Vdekja e dy personave nga koronavirusi në Itali, alarm edhe në Shqipëri, kontrolle të rrepta në Portin e Durrësit

165

Vdekja e dy personave të prekur nga koronavirusi në Itali ka alarmuar edhe autoritetet shqiptare.

Në portin e Durrësit është ngritur karantina si dhe janë shtuar kontrollet për pasagjerët që vijnë nga shteti fqinj.

Mjeku Indrit Kalaja, përgjegjës për karantinën e vendosur në këtë port ka siguruar se gjatë kontrolleve të ushtruara nuk ka vend për panik, pasi të gjithë pasagjerët janë të paprekur nga simptomat e koronavirusit si dhe nuk kanë lidhje me vatrat e infektuara në Itali.

“Gjithçka është nën kontroll. Kemi kontrolluar të gjithë pasagjerët që kanë hyrë nga Italia, nuk ka asnjë të prekur me simptomat e koronavirusit”-është shprehur Kalaja.
Vetëm gjatë 24 orëve të fundit nga Porti i Durrësit kanë hyrë dy tragete nga Italia, në bordin e të cilëve ndodheshin 446 pasagjerë.

Kina po përballet çdo ditë e më shumë me shtimin e numrit të viktimave si shkak i koronavirusit që është përhapur gjerësisht në 29 vende të botës.

Mësohet se në rang global janë shënuar 2345 viktima dhe mbi 75 mijë njerëz të tjerë janë infektuar nga ky virus vdekjeprurës.

Ndërkohë në Korenë e Jugut pasi u shënua edhe viktima e parë disa ditë më parë, ndërsa numri i të infektuarve është rritur në 156.

Ky virus rrezikon të përhapet në mbarë botën pasi përhapet shumë lehtë nga njeriu në njeri.