Java e 31-një e Kategorisë Superiore, i zhvilloi ndeshjet e saj në dy ditë, duke mos sjellë asgjë të re në klasifikim.Tashmë, shumë gjëra thuajse janë të qarta përsa i përket kryesueses, që është Tirana, edhe pse matematika kërkon të thotë se duhet pritur të paktën dhe dy javë të tjera, që kampionati të nisë festën e bardheblu-ve për fitimin e titullit kampion për herë të 26 –të. Po kështu me siguri e themi, se dy skuadrat që i japin “lamtumirën”, Kategorisë Superiore, tashmë dihen që janë, “Flamurtari” dhe “Luftëtari”. Mbeten për t’u zgjidhur vetëm grupi skuadrave që do sigurojnë pjesëmarrjen në “Europa –League” , ku gara është me “Kukësin” , “Laçin” , “Teutën” , “Partizanin” dhe “Skënderbeun”, ndërkohë, “Bylis”-i shpreson si ta bëjë këtë gjë nëpërmjet Kupës, si gjysëm finalist që është, së bashku me “Tiranën”, “Kukësin” dhe “Teutën”, sepse kampionati tashmë i ka ikur për duarsh, në këto ndeshjet post Covid -19. Por aspak komode nuk ndihet “Vllaznia”, që me pikët që ka në klasifikim, sepse është prej disa javëve kampionat, pjesë e zonës “Play-Out”. Kështu, pra, me pesë javët e mbetura kampionat dhe gjysëfinalet dhe finalet e Kupës, kjo Kategori e quajtur Superiore, pritet që deri në 2 gusht 2020-të ta quajë të mbyllur sezonin futbollistik 2019-2020.
Pothuajse pak a shumë gjërat janë përcaktuar dhe në Kategorinë e Parë, ku “Kastrioti” i sigurt dhe “Apollonia” e mundshme, janë dy skuadrat që do të rikthehen në “sofrën” e më të mirëve të futbollit shqiptar. “Kastrioti” rikthehet kështu pas një sezoni në Superiore, kurse “Apollonia” ka pritur plot pesë sezone të tillë për të bërë rikthimin e saj. Për zbritjen në Kategorinë e Dytë, duket se “Dinamo”, “Tërbuni” dhe “Veleçiku”, në grupin A, si dhe “Shkumbini”, përjashtuar tashmë dhe “Shënkolli”, janë pranë kalimit një shkallë më poshtë. Natyrshëm që vendin e tyre priten ta zenë ekipet e tjera si, “Tomorri” , “Albpetroli” , “Vora”, apo “Luzi -2008”. Ndërkohë kampionatet e moshave, janë në fazën e ndeshjeve finale, ashtu siç mund të themi dhe për Kategorinë e Tretë dhe kampionatin e futbollit të femrave. Kështu Shqipëria, ndoshta ndryshe nga shumë të tjerë, siç duket do ia dalë të zhvillojë dhe përfundojë sezonin futbollistik, kurse për sportet e tjera, po vërtetohet ajo çka prashikuam shumë ditë më pare në gazetën “Telegraf”, kur është shprehur se:“Për futbollin, do të ketë protokoll sanitar, kurse për basketbollin dhe volejbollin jo.” Gjithësesi, përtej kësaj panorame sportive, ajo çka tërhoqi vëmendjen më shumë në këtë javë të garës sportive në Kategorinë Superiore, ishte ndeshja “Flamurtari” – “Luftëtari” e zhvilluar në Vlorë. Në fakt, nuk ishte ndonjë ndeshje e veçantë, ku do përcaktohej diçka, sepse të dyja skuadrat e kanë marrë “shpërblimin” e tyre nga ky sezon, ku kanë siguruar rënien në Kategorinë e Parë, as se kjo ndeshje do ngjasonte sado pak me ato ndeshje përpara shumë viteve, të vlerësuara si “Derbi Jugut”, ku vetëm emrat që kishin në përbërje skuadrat të impononin respekt.
Jo asnjëra dhe as tjetra, nuk kanë fare lidhje me temën që po trajtojmë. Gjithçka ka të bëjë me tkurrjen dhe zvogëlimin e gjeografisë të futbollit shqiptar me rënien nga Kategoria Superiore të “Flamurtarit” dhe “Luftëtarit”. Le të themi që në fillim, se në këtë ndeshje “Flamurtari” fitoi si asnjëherë tjerër këtë kampionat me rezultatin 6-1, duke harruar të tregojë se kjo është vetëm fitorja e dytë e tij këtë sezoni, pas 21 humbjeve dhe 8 barazimeve. Një fitore kjo, që vinte pas 9 javëve, sepse një e tillë por jo kaq shumë gola është marrë në ndeshjen e javës 22- të, ndaj “Luftëtarit” në Gjirokastër me rezultatin 0-1. Pra, në fitoren e parë “Flamurtari” ka pritur plot 1890 minuta për të shijuar fitoren e parë, kurse tani 810 minuta për të gjetur fitoren e dytë. Dhe si kundërshtar për ta mundur kishte zgjedhur “Luftëtarin”. Dhe pas kësaj ndeshje të dyja skuadrat tashmë kanë nga 14 pikë në klasifikim, sepse nga 21 humbjet që kanë pësuar deri tani iu kanë rezervuar dy vendet e fundit. Ndryshimi vogël qëndroi vetëm tek golat e pësuar ku gjiroakstritët kanë shifrën e 74 golave të pësuar, kurse vlonjatët të 61 golave të pësur. Kaq, dhe asgjë më shumë, sepse në fushën e lojës, edhe pse kjo ndeshje prodhoi gola me bollëk, nuk ishte asgjë më tepër se sa një ndeshje për amatorët e “U-16”.
