Ministri i Mbrojtjes, Ermal Nufi informoi se Forcat e Armatosura vijojnë intensivisht angazhimin për izolimin dhe shuarjen e vatrave të zjarrit në vend.
Nufi tha se “në Gurë-Lurë, Dibër zjarri është izoluar falë korridoreve të hapura, teksa vijon puna për shuarjen me 30 efektivë të FA dhe dy avionë Air Tractor”.
Sipas tij, nuk ka rrezik për përhapjen e zjarrit pranë banesave.
“Në Tërbun, Pukë operacioni vijon me 30 efektivë të FA dhe dy helikopterë dhe nuk ka rrezik për zonat e banuara”, tha Nufi.
Ministri Nufi bëri të ditur gjithashtu se në Dajt (Tiranë) vijon operacioni për izolimin e vatrës me 50 efektivë të FA dhe një helikopter.
“Nuk ka rrezik për zonat e banuara, zjarri në Priskë është nën kontroll, ndërsa në Vakumone vatra e zjarrit është izoluar”, tha Nufi.
