Pas publikimit të raportit të Departamentit Amerikan të Shtetit, ku Shqipëria cilësohet si një nga vendet me institucionet më të korruptuara, ka reaguar edhe kryetarja e sapozgjedhur e LSI-së Monika Kryemadhi. Në një postim në facebook, ajo shkruan se askush më qartë se raporti i Departamentit Amerikan të shtetit nuk e ka përshkruar klimën e biznesit në Shqipëri: “Investitorë të sfiduar nga korrupsioni i shfrenuar, vazhdim i praktikave të biznesit informal”. Sipas saj këto janë vetëm dy nga shumë përcaktime të tjera të rrënimit që po i bëhet bizneseve në Shqipëri. “Veç atyre që janë klientë dhe sponsorizues të Kryeministrit, çdo biznes tjetër ndjen mbi shpinë barrën e rëndë të korrupsionit dhe ryshfetit që duhet të paguajnë për të mbijetuar në një treg pa rregulla dhe klientelist. Jo vetëm kaq, por koncesionet, dhëniet e licencave, si dhe një numër kontratash të firmosura nga qeveria, janë problematike për ekonominë dhe shkak për largimin e investitorëve të huaj. Këto dhe përcaktime të tjera negative për ekonominë, edhe pse tentohen të fshihen nga mediet e blera me paratë e krimit qeveritar, flasin më shumë se çdo heshtje e blerë mediatike. Më kot mundohet Edi Rama dhe lakejtë e tij të fshehin të vërtetën e hidhur, atë të mjerimit ekonomik të vendit, të vjedhjes pa limit në çdo sektor publik, të shkatërrimit të investimeve të huaja në emër të bizneseve të lidhura personalisht me të. Por nuk mjafton raporti për vitin e kaluar, sepse kjo klimë, ky terror për biznesin e investimeve pritet të sundojë ekonominë edhe pas tjetërsimit të votës së 25 qershorit. Ata që investuan paratë e drogës dhe krimit, klientët e Edi Ramës që paguan për blerjen e votës do kërkojnë shumë shpejt shpërblimin për atë që kanë bërë. Dhe kjo do jetë një tjetër goditje për ekonominë tonë të brishtë. Unë ju siguroj që LSI nuk do të lejojë që kjo të ndodhë, sado pushtet dhe arrogancë të ketë kryeministri i Shqipërisë. Jo 74, por as 174 vota nuk do mjaftojnë që ai dhe klika e tij në pushtet të shkatërrojnë më tej ekonominë shqiptare. Ne do të jemi në çdo mbledhje komisioni, në çdo debat parlamentar pjesë aktive dhe luftarake për të denoncuar dhe luftuar çdo përpjekje për të shitur pasuritë e Shqipërisë tek oligarkët e Edi Ramës. Beteja sapo ka nisur dhe ne kemi mbështetjen e shumicës së shqiptarëve, që me votë apo me heshtje, refuzoi të mbështesë një qeveri që është gati të japë me koncesion çdo pasuri të mundshme. Por tashmë koha e shitjes së Shqipërisë ka përfunduar! Të gjithë së bashku nuk do ta lejojmë që kjo të ndodhë. LSI është opozita e fortë dhe energjike që ka mundësitë ta bëjë këtë bashkë me të gjithë ata që e kuptojnë qartë se ky vend nuk meriton të drejtohet nga oligarkët e Edi Ramës’, shkruan Kryemadhi.
