Të ndërtosh një univeristet

652
Sigal

Prof. Dr Anastas Angjeli, President nderi i UMSH

Ndryshimi nis nga idetë, zhvillimi nga institucionet e ideve dhe e ardhmja takohet kur di të shkosh tek ajo falë ideve. Gjithçka tjetër mund të kisha bërë në jetën time dhe e kam bërë duke u përpjekur të jap kontributin tim, por siç thotë populli ynë “Mirë është të bësh atë që mund të bësh më mire” dhe, zgjedhja ime ishte të kontribuoja në ndërtimin e mendimit, investimi më fisnik dhe më me vlerë që ka ekzistuar që nga antikiteti.

Ndaj 10 vite më parë, falë kësaj ndjenje, mendova që bashkë me të tjerë që e kishin lidhur jetën dhe aktivitetin me mësimin dhe auditorin, të ndërtoja një shkollë të lartë universitare. Nuk ishte e lehtë, por edhe e pamundur nuk ishte. NE IA DOLËM! 10 vjet mund të përkthehen në ditë muaj dhe vite, në punë këmbëngulje dhe vështirësi, në arritje dhe sfida, por unë do të preferoja që të qasesha disi ndryshe në këtë datë jubilare.

E gjithë kjo ndërmarrje ishte një provë besimi. Duhej që të rinjtë të na besonin, prindërit e tyre të na besonin, institucionet dhe shoqëria, faktorë relevant brenda dhe jashtë Shqipërisë të na besonin. E pra kjo nismë, siç e theksova, nuk ishte e lehtë. Një sërë sfidash kishim përpara. Ndaj e nisëm punën me moton. ”Ndërtojmë të Ardhmen”. Nuk ishte thjesht aspekt administrativ dhe etik, këto mund të zgjidhen, duhej besueshmëria në auditor, kush do hynte dhe çfarë do transmetonte…Ndaj 10 vjet jetë mund të mendohet si një shifër që relativizohet nëse ata që përzgjodhëm dhe na u bashkuan kishin në historinë e tyre vite e dekada eksperiencë. Të tillë morëm dhe ata më besuan. Hap pas hapi eksperienca e re lindi, u konsolidua dhe bashkë me të arritjet. Diplomimi brezit të parë qe një ngjarje që na dha besim dhe kurajë që të vazhdonim. Ndaj në një dekadë arritëm të krijojmë profilin në tregun e mësimit dhe edukimit universitar, por edhe në atë të punësimit. Ja pse 10 vite zgjerohen në hapësirë dhe në kohën ,sepse tani ata që kanë kryer studimet janë kudo nëpër Shqipëri dhe jashtë saj me punë dhe me studime të mëtejshme.

Koha ikën ajo nuk të pret. I suksesshëm është ai individ apo ai institucion që e sjell të ardhmen dhe nuk e pret atë në mënyrë pasive. Ndaj kështu u udhë-rrëfyem edhe ne. Çdo arritje e konsideruam një përvojë që I takon një të kaluare me vlera e cila duhej konsoliduar, pyetjet ishin me provokuese. Ku shkojmë jemi të qartë. Kemi objektiva, dimë si shkohet, ka model që duhet marrë, jemi vetëm në këtë aventurë apo duhet të kemi pika referimi, cilët janë partnerët brenda dhe jashtë vendit me të cilët do duhej të bashkëpunonim. Pra me një fjalë…Të ishim drejt-orientuar.

Në një botë të tillë globale ku çështja themelore në arsimin e larte nuk është thjesht mësimdhënia apo kushtet e infrastrukturës mësimore, cilësia apo kërkimi…pa anashkaluar këtu element si struktura bazë, ka disa dekada që arsimi i larte është përballë sfidash në tregun e mendimit që prodhohet dhe paguhet në forma të reja të organizimit larg dhe jashtë strukturave tradicionale. Ndaj ne u kujdesëm që të lidheshim dhe bashkëpunonim me ata që kishin më shumë ritëm se ne, më shumë lidhje dhe më shumë mundësi të kuptimin më të gjerë të kësaj fjale.

Në 10 vite ndërtuam partneritet brenda dhe jashtë vendit. Nëse në vitet e para më shumë morëm eksperiencë tani jemi ne ata qe japim eksperience. Ndërtimi kapaciteteve shkencore dhe teknokratike, kërkimore të mirëfillta dhe mësimore didaktike në auditor, janë asetet e UMSH-s. Lidhjet me disa universitete në fillim tashti janë të gjëra dhe intensive, çka pohon pa bujë por me fakte realitete dhe arritje që ne u rritëm dhe ditëm të jepnim eksperiencë dhe të merrnin gjithë po aq. Shumë aspirantë të rinj i përzgjodhëm dhe jo thjesht i zgjodhëm duke mbajtur kahen nga studimet në shkollat perëndimore. Kjo qasje na mbajti një me pulsin e shkollave më histori dhe sukses të gjithë pranuar. Modestisht mund të pohojmë se e krijuam këtë traditë që profesorët të kenë studiuar në Angli, Francë, Gjermani, Austri, Itali, Greqi, SHBA, por edhe në vende te tjera ballkanike që janë anëtare të BE-s.

Në këtë kuptim emri Mesdhetar nuk është një stilemë tregu publicitar, është identitet profili akademik dhe qasje e orientim i motivuar jetësor evropian. Ky investim inteligjent na çoi deri në anëtarësimin tonë në lidhjen më të gjerë institucionale e gjeografike të arsimit të lartë në IMUNI, EGRAS, etj. Atje sfida është e hapur, anëtarësimi nuk është thjesht regjistrim, prova është e përvitshme dhe sfida që të mbetesh është po e tillë.