Përfundimi tashmë është shumë qartë: “Flamurtari” për herë të tretë në historinë e tij 97- vjeçare, bie nga Kategoria, kur më parë e ka provuar këtë gjë në sezonin 1949, dhe 2003 -2004 , kurse “Luftëtari”, pas 4 sezoneve në Superiore, rikthehet tek futbolli inferior. Në pamje të parë nuk ka asgjë të keqe që pritet të ndodhë kështu, sepse këtë rënie e kanë provuar dhe “Partizani”, “Tirana” , “Vllaznia” dhe thuajse të gjithë, sepse e tillë është dhe formula e zhvillimit të garës, por shqetësimi ka të bëjë me gjeografinë e futbollit në Shqipëri, që duhet pranuar se në këto vitet e fundit është dëmtuar dhe shtrembruar shumë. Ja, shikoni me kujdes, hartën futbollistike të sezonit të ardhshëm 2020-2021, ku mbetën jashtë qytete me shumë traditë në futbollin shqiptar si, Vlora, Gjirokastra, Berati, Lushnja, Kavaja, Elbasani, Lezha, si dhe skuadra të tilla si, “Dinamo” dhe “Naftëtari” , ku midis tyre gjen trofe të fitura në Superiore, ku midis tyre gjen emra të futbollistëve që i kanë dhënë vlera ekipive tona kombëtare, por ka nga ata që kanë lënë gjurmë dhe në Kupat e Europës. E thënë më qartë me këto rënie të këtij lloji, këto skuadra, hedhin poshtë në një farë mënyre, vlerat e kontributet e atyre futbollistëve që e dashuruan dhe ushtruan futbollin, falë dashurisë për fanellën e skuadrës tyre. Dhe këtë gjë nuk do t’ja falte askujt në Vlorë, si- Mexhit Haxhiu dhe Kreshnik Çipi, në Gjirokastër, Sefedein Braho dhe Dhori Kalluci, në Lushnje Taq Gogoni dhe Artan Bano, në Berat, Përparim Kovaçi dhe vëllezërit Arbëri, në Elbasan, Mihal Gjika dhe Fred Lleshi, në Kavajë, Muharrem Karriqi dhe Dash Bajaziti, në Lezhë, Nikolin Lorenci dhe Bledar Kola. Tek “Dinamo”, përtej emrave legjendë janë 17 Titujt Kampion dhe 15 Kupat e fituara në Superiore që nuk e falin një gjë të tillë, sikundër dhe tek “Naftëtari” emrat e Bashkim Sulejmanit dhe Vladimir Skuros. Faktet kanë treguar me “Dinamon” , “Elbasanin” , “Besën” , “Besëlidhjen”, “Tomorrin”, dhe të tjerë, se rrëshqitja një kategori më poshtë, shoqërohet me vuajtje dhe mundime të mëdha për t’u kthyer sërish tek më të mirët. “Tirana” dhe “Vllaznia” që provuan këtë gjë më parë, u rikthyen shpejt, sepse morën masa dhe ndihen që kishin gabuar, kurse me “Lufëtarin” dhe “Flamurtarin” gjërat janë pak më ndryshe, sepse e kërkojnë gabimin tek të tjerët shumë vite më përpara. Por një tjetër fenomen, ku në Vlorë është më i prekshëm, ka të bëjë me atë se sa besojnë “në ndryshimin e formatit dhe formulës të zhvillimit të kampionatit në sezonin e ardhshëm” Dhe këtë e thonë hapur dhe drejtuesit e “Flamurtarit”, të cilët për të justifikuar dështimin e tyre në drejtim të klubit, hedhin për konsum ide të tilla, ashtu siç kanë bërë dhe bëjnë dhe me çështjen e privatizimit të klubit të futbollit. Në fakt idea e ndryshimit të formatit dhe formulës të Kategorisë Superiopre është një kërkesë aktuale, jo vetëm që jemi i vetmi vend në Ballkan, që zhvillojmë një kampionat futbolli me vetëm 10 skuadra, por vetë cilësia lë shumë për të dëshiruar. Edhe pse presidenti Duka, më parë është shprehur se “rregullat e garës vendosen në fillim të sezonit”, përsëri gjeografia e cunguar dhe e Kategorisë Superiore, e kërkon një gjë të tillë. Dhe kjo nuk duhet bërë se duan drejtuesit e “Flamurtarit” apo “Luftëtarit”, por sepse e kërkon niveli aktual i futbollit tonë, e kërkojnë vlerat pozitive që kanë krijuar brezat në vite dhe dekada. Çdo qëndrim ndryshe, do jetë i vështirë për t’u korigjuar në të ardhmen .