Një fëmijë 7 vjeç është gjetur i vdekur në shtëpinë e tij në Cardito, në Napoli. Motra e tij, 8 vjeçe është plagosur. Sipas hetuesve, fëmijët janë rrahur brutalisht, edhe me një fshesë nga partneri i nënës së tyre. Bëhet fjalë për një 24-vjeçar, i lindur në Itali nga nënë italiane dhe baba tunizian, i cili është ndaluar për vrasje me paramendim.
Në shtëpi ishte edhe vajza tjetër, 4 vjeçe, e lindur nga marrëdhënia e nënës me 24-vjeçarin, e cila ka mbetur e padëmtuar.
I ndaluari, Tony Sessoubti Badre, akuzohet edhe për tentativë vrasje në rrethana të rënduara. Kjo pasi ai është përgjegjës për plagosjen e vajzës 8 vjeçe, motra e djalit që ka mbetur i vdekur, e cila është shtruar në spitalin pediatrik Santobono. Sipas mjekëve, vajza është rrahur, por nuk ka trauma në organet e brendshme.
AUTORI: RANË NGA SHKALLËT
Autori është dëgjuar gjatë tërë natës nga magjistratët, të cilët pastaj nxorën urdhrin e ndalimit. 24-vjeçari deklaroi se tragjedia ka ndodhur për shkak të një incidenti në shtëpi, por shumë elementë të mbledhur nga grupi hetimor sugjerojnë se fëmijët e partneres së tij u rrahën dhe goditën brutalisht.
Hetuesit gjithashtu morën në pyetje gruan, një 31-vjeçare nga Sorrento, e ndarë nga bashkëshorti. Ajo ka deklaruar se nuk ka qenë në shtëpi kur ndodhi tragjedia dhe se partneri i kishte thënë se fëmijët kishin rënë nga shkallët.
Sipas hetuesve, 24-vjeçari është tërbuar ndaj fëmijëve të gruas në kulmin e një grindjeje. Dyshohet se ai nuk duronte “vëmendjen e tepërt” që partnerja iu jepte fëmijëve të saj të parë.
Kryebashkiaku i Cardito, Giuseppe Cirillo, ka vendosur të shpallë ditë zie në qytet ditën e funeralit. Kryebashkiaku është ende i tronditur: “E njoh djalin që është ndaluar dhe familjen e tij. Janë njerëz të qetë. Por tani e tutje vëmendja jonë do jetë për dy fëmijët e tjerë”, tha ai.
