Nga Agron KAJA
ATMOSFERË/ Në Shkodër, ende nuk i besojnë rënies së skuadrës së tyre nga Superiorja, edhe ish-futbollisti e trajneri është në këto ujëra
Edhe dje, 24 orë pas rënies së Vllaznisë në Kategorinë e Parë, ish-futbollisti dhe trajneri i Vllaznisë, Edi Martini, nuk e kishte kaluar dëshpërimin e kësaj situate. “Po e përjetoj shumë keq, si çdo shkodran, sepse për të gjithë ne, kjo është e pabesueshme ende. Një ndëshkim që Vllaznia nuk e meritonte”, kështu theksoi dje për gazetën “Telegraf” Edi Martini, i cili më pas këtë e quajti fryt të punës disa vjeçare. “Çfarë kanë mbjellë në vitet e fundit, atë e korrën këtë sezon. E mërkura do të shënohet si një ditë e zezë për futbollin shkodran, sepse Vllaznia ka rreth 7 sezone që ishte kthyer në ekip partiak. Ata që e drejtuan skuadrën, asnjëherë nuk e kanë ditur, mandej nuk e kanë ndjerë peshën e fanellës së Vllaznisë. Kështu si erdhi, më mirë një fund me dhimbje, se sa një dhimbje pa fund”, vazhdoi më tej Martini, i cili këtë situatë e krahason me një lagje të Shkodrës, që mund ta shpëtonte nga kjo rënie në Kategorinë e Parë. Ndërkohë, ish-futbollisti e trajneri i Vllaznisë, këtë situatë ja faturon edhe keqmenaxhimit që i është bërë Vllaznisë në 7 vitet e fundit. “Po, po, për 7 vite me radhë, që nga java e parë dhe deri tek e fundit, Vllaznia ka vuajtur nga keqmenaxhimi dhe abuzimi. Kjo ndodhi që në momentin që Vllazninë e mori në dorë Bashkia, të cilët e trajtuan si një xhaketë në krahët e tyre. Vllaznia duhet të ngrihet në këmbë, jo si një ekip për mëshirë, sepse në Shkodër futbolli është një fe më vete. Duhen njerëz që kanë potenciale financiare, por edhe dëshirën e mirë për ta ringritur këtë skuadër të madhe, 9 herë Kampione e Shqipërisë”, kështu e mbylli deklarimin e tij Edi Martini, duke e quajtur rënien e Vllaznisë në Kategorinë e Parë, si keqmenaxhim që kërkon edhe një ndjenjë të thellë përgjegjësie. Ndërkohë, Rregullorja e FSHF-së penalizon tashmë edhe skuadrën e Vllaznisë B, e cila zbret në Kategorinë e Dytë, pasi janë ekipe të të njëjtit klub futbolli, dhe nuk mund të luajnë në të njëjtën kategori.
Vllaznia zbriti për herë të tretë në Kategorinë e Parë. Më parë, kur Superiorja quhej Kategoria e Parë, Vllaznia ka luajtur në Kategorinë e Dytë në vitet 1956 dhe 1961. Ndërsa këtë herë, zbriti në Kategorinë e Parë nga Kategoria Superiore 2017-2018
Rezultatet-Java e 36-të
E mërkurë, 23 maj 2018
Laçi-Teuta 4-2
Lushnja-Luftëtari 1-2
Skënderbeu-Vllaznia 1-5
Kukësi-Flamurtari 2-2
Partizani-Kamza 0-1
RENDITJA
Skuadrat Nd P
- Skënderbeu 36 72
- Kukësi 36 62
- Luftëtari 36 59
- Laçi 36 56
- Partizani 36 53
- Flamurtari 36 46
- Kamza 36 46
- Teuta 36 46
- Vllaznia 36 44
- Lushnja 36 11
