Xhevat Mustafa
Pamundësia për t’u takuar, meqenëse jetonin në lagje skajore të Tiranës, njeri me një apartament të bollshëm afër Kopshtit Zoologjik dhe tjetri afër ish- Kombinatit Poligrafik, dy pensionistë, miq të vjetër, por me me bindje politike të kundërta, hynë në lidhje dhe zhvilluan një bisedë të gjatë në messenger.Merret me mend se shqetësimi i parë ishte zgjatja pa afat të qartë e masave në kushtet e pandemisë prej coronavirusit.
I majti – Hë, si po i shtyn ditët?
I djathti – Si në “arrest shtëpijak”, pa hetim prokurorësh dhe pa vendim gjykate, por vetëm me ferman të “sulltanit tënd”!
I majti – Sa mosmirënjohës jeni ju të djathtët! Atij duhet t’i ngrejmë një monument ngjitur me të Skënderbeut, sepse na shpëtoi me kaq pak të prekur dhe viktima…
I djathti- Domethënë, sipas teje Merkel dhe qeveria gjermane, qeveritë e Suedisë, Danimarkës, Norvegjisë, Finlandës e të plot vendeve të tjera, që morën masa mbrojtëse liberale, duhet të merrnin mend nga Edi Rama yt?
I majti – Mirë do të bënin…
I djathti- Hë, se desha të pyes qysh në fillim. E more shtesën e pensionit të 1 prillit nga Edi Rama?
I majti- E mora! E falenderova me gjithë zemër! Na i rriti pensionet edhe në këtë periudhë të vështirë…Po ti e more?
-I djathti- Po, shkova me një valixhe diplomatike, sepse nuk ma nxinin xhepat dhe kuleta!
I majti – Sipas jorganit shtrihen edhe këmbët…
I djathti- Me aq sa na u rrit pensioni unë nuk blej dot as edhe një palë doreza dhe një maskë nga ato të shtrenjta, 700-800 lekë të reja! Llogarit se sa maska me përdorim ditor na janë dashur këto gati 2 muaj karantinë dhe del se kjo “rritja e re” është si një pikë uji në oqean…!
I majti – Vitin tjetër më shumë!
I djathti – Shikojeni si e keni katandisur këtë vend kaq të pasur pas 75 vjetësh të qeverisjes nga “e majta” e jote?
I majti- Për mua ky vend po rilind për ditë dhe po lulëzon…Pallate të reja sa nuk numërohen, kulla 20-30 katëshe gjithashtu sa të duash…Rrugët mbush me vetura… Në të dy anët e tyre pa numërim byrektore, qebabtore, piceri, farmaci, agjensi këmbimi valuator, klinika dentare, dyqane celularësh, floriri…
I djathti – Këto janë vetëm pamja e jashtme apo fasadat…Apo “industria e rëndë e rilindjes”. ” Po rreth 1 milionë fare të varfër, lypësit nëpër trotuare dhe lokale; rrëmihësit nëpër koshat e plehrave, listat e gjata të furnizimit veresi nëpër dyqanet e vegjël… nuk i shikon?
I majti- Kudo ka varfëri! Edhe në Amerikë, biles!
I djathti- Pse ka varfëri i dërgoni atje djemtë dhe vajzat me familje me llotarinë amerikane? I dërgoni me 5.000 dollarë dhe pas 10-15 vitesh bëhen me shtëpia rreth 100-150 mijë dollarë dhe me 200-300 mijë dollarë nëpër banka…
I majti – Edhe tek ne është shtuar boll numri i të pasurve…Shqiptarë janë ata që janë pronarë biznesesh, supermerkatosh, hotelesh, kompleksesh turistike, fabrikash… të mëdha…
I djathti- Po të shikohen mirë biografitë e këtyre të pasurve do të dalë se shumica janë “rastësisht” ose të majtë, të lidhur me tesera, me bindje e votë me bosët e diktaturës komuniste dhe të sigurimit të saj famëkeq, ose vëllezër, motra, dhëndurë, nuse, nipa e mbesa të partiakëve, qeveritarëve, shtetarëve më të lartë të partisë suaj…Shikimin e ke të fortë. Nuk e ke vënë re se këta pasurohen dhe shumica e qytetarëve varfërohen…?
I majti- Falë Zotit, unë, njerëzit e mi më të afërm me familje fitojmë dhe jetojmë mirë! Të gjithë ose me biznese modeste tonat, ose me punë në shtet, ku vërtetë nuk u rrjedhin fitime të mëdha, por u pikojnë jo pak…I jemi mirënjohës partisë dhe qeverisë sonë dhe nuk do t’i tradhëtojmë kurrë!
I djathti – Kësaj i thonë: unë dhe soi dhe sorrolopi im të jemi mirë, pa gjithë fshati, lagjia, qyteti, vendi u mbulofshin nga flakët ose u përmbytshin nga varfëria dhe uria!
