Gjykata e Apelit ka lënë në fuqi masat e arrestit me burg për Armando Kumarakun dhe Natasha Rombulan, nënë e bir, që dyshohet se përdornin një fëmijë 10-vjeçar ( djali i Armandos) për të përfituar të ardhura nga rrjeti tik tok, ku hidhnin video duke sharë dhe me fjalë fyese, ndërsa protagonist ishte i mituri.
Ndaj gjyshes dhe babait të 10 vjeçarit, Gjykata e Shkallës së Parë të Juridiksionit të Përgjithshëm Berat, kishte vlerësuar si të ligjshëm ndalimin dhe caktimin e masës së sigurimit “arrest në burg”,për personat nën hetim shtetasit me iniciale A.K dhe N. R, të dyshuar për kryerjen e veprës penale “Keqtrajtimi i të miturit” kryer në bashkëpunim, parashikuar nga neni 124/b dhe 22 të Kodit Penal.
“Gjykata e Shkallës së Parë e Juridiksionit të Përgjithshëm Berat, me vendimin nr. 22,datë 22.02.2024, ka vendosur:
- Pranimin e kërkesës së Prokurorisë pranë Gjykatës së Shkallës së Parë Berat.
- Vlerësimin si të ligjshëm të ndalimit për personat nën hetim A.K dhe N.R.
- Caktimin si masë sigurimi ndaj personave nën hetim atë të “arrestit në burg” të parashikuar nga neni 238 të K.Pr. Penale.
Çështja në Apel u shqyrtua mbi bazën e ankimeve të paraqitura, nga personat nën hetim me iniciale A. K, dhe N. R, të cilët kërkuan ndryshimin e vendimit dhe caktimin e një mase tjetër sigurimi më të butë..
Në përfundim të gjykimit, sot më datë 27.03.2024, Gjykata e Apelit të Juridiksionit të Përgjithshëm, e përbërë nga trupi gjykues me Gjyqtar z. Fatri Islamaj, vendosi:
Miratimin e vendimit nr. 22, datë 22.02.2024 të Gjykatës së Shkallës së Parë të Juridiksionit të Përgjithshëm Berat”, thuhet në njoftimin e Apelit.
