Në kërkim të pistoletës që vrau Agim Bucin

265
Kur kanë kaluar 4 ditë nga ngjarja e rëndë në Kamëz, ku Vladimir Kurti në bashkëpunim me Rruzhdi Hodën, në tentativë për të grabitur një minimarket, vranë pronarin, ende policia nuk ka gjetur armën e krimit.
Blutë e Tiranës vunë në pranga pas ngjarjes autorët e vrasjes së Agimi Bucit dhe plagosjes së gruas së tij, por edhe pse treguar se ku e kanë hedhur armën krimit, policia nuk ka mundur ta gjejë dot.
“Edhe gjatë ditës së sotme kanë vijuar kërkimet në lumin e Tërkuzit tek ura e “Zgafnorit” në Njësinë Administrative Zallherr, për gjetjen e armës së krimit.
Polumbarët e repartit special “Renea”, prej mëngjesit të sotëm kanë rinisur kërkimet me mjete speciale, në vendin ku autori ka deklaruar se ka hedhur armën.”, thuhet në njoftimin e policisë.
Mbrëmjen e 25 Prillit Agim dhe Merita Buci, po bënin inventarin e dyqanit si çdo ditë tjetër, ndërsa në dyqan ishte edhe djali i tyre vetëm 6 vjeç.
Në dyqanin e tyre, u futën dy persona, njëri me pistoletë në dorë, ndërsa tjetri me thikë, ku përballjen e parë e patën e djalin e mitur.
Vladimir Kurti dhe Rruzhdi Hoda shkuan menjëherë te kasa për të marrë lekët, por britmat e djalit të mitur bënë që prindërit e tij, që ishin në një dhomë pak më tutje, të futeshin menjëherë në dyqan.
Në përleshje e sipër, Kurti qëlloi me armë Agim Bucin, duke e lënë të vdekur, si dhe plagosi gruan e tij.
Një ditë pas krimit, policia e ndihmuar edhe nga pamjet filmike brenda dyqanit, arritën që të identifikonin autorët dhe të bënin arrestimin e tyre.
Por, pas arrestimit, blutë e Tiranës po kërkojnë edhe armën e krimit, çka është një provë e rëndësishme në gjyqin që do të zhvillohet ndaj tyre.