Paparaci/ Ismail xhaferri: Vështirë te gjesh një vend si yni

197
Sigal

 

Vështirë të gjesh një vend si yni

Me dete dhe plot me pasuri

E prapë shumica e popullatës

Serish jeton në varfëri.

Vështirë të gjesh një vend si yni

Ku gati na ka rënë në lumë

Ku sa më lart shkon minifundi

Aq më shumë shanse ke për punë.

Vështirë të gjesh një vend si yni

Çudirat s’kam si t’i rrëfej

Nga njëra anë miliarderë

Nga ana tjetër kam fukarenj.

Vështirë të gjesh një vend si yni

Ku ligji është leku dhe miku

Ku një diplomë universiteti

Nuk vlen as sa një gjethe fiku.

Vështirë të gjesh një vend si yni

Me demokratë dhe socialistë

Ku shumë juristë janë taksixhinj

Dhe taksixhinjtë punojnë juristë.

Vështirë të gjesh një vend si yni

Vështirë të gjesh një parlament

Ku deputeti shan kolegun

Me nënë e motër e ç’të ketë.

Vështirë të gjesh një vend si yni

Si ky Atdheu ynë i shtrenjtë

Mjaftojnë shumë lekë e një kostum

Dhe mund të bëhesh deputet.

Vështirë të gjesh një vend si yni

Ku qeveritë të bëjnë zap

Ta kesh atdheun kazan plehrash

Dhe plehra do të na sjellin prapë.

Vështirë të gjesh një vend si yni

Polici është si një punëtor

Dhe zbret në ara që pagdhirë

Të presë hashashin me kosore.

Vështirë të gjesh një vend si yni

Ku policisë i bëjnë zbor

Polici s’mban në brez koburen

Po mban kosoren për të korrë.

Vështirë të gjesh një vend si yni

Për vlerat s’duan që t’ia dinë

Ku dhjetëra intelektualë

Punojnë punëtorë në ndërtim.

Vështirë të gjesh një vend si yni

Ku fukarai ka rënë përmbys

Edhe dashnorja e ministrit

Shkon i blen brekët në Paris.

Vështirë të gjesh një vend si yni

Ku s’bën asgjë, po nuk u dhe lekët

Dhe gjithë programet e partive

Janë Shukuriu edhe brekët.

Vështirë të gjesh një vend si yni

Me brenga dhe halle të rënda

Ku truri i kombit ikën jashtë

Dhe plehrat bota na sjell brenda….