Juristi Ardian Dvorani ka 6 vite që rri anëtar i Gjykatës së Lartë e zv.kryetar i saj edhe pse sipas Kushtetutës mandati i ka mbaruar që në vitin 2014. Juristi që ka hartuar disa ligje të reformës në drejtësi, kur i preket interesi personal është gati të shkelë kushtetutën dhe ligjet që ka hartuar vetë.
Këto ditë KLGJ ka nisur shqyrtimin e çështjes së tij për mandatin, por Dvorani nuk ka ndërmend të largohet edhe pse e di se sipas Kushtetutës po mban një detyrë që as i është kërkuar dhe as nuk i takon.
Dy vite më parë, kur kaloi në mënyrë të diskutueshme procesin e vettingut, Dvorani u pyet se përse qëndronte ende në Gjykatën e Lartë. “Nuk kam privilegj të qëndroj në Gjykatën e Lartë. Nuk kam asnjë të drejtë të qëndrojë në Gjykatën e Lartë. Unë kam një detyrim të qëndroj në Gjykatën e Lartë, sepse Kushtetuta dhe ligji më detyrojnë të qëndroj në detyrë derisa të zëvendësohem”,- është shprehur për mediat Ardian Dvorani.
Deklarata e para dy viteve tregon dy standardet e interpretimit të ligjit nga i njëjti jurist. Dy vite më parë ai e pranon se nuk ka të drejtë të qëndrojë në Gjykatën e Lartë, sepse mandati i plotë i ka mbaruar dhe është zgjedhur në këtë post jo nga juristët, por nga Parlamenti në vitin 2005. Nga viti 2005 deri në vitin 2014 ai konsumoi mandatin e plotë dhe duhet të ishte larguar. Ndërkohë sot në vitin 2020 vijon ende të jetë anëtar dhe zëvendëskryetar i Gjykatës së Lartë me idenë se nuk është zëvendësuar.
Mbrojtja se “nuk jam zëvendësuar” është një manipulim ligjor dhe politik. Gjykata e Lartë ka tre anëtarë të rinj që janë zgjedhur sipas Kushtetutës dhe procedurave të reja të reformës në drejtësi. Zgjedhja e gjyqtarëve të rinj mjafton jo vetëm për bërë funksionale Gjykatën e Lartë, por dhe për të zëvendësuar Dvoranin.
Në mënyrë jo normale, sot, i njëjti jurist dhe një nga njerëzit që ka pasur në dorë fatet e drejtësisë para dhe pas reformës, nuk zbaton ligjin, por thotë se do të qëndrojë në detyrë.
Para dy vitesh Dvorani po sakrifikonte duke mbajtur hapur derën e Gjykatës së Lartë sepse s’kishte gjyqtarë të tjerë, pot sot që janë tre me mandat të ligjshëm kur po e mban me forcë në detyrë Dvoranin? Dhe te tre gjyqtarët e rinjë janë emra të spikatur nga bota e drejtësisë.
VIDEO/Deklarata e Ardian Dvoranit dy vitë me parë: Nuk kam asnjë të drejtë të qëndrojë në Gjykatën e Lartë
