KATEGORIA E PARË/ Mbyllet faza e dytë, trajneri i Vorës, Klodian Arbri tregon synimin e vorakëve
Nga Agron Kaja
“Do jetë një garë e gjatë me 36 pikë brenda saj, dhe për këtë matematika na mban në lojën e synimit tonë. Kalendari i fazës së tretë duket sikur i favorizon skuadrat e kreut të renditjes, por kujdesi ynë do të jetë maksimal me të gjitha skuadrat”
Telegraf.al / Me një sfidë titulli kampion, dje Kategoria e Parë e mbylli javën e 22-të (njëherësh edhe fazën e dytë). Në Ballsh u përballën dy skuadrat kryesuese, Bylisi me AF Elbasanin, në një ndeshje ku rastet për shënim nuk ju munguan të dyja skuadrave. Por të dyja mbetën të kënaqur me 0-0, çka e lë të hapur luftën në 11 ndeshjet e fazës së tretë. Dhe kjo sfidë e formatoi plotësisht renditjen, sepse faza e tretë do të luhet sipas skemës të miratuar nga FSHF-ja. Një ndër skuadrat që i bëri mbyllje pozitive dy fazave të para është edhe Vora, e cila në vendin e tretë e mendon se nga Play-off-i do të ngjitet në Superiore. Kështu deklaron për “Telegraf” edhe trajneri Klodian Arbri, i cili e thekson se me kushtet dhe organizimin profesional, Vora e meriton të jetë në elitën e futbollit shqiptar. “Faza e dytë për ne u mbyll me rezultat pozitiv, por në synimet tona ishte që skuadra të kishte më shumë pikë dhe me renditje më të lartë. Gjithsesi, ne do bëjmë punën tonë deri në fund të kampionatit, dhe këtë e mendojmë një rrugëtim ku vlerat e skuadrës sonë do të dalin më shumë në dukje”, kështu e nisi bisedën tekniku beratas i Vorës, i cili fazën e tretë e analizon jo vetëm nga matematika e pikëve, por edhe pse Play-off-i për ngjitje në Superiore do të jetë shumë i fortë. “Me këto rezultate që ne arritëm në dy fazat e para, themi se e kemi shtruar rrugën për ngjitje në Abissnet Superiore. Natyrisht që ne do luftojmë me maksimumin tonë që të kemi renditje më të lartë, pse jo, të synojmë realisht ngjitjen direkte në elitën e futbollit shqiptar. Do jetë një garë e gjatë me 36 pikë brenda saj, dhe për këtë matematika na mban në lojën e synimit tonë. Kalendari i fazës së tretë duket sikur i favorizon skuadrat e kreut të renditjes, por kujdesi ynë do të jetë maksimal me të gjitha skuadrat, sepse të gjitha në këtë fazë kanë synime finale”. Ndërkohë, duke qënë se për këtë sezon Klodian Arbri ka drejtuar edhe skuadrën e Tomorit, ai shprehu keqardhje për situatën ku ndodhet skuadra beratase. “Unë jam beratas dhe i detyrohem shumë futbollit të Tomorrit, sepse këtu “Dinastia” Arbri e nisi këtë rrugëtim të bukur në futbollin shqiptar. Por situata e Tomorrit në fundin e tabelës së renditjes është e trishtueshme. Duhet një “shkop magjik” dhe fat, që skuadra të mbijetojë në Kategorinë e Parë. Të luftojnë dhe mos t’i humbin shpresat”, ishte kjo biseda me Klodian Arbrin, trajnerin e skuadrës së Vorës.
VLERËSIME PËR LEGJIONARËT
Manaj goleador i përjavshëm, ngjitet në renditje
Në minutën e 69-të të përballjes me Pendikspor, sulmuesi shqiptar Rei Manaj shënoi golin e tretë të fitores të Sivasporit ndaj kësaj skuadre, por edhe të 14-in të tij në 27 javët e Superligës turke. Tashmë ai është barazuar me Mauro Ikradin e Gllatasarajt dhe Mame Thiam të Pendiksporit, ndërsa mbetet 4 gola larg kryegolashënuesit Edin Xheko të Fenerbahçesë. Ndërkohë që, veç golave të shënuar në kampionat, Manaj ka shënuar edhe katër gola në Kupë, ndërsa për këtë ndeshje, portali i statistikave sportive “Sofascore” e ka vlerësuar me notën 7.5. Me këtë formë të shkëlqyer dhe me Armando Brojën në “hije”, Manaj pritet të jetë si alternativë e parë e sulmit kuqezi për Europianin “Gjermani 2024”.
Në ndeshjen e tretë, Muçi gjen rrjetën e parë
Një gol shumë i bukur nga jashtë zonës i shënuar nga sulmuesi kuqezi Ernest Muçi, është i pari për të në kampionatin turk pas transferimit të tij nga Legia e Varshavës në merkaton e janarit. Në përballjen me Instambulspor AS që renditet në vendin e fundit pas 27 javëve të luajtura në Superligën e Turqisë, në minutën e 54-t Muçi ka gjetur golin duke shkarkuar të djathtën e tij. Ai luajti 90 minuta dhe në fundin e takimit u shpall edhe lojtari më i mirë i ndeshjes, e cila ishte e treta për Muçin me skuadrën e Beshiktashit, që nga transferimi i tij pak javë më parë. Ndërsa nga portal i statistikave “Sofascore”, ai është vlerësuar me notën 8.2. Kështu, Muçi po konfirmon formën e tij të mirë para sfidave të “Euro 2024”.
KATEGORIA E PARË
REZULTATET, JAVA 22
Të shtunën, 24 shkurt 2024
Vora-Apolonia 1-0
Të dielën, 25 shkurt 2024
Korabi-Lushnja 1-0
Kastrioti-Besa 3-1
Luzi 2008-Burreli 2-0
Tomori-Flamurtari 1-4
Të hënën, 26 shkurt 2024
Bylis-AF Elbasani 0-0
RENDITJA
Skuadrat Nd Pikë
1.Bylis 22 52
2.AF Elbasani 22 50
3.Vora 22 42
4.Flamurtari 22 42
5.Apolonia 22 31
6.Korabi 22 29
7.Lushnja 22 26
8.Burreli 22 22
9.Kastrioti 22 23
10.Besa 22 19
11.Luzi 2008 22 15
12.Tomori 22 14
FAZA E TRETË
NDESHJET, JAVA 23
E shtunë, 2 mars 2024
Vora-Besa 13:30
Bylis-Tomori 13:30
Flamurtari-Kastrioti 13:30
Apolonia-Burreli 13:30
Korabi-Lushnja 13:30
AF Elbasani-Luzi 2008 13:30
