NJEREZIA DHE KANDARI
Është një trastë plot me rrush.
Sa rrush ka? Kush e gjen? Kush?
Nja tri kile do të ketë.
Jo , jo! Katër e përpjetë.
Njëri: Pesë.
Gjashtë, tjetri.
Fjalën merr dhe më i vjetri:
Jo kështu s’bëhet pazari!
Sa rrush ka, e gjen kandari…
Nepotizëm
Është parë s’është parë
Vunë ministër një gomar
Gjindja tha: Goxha ministër
Me samar e me kapistër
Ç’iu qep mezi, ç’iu qep kali…
Eh, gomar, ç’të polli halli!
Dhe kërriçi pret një qoshe
Tok me pelën kuqaloshe…
Por një cep kërkon dhe mushka
Ndryshe zemërohet krushka
Ne katund plasi debati:
More, s’ngeli soj veshgjati!
Flet me plak i muhabetit:
Le t’i rrojnë, me nder qytetit!
Se katundi pa gjë s’ngeli
Boll janë: lopa, qeni, gjeli…
Dy majmunët dhe derrkuci
Ishin ç’ishin, dy majmunë
Me një sharre bënin punë
“Sh, sh, sh” sharronin drunë
Një derrkuc flinte aty
U hodh njeri nga te dy:
Uu, ç’djersë paska ky!
Ja dhe tjetri shpejt u ngrit:
Eh, vërtet po na çudit
Ne punojmë e ky djersit!…
Njeriu-mine dhe mina me sahat
Një njeri me shpirtin sterre
Qe gjithkund sajonte sherr
Hasi minën me sahat
“Uuu” rrëqethet thelle ne shtat.
Ajo Ben: “tik-tak, tik-tak…”
-Shpejt te iki, se pas pak…
Porse mina ia kthen paq:
Unë një herë bëj “bum” dhe aq…
Eh, kjo botë qenka çudi!
(Për çka them, qysh tash vë bast):
Ka ca njerëz, ja si ti
Që shpërthejnë orë e çast…
