S’ka më engjëj nëpër botë
Ndaj më vjen të qaj
Në çdo portë që kam trokitur
Më janë shfaqur djaj
S’ka më engjëj nëpër botë
Koha i ka vrarë
Djajtë strofullat braktisën
Dolën në Pazar
S’ka më engjëj nëpër botë
Nuk ka qysh qëkur
U zbut tigri dhe ariu
Por njeriu kurrë
S’ka më engjëj nëpër botë
Djajtë kudo i ndeshim
Të gjithë njerzit janë të shtirur
Fallco buzëqeshin
Ska më engjëj nëpër botë
Po djaj nëpër natë
Ka vetëm një dashuri
Ajo për paratë
S’ka më engjëj nëpër botë
Ka njerëz që ndotën
Pasanikë që trashin zverkun
Varfanjakë që s’ngopen
S’ka më engjëj nëpër botë
Djajtë kudo Të trembin
Pasanikë që vënë miliona
Duke vjedhur vendin
S’ka më engjëj nëpër botë
Koha i përpiu
Po s’ta bëri gropën shoku
Do ta bëjë komshiu
S’ka më engjëj nëpër botë
E keqja sbën pas
Mund të vdesësh dhe për bukë
E askujt si plas
S’ka më engjëj nëpër botë
Bota është furtunë
Djajtë sot janë me kullare
Edhe me kostume
S’ka më engjëj nëpër botë
Djajtë të futin frikën
Dhe ndonjë që buzëqeshjen
Fshehur e mban thikën
S’ka më engjëj nëpër botë
Për ta na mer malli
Ligjin tani e bën djalli
Në favor të djallit
S’ka më engjëj nëpër botë
S’do ketë jetë e mot
Po nuk fole me gjuhë djalli
Nuk mbijeton dot
S’ka më engjëj nëpër botë
Bota është e shtirë
Të gjithë njerzit kanë maskë
Asnjeri fytyrë
S’ka më engjëj nëpër botë
Gjithshka është në rënie
Dhe njeriu sështë njeri
Por është thjesht një qenie
S’ka më engjëj nëpër botë
Morali s’ka peshë
Djajtë nuk dolën nga shishet
Ishin midis nesh
