Qyetarët keqpaguhen, ja kategoritë që pësojnë uljen e pagave në tremujorin e tretë
Paga mesatare në ekonomi ka shënuar ulje të lehtë për herë të parë që nga tremujori i tretë i vitit 2020, pasi kishte shfaqur një tendencë të pandalshme rritjeje që nga ajo periudhë.
INSTAT raportoi se paga mesatare mujore bruto për një të punësuar me pagë, gjatë tremujorit të tretë 2021 është 56.435 lekë, duke u ulur me 0.5% në krahasim me tremujorin e mëparshëm. Rënia është ndikuar nga ulja e pagave në sektorin e informacionit dhe komunikacionit (nga 88.3 mijë lekë në tremujorin e dytë 2021, në 85.2 mijë lekë në tremujorin e tretë 2021).
Ulje shënuan dhe pagat në sektorin e aktiviteteve financiare dhe të sigurimit, nga 120.6 mijë lekë në tremujorin e dytë 2021, në 108.6 mijë lekë në tremujorin e tretë 2021.Për aktivitetet e tjera pagat ishin pothuajse në të njëjtat nivele, në raport me tremujorin e mëparshëm.Megjithatë, në raport me tremujorin e tretë 2020, paga mesatare në ekonomi është rritur me 6,9 %.Punonjësit në banka dhe kompani sigurimi vijojnë të paguhen pothuajse sa dyfishi i mesatares kombëtare.Gjatë tremujorit të tretë 2021, paga mesatare mujore bruto për një të punësuar me pagë në sektorin e aktiviteteve financiare dhe të sigurimit është 92,5 % më e lartë sesa mesatarja në nivel kombëtar, ndërsa në grup-aktivitetin e Bujqësi, pyje dhe peshkim është 36,9 % më e ulët.
Krahasuar me të njëjtin tremujor të vitit të kaluar, gjatë tremujorit të tretë 2021 paga mesatare bruto për grupaktivitetin e Tregtisë; transportit; aktivitetet e akomodimit dhe shërbimit ushqimor, ka rritjen më të madhe prej 11,4 %, ndërsa rritjen më të vogël e ka aktiviteti i Ndërtimit prej 3,8 %.
Gjatë tremujorit të tretë 2021, paga mesatare mujore bruto, për një të punësuar në grup-profesionin e Manaxherëve është 70 % më e lartë sesa mesatarja në nivel kombëtar, ndërsa në grupin e Punëtorëve (Profesione elementare) është 37,8 % më e ulët.
Krahasuar me të njëjtin tremujor të vitit të kaluar, gjatë tremujorit të tretë 2021, paga për grup-profesionin e Punëtorëve (Profesione elementare) ka rritjen më të madhe prej 10,1 %, ndërsa për grup-profesionin e Forcave të Armatosura ka një rritje më të vogël, prej 1,9 %.
Shqipëria, e fundit në Europë për të ardhurat për frymë
Në vitin pandemik 2020, thellohet diferenca me rajonin
Shqipëria kishte të ardhurat më të ulëta për frymë edhe në vitin pandemik 2020, me vetëm 30% të mesatares së Bashkimit Europian dhe 39% të konsumit individual për frymë, duke treguar se familjet shqiptare kanë mirëqenien më të ulët në Europë.Të dhënat janë publikuar sot nga Eurostat. Treguesit matin Prodhimin e Brendshëm Bruto për banor dhe të ardhurat individuale për frymë, me metodën e barazisë së fuqisë blerëse, dhe çka i bën të ardhurat mes vendeve të krahasueshme.Që prej 2016-s, Prodhimi i Brendshëm Bruto për frymë ka mbetur në nivelin e 30% të mesatares europiane, duke mos bërë përpara në të ashtuquajturin proces të konvergjencës, që nënkupton që vendi ynë duhet të rritej më shpejt se mesatarja europiane, në mënyrë që të kapë sa më shpejt mesatares e BE-së.Përkundrazi, në 2020-n është thelluar edhe diferenca me shtetet e tjera të rajonit. Pas Shqipërisë renditet Bosnjë-Hercegovina, me 33% të mesatares europiane. Në vitin 2016, diferenca mes këtyre dy shteteve më të varfra të Europës ishte 1 pikë përqindje, ndërsa në 2020-n është thelluar në tre pikë përqindje.Maqedonia e Veriut e ka treguesin në 38% të mesatares europiane (nga 37% në 2016-n), Serbia 43% (nga 39% në 2016-n) dhe më i larti është në Mal të Zi, me 45% të mesatares europiane, ndonëse me rënie të ndjeshme nga viti i mëparshëm, kur rezultoi 50%. Të dhënat për Kosovën mungojnë.Edhe në treguesin tjetër, për konsumin individual për frymë, që mat mirëqenien familjare të familjeve, Shqipëria është sërish e fundit në Europë, me 39% të mesatares së BE-së, përkundrejt 42% në Bosnjë-Hercegovinë, 43% në Maqedoninë e Veriut, 51% për Serbinë dhe 59% për Malin e Zi.
