Rrënjët e së keqes ngadalë po zbulohen. Rama e ka shfaqur me kohë prirjen e qeverisjes autokratike, por e ka mbuluar atë, me retorikën megallomane të një hokatari që tregonte siguri në administrimin e pushtetit.
Sa kohë që mendonte se pushtetin nuk ja cënonte askush, bënte liberalin, madje indiferentin edhe për Reformën në Drejtësi. Kur krijoi “opozitën parlamentare” megallomania politike nuk njohu kufi, sepse mendonte, që edhe ndërkombetarët do të vazhdonin ta mbështetnin në anarkizmin e tij qeverisës.
Me megallomaninë e tij karakteristike e priti edhe krijimin e Këshillit Politik. Askush nga aradhët e eunukëve që e rrethojnë e hedhin valle si “dervishët fluturues”, nuk pati arsye ta kuptonte thelbin e platformës së Këshillit Politik të 4 janarit dhe as marrëveshjen e 5 qershorit. Prandaj Rama vazhdonte të recitonte këngën se “nuk mund të ketë lista të hapura”, ndërsa “udhëheqësi i Reformës Zgjedhore” , ndryshimin e kushtetutës e konsideronte marrëzinë më të rrezikshme politike.
Po tani, përse të dy “valltarët politikë” u njësuan në mendim ? Përse hedhin vallen e “dervishëve fluturues” e nuk pranojnë miratimin e Marrëveshjes Politike në parlament pa ndryshime, ashtu si kanë pranuar platformën e Këshillit Politik më parë në Kuvendin e Sajuar ?
Pse u ka ikur truri dhe dredhojnë e gënjejnë veten, kur thonë, se marrëveshjen do e miratojmë ashtu si kemi rënë dakort, por kushtetutën do e ndryshojmë pa marrëveshje ?
Sa shumë përvëluese paska qenë deklarata e Ambasadores Kim, se “rrotacioni i pushtetit, është domosdoshmëri, si qarkullimi i gjakut”!
Prandaj Haxhi Qamilizmit i janë errur sytë e llogjika dhe kanë dalë hapur kundër perëndimit.
“Dervishët fluturues” në Këshillin e Legjislacionit dhe Komisionin e Ligjeve morën nismën për ndryshimin e Kushtetutës. Janë çmendur e janë përfshirë në aventurën e turpit.
Po kush mund të ketë fuqi ta ndryshojë Kushtetutën, me procedura antikushtetuese, për pushtetin e Ramës ?
Janë çmendur e deklarojnë se “të gjithë i dëgjojmë, por vendimin e merr Kuvendi i Sajuar” !
Pra, kombëtarë e ndërkombëtarë, po e ndjekin vallen e “dervishëve fluturues”, që nuk e duan hapjen e negociatave dhe integrimin institucionale në BE, nëse humbet pushtetin Rama. Aferim ju qoftë valltarë! Të shikojmë sa energji do të keni duke fluturuar!