Prej mbrëmjes së të enjtes, qarku i Kukësit është përfshirë nga reshje bore me intensitet mesatar në të gjitha pjesët e teritorit. Lartësia e borës në tunelin Kalimashit ka arritur 35 cm, në Valbonë 1 metër e zona të tjera malore deri në 20 cm.
Në Kukës është 10 cm, në Bajram Curr 25 cm dhe në Krumë 8 cm. Akset rrugore nacionale që përshkojnë Qarkun e Kukësit janë nën fenomenin e prezencës së rënies së reshjeve të borës.
Të gjitha akset nacionale duke filluar nga Rruga e Kombit nuk kanë probleme në qarkullim dhe funksionojnë normalisht. Policia rrugore e patrullimit të autostradës ka ngritur postoblloqe në disa segmenete duke këshilluar drejtuesit e automjeteve dhe kontrolluar për pajisjet dimërore. Me zinxhirë qarkullohet në segmente të veçantë si aksi Kolsh-Qaf-Shllak, aksi rrugor Ura e Zapodit-Shishtavec.
Probleme të shumta ka në lidhjen ndërmjet lagjeve e fshatrave të bashkive të Qarkut. Edhe rrugët rurale janë të qarkullueshme. I gjithë qarku ka marrë energji elektrike me përjashtim të Njësisë Administrative Bushtricë të Bashkisë Kukës e disa fshatrave të Njësisë Administrative Bytyç të Bashkisë Tropojë.
