në pushtet që rrënoi Shqipërinë është rimëkëmbja e sistemit institucional të republikës sonë, me një vizion demokratizues, vullnet shtetndërtues dhe sjellje të re me administratën”, vijon Rama.
Fushat e punësimit
Në këtë komunikim, Rama vë në dukje nevojën e qeverisë së re për emra të rinj dhe për koordinimin me eksperiencat e më të vjetërve. Për këtë Rama ka shkruar këto fjalë: “Në kryeministri po edhe në çdo ministri e agjenci shtetërore, ne do të kemi nevojë për prurje të reja energjish dhe aftësish njerëzore të harmonizuara me eksperiencën e gjithkujt që në zyrat e shtetit gjendet sot për arsye të meritës, e jo thjesht për shkak të lidhjeve të gjakut, teserës apo korrupsionit me tribën në fuqi. Shumë struktura të vjetra do të zhbëhen dhe një sërë të rejash do të ngrihen, për të çuar përpara projektet e programet prioritare të qeverisë që të ecim më shpejt në rrugën e Rilindjes e të bashkimit të Shqipërisë me Familjen Europiane”, vë në dukje Kryesocialisti shqiptar. Duket sikur ky propozim për projektin qeverisës, ka nevojë për mbështetës dhe njerëz të gatshëm për të ndihmuar në konkretizimin tij. Për këtë shkak, Rama shkruan: “Ja pse sot unë kërkoj ndihmën e kujtdo që mund të ndihmojë, që projekti i votuar nga 1 milionë shqiptarë në 23 qershor të kthehet në një histori suksesi shoqëror për gjithë shqiptarët”. Duke folur një më gjatë për votimin e shqiptarëve më 23 qershor, Rama thotë se: “Verdikti i asaj vote dikton që asnjë njeri i zot në këtë vend, të mos mbetet pa një mundësi për ta tentuar shansin e vet të pjesëmarrjes në skuadrën e re për Shqipërinë”, tha ai. Më tej Rama foli për konkurrencën dhe meritën. “Kemi nënvizuar me forcë në fushatën tonë se konkurrenca dhe merita do të jenë vlerat që do të na udhëheqin për të çliruar energjitë, pasionet, idetë e vullnetet e ndrydhura të njerëzve në të tatëpjetën e rrënimit të këtij vendi. Dhe jemi votuar masivisht që të ecim më shpejt për t’i rilindur këto vlera të vdekura prej kohësh. Prandaj është e qartë besoj se shumë mund të provojnë, por jo kushdo mund ta marrë detyrën që synon”,- shkruan Rama. Ai sqaron, gjithashtu, se, “ky është një apel për çdo shqiptar të mirë e të zot pa dallim dhe në asnjë mënyrë një premtim për punë në shtet për të gjithë. Shpresa ime është që përmes këtij apeli të marrim mbrapsht shprehjen e interesit të kujtdo që beson se ka aftësitë e duhura, për të mbuluar pozicione e zbatuar detyra në skuadrën e re për Shqipërinë”. Por midis rreshtave, Rama: “Shumëkush mund të mos e mbërrijë menjëherë synimin. Por duke bërë aplikimin e vet secili bëhet pjesë e përpjekjes fisnike për ndërtimin e skuadrës së re që do t’i japë vendit një drejtim të ri”.
Aplikantët për punë
Në fund të thirrjes së tij, Rama vë në dukje se “kjo nismë e re, mundëson nisjen e krijimit të një baze të dhënash për burimet njerëzore të këtij vendi. E cila do të kthehet hap pas hapi, në një rezervuar on-line ku jo vetëm sektori publik po edhe ai privat, mund të kërkojnë vijimësisht njerëzit e duhur për nevoja pune të caktuara. Kjo bazë të dhënash do të bëhet e përdorshme nga qeveria qysh në shtator”, shprehet ai. Nga na tjetër, Rama thotë, se: “Përmes kësaj baze edhe çdo aplikant do të marrë vazhdimisht informacion, për konkurse që lidhen me formimin e vet apo për shumëçka tjetër që do të nevojitet t’ju mbajmë në kontakt”. Dhe më tej, kryesocialisti sqaron elementet teknike të aplikimit, për punësimin e secilit. Dhe për këtë ai thotë: “Më poshtë keni në dispozicion një formë aplikimi ku përveç të dhënave tuaja bazë dëshirohet edhe shprehja e interesit, me një letër motivimi të kërkesës për kontributin që mendoni se mund të jepni në realizimin e projektit fitues të 23 Qershorit”, shkruan Rama. Dhe në fund të këtij komunikimi, kreu i selisë rozë shkruan në fjalinë e tij të fundit se synimi i tij është që të bëjë më të mirën. “Unë dua të bëj gjithnjë më të mirën që asnjë shqiptar i mirë dhe i zot të mos ndjehet jashtë loje në këtë vend. Pavarësisht se si ka votuar”, përfundon ai, ndërkohë që brenda një ore, ka pasur qindra reagime pozitive për iniciativën e ndërmarrë.
http://www.edirama.al/dergo_cv/
