INTERVISTA/ Flet për “Telegraf” ish-futbollisti dhe ish-trajneri i Dinamos, Eduard Zhupa
Agron Kaja
“Derbi” luhet mes historisë e realitetit të të dyja skuadrave. Është ndeshja kryesore e kësaj jave, sepse janë dy skuadra me emër. Tirana është më në avantazh psikologjik, ndërsa Dinamo synon ta bëjë edhe më tërheqëse këtë sfidë.”
/Telegraf.al/ Nesër mbyllet hapësira pa ndeshje zyrtare, si e përshkruani ritmin e punëve nga skuadrat e Superiores?
Kjo hapësirë pa ndeshje zyrtare është një pjesë e periudhës përgatitore, e cila shërben edhe për rregullime fizike dhe merkato. Me prurjet e reja do të shikohet gjëndja fizike e lojtarëve dhe bëhen konfigurimet e formacioneve për skuadrat.
Nga kreu-në fundin e tabelës, e vlerësoni të merituar renditjen e skuadrave?
Për momentin, unë mendoj se renditja aktuale është e merituar, sepse 18 javë janë normale për të parë gjëndjen e ekipeve. Në përgjithësi kishte edhe dyshime për rezultatet, por ka pasur edhe surpriza të cilat kanë kompletuar situatën e skuadrave.
Gjatë 18 javëve të luajtura kishte largime të trajnerëve në shtatë skuadra, çfarë efekte ka ky tregues?
Kjo është bërë si e modës në futbollin shqiptar me largimin e trajnerëve. Mendoj se ka të bëjë me mentalitetin e drejtuesve të klubeve. Ata duhet të kenë respekt për trajnerin si instiutucion, sepse në pak javë ata nuk mund të kenë shkop magjik.
Stërvitje dhe merkato me hyrje e dalje, cilën skuadër e veçoni si më aktive në këtë periudhë?
Ndryshe nga vitet e shkuara, këtë vit shikoj se në periudhën e dimrit nuk ka aq shumë largime, kryesisht te skuadrat kryesore. Kjo ndoshta është një gjë pozitive, edhe për faktin se në merkaton e dimrit nuk mund të gjesh kualitete.
Cilën skuadër mendoni se i duhet më shumë Merkato gjatë muajit janar?
Në periudhën e merkatos skuadrat duhet të organiziohen sipas objektivave fillestare të tyre. Ato që kërkojnë titullin kampion gjatë janarit janë treguar më të kujdesshme në Merkato, kryesisht Partizani. Të tjerat me çfarë ti dalë në treg.
Kampionati nis sot me “derbin” e kryeqytetit Dinamo City-Tirana, është kjo edhe kryendeshja e kësaj jave?
Mendoj se kjo do jetë ndeshja kryesore e kësaj jave. Sepse janë dy skuadra me emër, por aktualisht Tirana është më në avantazh psikologjik. Ndërsa Dinamo City po vjen atje ku synon dhe kjo situatë do ta bëjë edhe më tërheqëse këtë sfidë.
Ju keni luajtur në ndeshje “Derbi” të kryeqytetit, si e parashikoni këtë sfidë hapëse të javës së 19-të?
“Derbi” është gjithmonë 50 me 50, por zakonisht e fiton ajo skuadër që ka më shumë kualitete dhe përvojë në ndeshje të tilla. Unë i qëndroj mendimit se ky “derbi” është i barabartë, edhe për faktin se skuadrat vijnë pas pushimit mujor.
Një parashikim juaji për katër skuadrat e “Final 4” cili është?
Ndoshta është shpejt për të thënë se cilat do jenë 4 skuadrat për “Final 4”, sepse kanë ngjeshje në tabelën e renditjes. Por besoj se për katër vëndet e para do të jenë në lojë 6-7 skuadra.
BILANCI
Dinamo City-Tirana
Ndeshje 144
Fitore Dinamo 49
Barazime 36
Fitore Tirana 59
Golat 184:216
Ndeshja e parë
Viti 1950
Tirana-Dinamo 0-1
Ndeshja e fundit
28 tetor 2023
Dinamo City-Tirana 1-1
ABISSNET SUPERIORE
NDESHJET, JAVA 19
E premte, 12 janar 2024
Dinamo City-Tirana 17:00
E shtunë, 13 janar 2024
Egnatia-Skënderbeu 13:30
Partizani-Teuta 17:00
E dielë, 14 janar 2024
Laçi-Erzeni 13:30
Vllaznia-Kukësi 17:00
RENDITJA
Skuadrat Nd Pikë
1.Egnatia 18 37
2.Partizani 18 32
3.Tirana 18 26
4.Vllaznia 18 26
5.Dinamo City 18 22
6.Skënderbeu 18 22
7.Laçi 18 21
8.Erzeni 18 21
9.Kukësi 18 19
10.Teuta 18 16
LËVIZJET
Dinamo më aktive në Merkato, Tirana e bllokuar
DINAMO
Afrime: Jorgo Meksi, Mori Bamba, Stivian Janku, Kilian Çuni
Largime: Amarildo Gjoni, Ali Samake, Indrit Prodani
TIRANA
Largime: Florent Hasani, Ardit Hila
Afrime: Janë të bllokuara
Në Merkaton e janarit 2024, nisur nga lëvizjet që kanë bërë dy skuadrat e “Derbit” të sotëm, Dinamo City-Tirana, dinamovitët janë treguar më aktivë nga bardheblutë. Jo vetëm për situatën aktuale që kanë këto dy skuadra në tabelën e renditjes, por edhe për synimet që ato kanë për këtë sezon, lëvizjet e kësaj merkatoje dimërore janë bërë si detyrim. Dukuria e parë e merkatos është se Tirana ka vetëm dy largime dhe pa asnjë afrim të ri, sepse bardheblutë janë të bllokuar pasi kanë për të shlyer detyrimet financiare për Tim Vairinen, Edon Hasanin, Asion Dajën dhe Orges Shehin. Ndërsa Dinamo City më shumë ka menduar për afrime, ku pesë futbollistë të rinj do të luajnë për këtë skuadër, ndërkohë që tre të larguarit thuajse e bëjnë të papërfillshme situatën e skuadrës në vazhdimësi.
