Një vlonjat është vënë në pranga në Fier, pasi policia i ka gjetur një sasi kokaine në makinë.
Burime zyrtare nga policia kanë bërë të ditur se, arrestimi është bërë në lagjen ’16 prilli’ në Fier.
I arrestuari është K. Llakaj, 30 vjeç dhe droga i është gjetur poshtë sedijes së makinës.
Njoftimi i Policisë së Fierit:
Goditet një rast i drogave të forta në qytet.
Kapet dhe arrestohet në flagrancë 30-vjeçari me kokainë në automjet të cilin e drejtonte në gjendje të dehur.
Strukturat e Drejtorisë Vendore të Policisë Fier, krahas punës për kontrollin e zbatimit të masave kufizuese për mospërhapjen e COVID-19, kanë vijuar punën për evidentimin dhe goditjen e paligjshmërisë.
Në vijim të kontrolleve të shtuara nëpër rrugët e qytetit me qëllim parandalimin dhe goditjen e rasteve të posedimit apo shpërndarjes së lëndëve narkotike, specialistët për hetimin e narkotikëve kanë bërë kapjen dhe arrestimin në flagrancë të shtetasit:
• K.Ll., 30 vjeç, banues në Vlorë.
Në lagjen ‘16 Prilli’ Fier, ky shtetas është kapur duke drejtuar automjetin e tij në gjendje të dehur, dhe gjatë kontrollit në mjet, poshtë sediles ju gjet dhe ju sekuestrua një sasi me lëndë narkotike e dyshuar Kokainë e ndarë në doza të vogla.
Materialet i kaluan Prokurorisë pranë Gjykatës së Shkallës së Parë Fier për veprat penale ‘Prodhimi dhe shitja e narkotikëve’ dhe ‘Drejtimi i mjetit në gjendje të dehur’.