I majti- More, mos je takuar me Saliun apo Lulushin? Se qenke fryrë shumë sot kundër nesh…!
I djathti- Jo kundër teje, por kundër atyreve që po i shfrytëzojnë për fronet dhe milionat e veta idealizmin, partishmërinë, mbështetjen, votat e tua dhe të të gjitha të tjerëve si ti!
I majti- Unë për vete jam i kënaqur dhe nuk ndryshoj bindje e votë! Po të jetoja gjatë, edhe 75 vjet të tjerë do të votoja për PS-në time dhe Edi Ramën, që rrofshin sa malet! Ti e di, unë e urrej të djathtën qysh kur kam dalë nga barku i nënës!
I djathti- Për të qeshur dhe qarë! Ke urrejtje histerike ndaj të djathtës pa e njohur dhe provuar fare dhe pa parë asnjë të keqe prej saj…
I majti – Kështu jam gatuar unë! I majtë kam lindur dhe i majtë do të vdes!
I djathti- E keqja juaj dhe e jona të gjithëve është se kjo e juaja vetëm emrin ka “e majtë”!
I majti – Se mos e djathta juaj është krejt “bio”?
I djathti – Ju keni 78 vjet që nuk keni lënë gjë pa bërë për ta zhdukur dhe ndryshuar edhe këtë pak të djathtë, që arriti të mbinte e të mbijetonte në këtë tokë!
I majti – More, me sa di e më ke thënë edhe vetë, ti nuk ke parë keq në kohën e Enverit dhe duhet t’i jesh mirënjohës.
I djathti – Në burg nuk më futi, por nuk e kam dashur fare. E si mund ta doja për atë jetë qeni që na detyroi të bënim për rreth 47 vjet? Si mund ta doja kur na iku rinia dhe u mplakëm nëpër rradhë qysh nga mesnata për shumicën e artikujve të ushqimit të përditshëm me tollona? Apo duke pritur shumë vite për autorizimin dhe për të grumbulluar lekët nëpër llotarira ilegale për një televizor bardh e zi të Durrësit, për një frigorifer, lavatriçe, për të marrë një kabinë plazhi, për 10 ditë pushime në një kabinë druri me sipërfaqe as 5 metra katrorë… ?
I majti – Ohu, qenke në formë sot! Me të vërtetë më binde se je takuar me ndonjë nga ta të SHQUP-it sot! Mos pandeh se janë më të mirë se se ne!
I djathti- Edhe krejt si ju nuk janë. Të paktën, më 2013-tën, nuk kishim këto nivele kaq të larta varfërie, çmimesh, korrupsioni, tenderash, koncesionesh, PPP-shë, emigracioni, kriminaliteti, papërgjegjshmërie, nepotizmi…
I majti- Gri ti, gri! Njësoj jemi të dy palët! Edhe më shqip: të një barku jemi…
I djathti- Sa verbërisht i besoni “përrallat e partisë dhe të kryetarit të zemrës, more”? Njësoj, 100%, je ti me dy vëllezërit dhe dy motrat e tua? Njësoj, 100%, jam unë me vëllezërit dhe motrat e mia, që ti i njeh mirë? Njësoj, 100%, janë janë fëmijët tanë? A nuk e kuptoni se me këtë sajesën “të dy palët janë njësoj” Edi Rama me shokë e shoqe synojnë dhe ia kanë arritur deri më sot të mos lejojnë rrotacion politik, një qeverisje tjetër, qoftë edhe 25% më të mirë se kjo e tyre, me ekspertë të vërtetë dhe elitarë në të gjitha fushat dhe jo me kukulla e kartona të kryetarëve, me ministra dhe ministresha pa vlera, përvojë, merita e kontribute?
– I majti- Ta thashë, ne do të vazhdojmë të qeverisim gjatë!
I djathti- Se keni gjetur këtë popull!
I majti – Për ne është më i miri! I butë si dele apo si kukullat prej pelushi! Po nuk ju pëlqeu, ikni në Perëndim dhe kërkoni dhe gjeni andej një popull tjetër!
-I djathti – Kam edhe një pyetje të fundit: vërtetë nuk ju vjen turp, nuk ndjeni vrasje në ndërgjegje dhe përgjegjësi për gjendjen mjerane në të cilën e keni sjellë, pas 75 vitesh qeverisjeje alla të majtë Shqipërinë tonë, një vend që Zoti i ka falë natyrë, klimë, pasuri nën dhe mbitokësore, si rrallë vendi tjetër në botë?
I majti – Meqenëse jemi më shumë se miq po e mbyll këtë bisedë me sinqeritet: E përse të na vijë turp dhe keq neve “të majtëve”, kur nuk u vjen turp dhe keq për veten gjithë shqiptarëve?! Kemi gjetur shesh dhe kemi bërë… përshesh!