Punësimi në Gjermani, Hoffmann: Kemi lehtësuar aksesin në tregun e punës

385
Punësimi i shqiptarëve në Gjermani përmes rrugës ligjore është i mundshëm. Në një aktivitet të organizuar sot në Tiranë, rreth 350 infermierë nga 627 në total kaluan fazën e parë të procedurave për t’u punësuar në Gjermani. Të pranishmit në këtë aktivitet, ambasadori gjerman në Tiranë Helmut Hoffmann, Zv/Ministrja e Arsimit Nora Malaj, si dhe Ministri i Mirëqenies Sociale dhe Rinisë, Blendi Klosi, theksuan edhe njëherë se përmes rrugës ligjore Europa nuk ka barriera. Vetë ambasadori i Gjermanisë në Tiranë, Hellmut Hoffman vuri në dukje faktin se vendi i tij ka lehtësuar procedurat për punësimin e qytetarëve nga Ballkani. “Gjermania ka lehtësuar aksesin në tregun e punës për personat që aplikojnë në rrugë ligjore, që dëshmojnë njohuritë e gjuhës dhe që kanë diplomën përkatëse profesionale. Është një projekt mjaft i gjerë ky që ne kurorëzojmë sot. Këtu janë përfaqësues të 9 organizatave mjaft të rëndësishme në Gjermani. Dëshiroj të them se kemi bërë zgjedhjen më të mirë të mundshme, atë rrugës ligjore”, tha ambasadori gjerman në Tiranë.
Zv/Ministrja e Arsimit, Nora Malaj tha se Europa sot është pa kufij.
“Nëse fillimi është i mbarë, suksesi është i garantuar. Sot kompani gjermane janë këtu për të punësuar profesionistë shqiptarë, pra po shfrytëzohet kapitali ynë. Bota nuk ka kuptim nëse nuk i vlerëson e i shfrytëzon siç duhet kapitalet e saj dhe kjo është sfida më e rëndësishme që kemi, pasi vetëm kështu mund të bëhet integrimi i plotë. Natyrisht, gjithçka kalon përmes arsimimit dhe më tej punësimit të rregullt. Këto janë dy shtylla bazë për një integrim real dhe pa barriera”, tha Malaj. Ministri i Mirëqenies Sociale dhe Rinisë, Blendi Klosi në fjalën e tij, tha se edukimi profesional në vendin tonë ka vlerë. “Ndjehem mirë në këtë sallë pasi sot dëshmojmë se edukimi ynë ka vlerë. Shkollat tona, megjithë problematikat e tranzicionit prodhojnë kualifikime të vlefshme. Prandaj sot u dëshmua se kemi një vlerë të cilën duhet ta promovojmë vetë, ndaj dhe duhet të jemi shumë më aktiv në këtë drejtim”, tha ai.
Ministri Klosi tha se problemi kryesor është perceptimi që kanë qytetarët shqiptarë për arsimin profesional. “Ne kemi shumë problem me arsimin profesional, me mënyrën sesi shqiptarët e perceptojnë atë. Por ju sot keni dëshmuar se nëse ke një zanat, një diplomë mund të jesh i aftë të bësh një punë të denjë, jo vetëm në tregun shqiptar të punës por edhe atë europian”, tha ministri i Mirëqenies Sociale dhe Rinisë. “Prandaj them se sa më shumë t’i afrohemi arsimit profesional aq më mirë do jetë për të gjithë ne. Tashmë në shkollat tona profesionale mund të shkojnë njerëz që kanë disa mundësi më shumë, e para duke marrë një profesion, të kenë një mundësi të jenë të denjë në Shqipëri, të vazhdojnë më pas universitetin dhe të jenë të gatshëm për tregun shqiptar dhe europian të punës”, vijoi Klosi.
Ai gjithashtu uroi dhe 350 infermierët që kanë përfunduar me sukses fazën e parë, atë të marrjes së dëshmisë së gjuhës dhe dëshmisë profesionale të nevojshme për të siguruar vendin e punës. Tashmë për këta 350 infermierë nis faza e dytë, ajo e punësimit në Gjermani, teksa hapen dyert për 350 aplikuesit e tjerë, që këtë fazë të parë do ta përfundojnë në ditët në vijim. Sipas Klosit, kjo dëshmon se edukimi profesional është një mekanizëm që realisht mund t’u rregullojë jetën shqiptarëve. “Realisht sot, të gjithë ju që jeni në këtë sallë jeni njerëz që nga dita që do shkelni në tokën gjermane do të keni dyfishin e rrogës time, do të shkëputeni nga familja, por këtë e bëni për një jetë më të mirë. Po shkoni në një vend ku shumë njerëz e dëshirojnë”, tha Klosi. “Ne kemi kaq shumë kohë që flasim për arsimin profesional, por unë them se sot me prezencën tuaj këtu ju keni dhënë një mekanizëm shumë të fortë. Arsimi profesional ishte çelësi i suksesit tuaj”, përfundoi ministri i Mirëqenies Sociale dhe Rinisë.