Stuhia Filomena ka mbuluar disa pjesë të Spanjës me sasi të mëdha dëbore. Në Madrid, që është një nga zonat më të prekura, pritet që trashësia e borës të arrijë deri në 20 cm në 24 orët e ardhshme.
Sipas BBC, gjysma e vendit ndodhet në gatishmëri me alarm të kuq për të shtunën.
Aeroporti i qytetit është mbyllur dhe disa rrugë po ashtu.
Të Premten në mbrëmje, automjetet u bllokuan në një autostradë pranë kryeqytetit dhe u desh ndërhyrja e zjarrfikësve për të ndihmuar shoferët.
Në disa zona u në terren ushtria për të ndihmuar në pastrimin e rrugëve nga debora.
Autoritetet u kanë kërkuar njerëzve që të shmangin udhëtimet jo te domososhme.
Sipas mediave lokale, reshjet e borës në Madrid janë më të rëndat në të paktën 40 vjet. Agjensia meteorologjike e vendit tha se reshjet e borës ishin “të jashtëzakonshme dhe me shumë gjasa historike”.
Me gjithë problematikat, kishte nga ata që e shfrytëzuan në maksimum dëborën, pasi dolën të luanin me të përreth sheshit “Puerta del Sol” të Madridit.
Moti i ftohtë pritet të vazhdojë përtej fundjavës dhe temperaturat në Madrid parashikohet të arrijnë -12 gradë Celcius të enjten.