Grupet mafioze në Shqipëri janë të lidhura me policinë

100
Sigal

Indeksi Global i Krimit / Shqipëria merr një shuplakë për sa i përket krimit të organizuar dhe mungesës së ndihmës për viktimat e krimit dhe trafikimit. Vendi ynë renditet një ndër vendet me krimin më të lartë dhe rrjetet kriminale të heroinës dhe kokainës nga Turqia në Itali, janë të lidhura me strukturat e policisë dhe agjencive të tjera të zbatimit të ligjit në Shqipëri

 

Krimi i organizuar dhe mungesa e ndihmës për viktimat e krimit dhe trafikimin, një tjetër “shuplakë e fortë” për Shqipërinë

 

Shqipëria merr një “shuplakë vlerësimi”, përsa i përket krimit të organizuar dhe të gjitha fushave të tij. Indeksi Global i Krimit e rendit vendin tonë ndër 57 vendet me kriminalitet të lartë dhe me aftësi të vogla për ta përballuar e luftuar atë.

Indeksi Global i Krimit të organizuar, është një mjet botëror që vlerëson nivelet e krimit të organizuar dhe qëndrueshmërinë ndaj veprimtarisë kriminale të organizuar. Ai përfshin në renditjen e tij të gjitha shtetet anëtare të OKB -së, gjithsejt 193 vende.

Përsa i përket Shqipërisë, ky indeks tregon se vendi ynë – “dominohet nga rrjete kriminale të mbivendosura dhe aktorë të stilit mafioz familjar. Grupet e stilit mafioz kontrollojnë tregjet kriminale për drogën, trafikimin e qenieve njerëzore, kontrabandën e njerëzve dhe thuhet se po kalojnë në prokurimin publik. Ata e kanë pozicionuar veten si disa nga organizatat kriminale më të fuqishme në Evropë. Grupet e stilit mafioz shqiptar ndryshojnë nga mafia të tjera të mëdha (si ajo italiane), në atë që ata rrallë e identifikojnë veten me emra ose simbole.”

Një prej cilësimeve që ky indeks i jep kriminalitetit në Shqipëri, është se e quan të dhunshëm, në një bashkëpunim të mirë me zyrtarët e korruptuar të policisë dhe gjyqësorit, të emëruar shpesh në pozicione politike në nivele të ndryshme brenda aparatit shtetëror, si dhe me aktorët e huaj, veçanërisht mafian siciliane, si dhe grupet kriminale të organizuara turke. “Rrjetet kriminale shqiptare janë të përfshira shumë në trafikun e drogës, veçanërisht tregtinë e kanabisit. Ato shpesh paraqiten si biznese legale për të funksionuar dhe anëtarë të ndryshëm janë përgjegjës për detyra specifike brenda organizatës, të tilla si sigurimi, transporti, shpërndarja e drogës, etj, Grupet kriminale shqiptare, megjithatë, nuk janë të angazhuara vetëm në trafikimin e kokainës në Evropë, por janë gjithashtu të përfshirë në ruajtjen dhe shpërndarjen e saj, dhe kanë konsoliduar gjithnjë e më shumë ndikimin e tyre në tregjet me shumicë dhe pakicë në të gjithë kontinentin. Si rezultat, kriminelët e organizuar shqiptarë kanë arritur të kontrollojnë një pjesë të konsiderueshme të tregtisë së kokainës në Evropë.” – deklaron ky studim.

Ndërsa nga ana tjetër Indeksi Global thekson se qeveria po tregon një mungesë të theksuar të impenjimit ndaj mbrojtjes së viktimave të krimit të organizuar. Edhe pse deri më tani janë bërë hapa përpara në miratim të legjislacionit mbi trajtimin dhe mbrojtjen e viktikmave të krimit, sërish ka sfida shumë të mëdha përsa i përket zbatimit të tyre. “Mungojnë programet mbështetëse për të siguruar ndihmë mjekësore, psikologjike dhe sociale për viktimat e krimit, dhe vetëm një numër i kufizuar aktorësh publikë dhe privatë janë të përfshirë në ofrimin e shërbimeve të tilla. Për më tepër, vendit i mungon një sistem i integruar i mbështetjes së viktimave dhe vrasjet e viktimave dhe dëshmitarëve nuk janë të padëgjuara. Lidhjet e forta mes organizatave të stilit mafioz dhe legjislaturës shqiptare dhe agjencive të zbatimit të ligjit shpesh i vënë dëshmitarët në rrezik. Si rezultat, shumë dëshmitarë janë detyruar të anashkalojnë seancat gjyqësore dhe të përmbahen nga dëshmia. Skemat e ndihmës juridike duhet të zhvillojnë mekanizma në terren dhe qasje në shërbimet e mbrojtjes. Organizatat e shoqërisë civile (OSHC) me mbështetjen e donatorëve mbeten ofruesit kryesorë të ndihmës për shumicën e rasteve që përfshijnë grupe të cenueshme, në vend të agjencive qeveritare”, -thekson ky studim. Duke rekomanduar në krijimin dhe shtimin e programeve parandaluese, në studim theksohet se angazhimi i shoqërisë civile dhe mediave në luftimin e krimit të organizuar është i kufizuar. Shumë organizata të shoqërisë civile varen nga donatorët e jashtëm për mbështetje financiare ndërsa financimi publik për OShC -të është minimal dhe ende nuk është i rregulluar ligjërisht. Një situatë kjo që reflekton thellë në të gjithë punën e përditshme të CRCA/ECPAT Shqipëri, por edhe të të gjitha organizatave që kryejnë në mbrojtjen e viktimave në vendin tonë, përfshirë këtu edhe fëmijët e të rinjtë, të cilët janë edhe shtresat më vulnerabël nga krimi.