Shqipëria është më miqësorja me emigrantët e huaj, krahasuar me shtetet e tjera të Ballkanit. Një anketë e zhvilluar vitin e kaluar nga Barometri i Ballkanit njëkohësisht në Shqipëri, Bosnjë, Maqedoni, Serbi, Malin e Zi dhe Kosovë tregoi se shqiptarët ishin më të gatshëm për të pritur emigrantë të huaj.
Pyetjes nëse prania e emigrantëve të huaj është e mirëpritur në qytetin tuaj, iu përgjigjën pozitivisht 43% e shqiptarëve. Në Shqipëri, popullsia që mirëpret emigrantët është 4 herë më e lartë se e vendeve fqinjë.
Kjo sjellje e Shqipërisë për mikpritjen e emigrantëve të huaj shpjegohet me faktin se jemi populli më emigrues në Evropë. Shumica e familjeve shqiptare kanë kaluar përvoja emigrimi, duke i bërë ata më ndjeshëm ndaj fenomenit.
Sipas “Our World in Data” janë rreth 57,616 mijë të huaj që jetojnë në Shqipëri, ku prej tyre 13 mijë janë të pajisur me leje pune.
Në rajon, Shqipëria renditet ndër vendet me numër të ulët emigrantësh. Numrin më të madh e ka Serbia, me rreth 807 mijë të huaj që jetojnë atje. Në Maqedoni janë rreth 130 mijë dhe në Malin e Zi rreth 82 mijë të huaj. Bosnjë-Hercegovina ka numrin më të ulët të huajve në rajon, ku sipas Bankës Botërore në 2015-n ishin rreth 32 mijë./ Monitor
