EULEX, angazhim për zbardhjen e rasteve të personave të pagjetur: Proces me rëndësi

558
Ndërsa Kosova shënon Ditën Kombëtare të Personave të Pagjetur, misioni i EULEX-it shprehu përkushtim për ta vazhduar rrugëtimin drejt zbardhjes se vendndodhjes së personave të pagjetur në Kosovë.
Shefja e këtij misioni, Alexandra Papadopoulo u bëri thirrje si shqiptarëve, ashtu edhe serbëve, që të paraqiten për të dhënë mostrat e gjakut për analizën e ADN-së.
“Është një realitet që të copëton shpirtin kur nuk e di vendndodhjen e ndonjë të dashuri. Në angazhimin e tij me vendosmëri për të ndihmuar në zgjidhjen e çështjes së të pagjeturve, EULEX-i u bën thirrje komuniteteve shqiptare dhe serbe që të paraqiten për t’i dhënë mostrat e gjakut për analizën e ADN-së në mënyrë që të lehtësohet ky proces i rëndësishëm”, tha Shefja e Misionit EULEX, Alexandra Papadopoulou.
Deri më sot, rreth 1650 persona vazhdojnë të jenë të pagjetur, ndërsa është me rëndësi që puna për të gjetur përgjigje ndaj fatit të tyre të vazhdojë pa pushim. Kjo mund të arrihet vetëm me bashkëpunimin e të gjitha palëve përkatëse dhe me një nivel të lartë të ekspertizës.
Kjo duhet të mbetet një prioritet i lartë për autoritetet e Kosovës, veçanërisht në një kohë kur ata po përgatiten që të marrin përsipër funksione tejet të rëndësishme të sundimit të ligjit nga EULEX-i, duke e përfshirë edhe fushën e Institutit të Mjekësisë Ligjore.
“Familjet kanë nevojë që ta përmbyllin të kaluarën e tyre të dhimbshme dhe humbjet tragjike që kanë pësuar. Kjo është mënyra e vetme për të ecur përpara”, tha Papadopoulou.
Që nga viti 2008, EULEX-i ka kryer 594 operacione në terren me qëllim identifikimin dhe rilidhjen e mbetjeve njerëzore. 506 viktima u janë kthyer familjeve të tyre.
Sigal