Presidenti Meta, homazhe për “Nderin e Kombit”, Gjeneral Brigade Ndriçim Sallakun

250
Sigal

Presidenti i Republikës, Ilir Meta, njëkohësisht Komandant i Përgjithshëm i Forcave të Armatosura, bëri sot homazhe në nder të Komandantit të Komandës Mbështetëse, Gjeneral Brigade Ndriçim Sallaku, i cili u nda nga jeta në mënyrë të parakohshme për shkak të COVID-19.

Gjatë homazheve të zhvilluara në Ministrinë e Mbrojtjes, Kreu i Shtetit vendosi një kurorë me lule dhe u përul me respekt para trupit të pajetë, u shprehu personalisht ngushëllimet më të ndjera familjes, të afërmve, kolegëve dhe bashkëpunëtorëve, si dhe la një shënim në Librin e Zisë të hapur me këtë rast të dhembshëm.

Duke i dorëzuar bashkëshortes së Gjeneral Brigade Ndriçim Sallaku, Dekoratën e lartë “Nderi i Kombit”, Presidenti Meta theksoi edhe njëherë se ndarja nga jeta e njërit prej kuadrove më të spikatur të Forcave tona të Armatosura, këtij personaliteti të jashtëzakonshëm, intelektuali të shquar e modeli të rrallë qytetarie, është një humbje e madhe për familjen e Tij dhe ushtrinë shqiptare.