UMSH është përfshirë në një veprimtari të gjerë kërkuese e shkencore, botuese, përmes zhvillimit të dhjetëra Konferencave shkencore ndërkombëtare dhe kombëtare, simpoziumeve, tryezave të debatit, si dhe publikimit të shume librave e monografive, mendimet dhe rekomandimet e të cilave, përtej vlerave teorike e shkencore, kanë dhënë, propozime konkrete për zgjidhjen e problematikave që ka nxjerre përpara tranzicioni i gjatë, demokratik dhe zhvillimet ekonomiko-sociale në vendin tonë.

UMSH ka ndërtuar një strategji zhvillimi, e lidhur ngushtë me projektet kombëtare dhe ndërkombëtare, kërkimin shkencor, si dhe me aktorët e tregut të punës. Ne synojmë ta zhvillojmë më tej këtë strategji nëpërmjet hapjes dhe bashkëpunimit me universitet e tjera, me qendrat e instituteve kërkimore-shkencore dhe me bizneset, për të përmirësuar kurrikulat drejt një qasjeje inovative drejt tregut të punës.

Në këtë kuadër, UMSH jo vetëm ka mirëpritur e vazhdon te mirëpresë partneritete mbi projekte të përbashkëta, lektorë të huaj të ftuar për të pasuruar programet dhe mësimdhënien dhe për të zgjeruar rrjetin e bashkëpunëtorëve, por njëkohësisht promovon mobilitetin e stafit akademik dhe studentëve nëpërmjet CEEPUS dhe Erasmus Mobility. Këto bashkëpunime, me UMSH si partner, por edhe shpeshherë si lider, UMSH ka marre pjesë në disa projekte të ndryshme si Erasmus, COST, Horizon 2020, IPA Cross Border, CEEPUS, ADRION INTERREG.

Sot UMSH zbaton 9 projekte të tilla, duke angazhuar me punë konkrete 70 anëtarë të stafit akademik, dhe rreth 200 studentë. Ndër to dua të veçoj projektin “Young toward Europe”, ku UMSH në rolin e liderit do të japë një kontribut të rëndësishëm për përfshirjen e rinisë shqiptare drejt Integrimit Evropian, por pa lënë pas bashkëpunimin konkret të UMSH me biznesin nëpërmjet zbatimit te Projektit Adrion Interreg duke ofruar zgjidhje të reja për përfshirjen e Industrisë zero pike katër dhe IPA CBC me fokus sipërmarrjen femërore. Këto arritje janë rezultat i iniciativës te strategjisë, por gjithashtu tregojnë dhe nivelin e dhe përkushtimin e stafit te UMSH.

Të qenit proaktiv në shoqëri shpesh nuk bëhet realitet duke realizuar gjëra të mëdha dhe të bujshme por edhe kur ndihmon sa dhe si mundesh kudo që të kërkohet ose ku mendon se edhe pa ta kërkuar mund ta japësh. Ndaj ne ndërtuam atë që në mënyrë metaforike mund ta quajmë “Universiteti pa mure” që do të thotë të hapur për këdo që vinte nga jashtë por edhe në të papenguar për të dal jashtë auditorëve kudo në të gjithë Shqipërinë.

Por, ne ndërtuam dhe një universitet për qytetarin; kjo fale modelit, që zgjodhëm për ndërtimin e një universiteti si organizatë jo fitimprurëse. Me këtë filozofi, kemi ndihmuar mbi 1500 familje në nevojë duke mundësuar studimet universitare për fëmijët e tyre. Kemi mbështetur me bursa mbi 3500 studentë, dhe do vazhdojmë të mbështesim idenë e një universiteti të orientuar drejt studentit që ka dëshirë të shkollohet, duke përshtatur tarifat rreth mundësive të çdo familje. Ndaj, jemi krenarë që kemi krijuar një institucion me fokus STUDENTIN-QYTETARIN!

Dhe në 10 vite u bëmë prezent me mendim dhe programe alternative në bashki dhe komuna, në komunitete në nevojë apo në qendra ekonomike apo të shërbimeve nga më të ndryshmet, në institucione juridike apo të sektorit ekonomik. Njerëzit vijnë tek mendimi por dhe mendimi shkon te njerëzit. Auditori mëson dhe formon profesionalisht, por edhe ai vetë provohet në realitetet e gjalla për zgjidhje problemesh dhe ndërtim zhvillmi të qëndrueshëm. Kjo falë një fryme të re bashkëpunimi student-profesor komunitet. Prandaj ne jemi bërë prezent në gjithë Shqipërinë dhe ndjehemi ende të detyruar të kryejmë edhe më shumë ne këtë drejtim.

Sot me zhvillimet marramendëse në teknologji e inovacion, drejt një revolucioni të ri industrial, ku bota e internetit, inovacionit, robotikës, po bëhen sunduese, përballja me to është e domosdoshme. Dhe shkolla, edukimi, duhet te luajnë një rol vendimtar në këtë drejtim.

Ne e kemi hedhur themelin në këta 10 vjet. Do të vazhdojmë udhën e nisur me vizionin dhe objektivin e qarte: “Të përgatisim qytetarin, të kulturuarin, ekspertin dhe teknokratin e shekullit të njëzetë e një, kontribues me vlera të spikatura për zhvillimin, shoqërinë dhe për vendin!

”I sigurt se ne do ti përballojmë këto sfida. GËZUAR 10-VJETORIN UMSH!

Somario

Ndaj ne ndërtuam atë që në mënyrë metaforike mund ta quajmë “Universiteti pa mure” që do të thotë të hapur për këdo që vinte nga jashtë por edhe në të papenguar për të dal jashtë auditorëve kudo në të gjithë Shqipërinë