Europa
Sipas Eurostat, në vitin 2020, Luksemburgu dhe Irlanda shënuan nivelin më të lartë të PBB-së për frymë të matur sipas barazisë së fuqisë blerëse në Bashkimin Europian, në 163% dhe 109% mbi mesataren e BE-së.
Të dhënat tregojnë dallime thelbësore midis shteteve anëtare të BE-së për sa i përket PBB-së për frymë, e përdorur për të matur aktivitetin ekonomik. Pas Luksemburgut dhe Irlandës, Danimarka (35% mbi mesataren e BE-së), Holanda (32% më lart), Austria (24% më lart), Suedia dhe Gjermania (të dyja 23% më lart) vijnë në krye të listës me një GDP për frymë. më shumë se 20% mbi mesataren.Në të kundërt, Bullgaria (45% nën mesataren e BE-së), Greqia (38% më poshtë), Kroacia (36% më poshtë), Sllovakia dhe Letonia (të dyja 30% më poshtë) regjistruan PBB-në më të ulët për frymë.Në vitin 2020, edhe nivelet e konsumit aktual individual (AIC) në BE treguan dallime të konsiderueshme. E përdorur si masë e matjes së mirëqenies materiale të familjeve, AIC për frymë e shprehur në standardet e barazisë së fuqisë blerëse (PPS) varionte nga 61% në 145% të mesatares së BE-së në të gjitha shtetet anëtare në vitin 2020.
Luksemburgu regjistroi nivelin më të lartë të AIC për frymë në BE me 45% mbi mesataren e BE-së, i ndjekur nga Gjermania (24% më lart), Danimarka (22% më lart), Holanda (17% më lart) dhe Austria (16% më lart) . Në vitin 2020, nëntë shtete anëtare regjistruan AIC për frymë mbi mesataren e BE-së.
Nivelet më të ulëta të AIC për frymë u regjistruan në Bullgari (39% nën mesataren e BE-së), Kroaci (32% më poshtë), Hungari dhe Letoni (të dyja 30% më poshtë) dhe Sllovaki (29% më poshtë).
Gjatë tre viteve të fundit, AIC për frymë në raport me mesataren e BE-së ka ndryshuar në shumicën e Shteteve Anëtare.Një rritje e qartë u regjistrua në Rumani (80% e mesatares së BE-së në 2020 krahasuar me 74% në 2018), e ndjekur nga Danimarka (122% kundrejt 117%), Polonia (83% kundrejt 78%), Hungaria (70% kundrejt 65%), Lituania (95% kundrejt 91%) dhe Bullgaria (61% kundrejt 57%).Në të kundërt, uljet më të dukshme u regjistruan në Spanjë (85% në 2020 kundrejt 92% në 2018) dhe Luksemburg (145% kundrejt 152%), e ndjekur nga Malta (81% kundrejt 86%), Irlanda (90% kundrejt 95%), Greqisë (74% kundrejt 78%) dhe Italisë (96% kundrejt 100%).
