Kartelet e drogës po kapin institucionet në Shqipëri

93

 Analiza e Profesorit austriak Paul Lendvai/ Perëndimi duhet të hapi sytë për kapjen e institucioneve nga Rama dhe ndikimi i krimit në politikat qeveritare. Bllokimi i çeljes së negociatave, kapja e drejtësisë dhe pse forca e rezistencës së popullit shqiptar kundra tendencave autoritare meriton solidaritetin e komunitetit ndërkombëtar

Artikulli i profesorit Paul Lendvai Botuar në të përditshmen austriake Der Standard, 18 shkurt 2020

Perëndimi duhet të hapi sytë për kapjen e institucioneve nga Rama dhe ndikimin e karteleve të drogës

Shqiptarët: forca e rezistencës së popullit shqiptar kundra tendencave autoritare lipset të gjejë mirekuptimin, ndihmën e solidaritetin e komunitetit ndërkombëtar.

Shqiptarët ishin dhe janë një element i paparashikueshëm dhe i nënvlerësuar në politikën ballkanike të Bashkimit Europian dhe të Fuqive të Mëdha. Duke parë vendndodhjen strategjikisht të rëndësishme të Shqipërisë, Kosovës, e Maqedonisë së Veriut, forca shpërthyese e nacionalizmit shqiptar mbetet një faktor pasigurie i dorës së parë për shtetet fqinjë. Prandaj bllokimi i çeljes së negociatave të anëtarësimit në BE shkaktoi shqetësime të justifikuara në rajon. Në Kosovë së fundmi Albin Kurti mori postin e kryeministrit. 44-vjeçari, dikur radikal i majtë e rebel nacionalist premton tani një kurs të moderuar, por pa kompromise në çështjet themelore. Të tërë vëzhguesit e informuar theksojnë njëzëri reputacionin e tij si i pakorruptueshëm. Sidoqoftë duhet pritur për të parë sa do të zgjasë e premtuara “Epokë e Re”. E sigurt është që në Kosovë dhe në Shqipërinë fqinje politika nuk merret me nostalgjinë e “Shqipërisë së Madhe” por me luftën për shtetin ligjor e kundër korrupsionit. Bisedat e mia në Tiranë e në qytete të tjera të Shqipërisë më lanë përshtypjen e një shteti të brishtë. Kryeministri Edi Rama, i cili qeveris prej gjashtë vitesh, një piktor i njohur mori emër në sajë të rrjeti ndërkombëtar të artistëve dhe retorikës së tij. Tonet e tij herë pas here nacionaliste (ai propozoi dikur një president për Shqipërinë e Kosovën) nuk duhetn marrë seriozisht. Më shumë kujdes i duhet kushtuar ajo që kritikohet si kapja e institucioneve të drejtësisë dhe ndikimi i hatashëm i karteleve të drogës në Shqipëri.

Tragjikomedi

Përfaqësues të Partisë Demokratike, e cila ka bojkotuar parlamentin e zgjedhjet, e quajnë tragjikomike verifikimin e magjistratëve dhe e quajnë qeverinë si “vetëshërbim”, por abuzimi politik me pushtetin e drejtësisë ka bërë prej dekadash dëme në administrate. Megjithatë edhe kritikët më të ashpër të qeverisë Rama theksojnë se negociatat me BE duhet të fillojnë. Komuniteti ndërkombëtar duhet të bëjë çmos për të rritur presionin mbi qeverinë dhe për të mbështetur ndryshimin e nisur. Unë i përkas opinionistëve të paktë që kanë përjetuar në lëkurën e tyre diktaturën më mizore në Europë, regjimin vrastar të Enver Hoxhës dhe këtë përvojë e ndava me lexuesit e teleshikuesit. Po kështu edhe kur Milosheviçi, Mlladiçi e Karaxhiçi përgjakën shqiptarët e Kosovës. Forca mahnitëse e rezistencës së popullit shqiptar kundra tendencave autoritare lipset të gjejë mirëkuptimin, ndihmën e solidaritetin e komunitetit ndërkombëtar. *Profesor Paul Lendvai është një personalitet austriak me origjinë hungareze i cili ka botuar shumë libra, ndër to edhe mbi Shqipërinë, e ka punuar edhe si titullar në televizion publik austriak.