Kryeministri Edi Rama ka reaguar pas komenteve të bëra nga Sekretarja e Brendshme e Britanisë se Madhe, Suella Braverman rreth emigrantëve shqiptarë. Duket se edhe këtë herë ai e ka gjetur fajtorin tjetër kund dhe jo tek politikat e qeverisë së tij që kanë vrarë shpresën tek shqiptarët që kërkojnë të ikin nga vendi. Rama shkruan se ne kemi për detyrë të luftojmë krimin në shtëpi dhe po e bëjmë këtë me vendosmëri. “Shqipëria nuk është një vend i pasur dhe ka qenë për një kohë shumë të gjatë viktimë e perandorive, ne nuk kemi pasur kurrë tonën. Ne kemi për detyrë të luftojmë krimin në shtëpi dhe po e bëjmë këtë me vendosmëri, pasi bashkëpunojmë ngushtë edhe me të tjerët. Gati për të punuar më afër me Mbretërinë e Bashkuar, por faktet janë vendimtare. Kështu është edhe respekti i ndërsjellë. Shqipëria është një vend i NATO-s dhe po negocion anëtarësimin e saj në BE. Është gjithashtu një vend i sigurtë origjine. Kur Gjermania pati një problem të ngjashëm, ajo shtrëngoi sistemet e veta. Britania e Madhe mund dhe duhet të bëjë të njëjtën gjë, duke mos u përgjigjur me një retorikë krimi që përfundon duke dënuar të pafajshmit. 70% e 140,000 shqiptarëve që janë shpërngulur në MB jetonin në Itali dhe Greqi. 1200 prej tyre janë njerëz të biznesit. Shqiptarët në Britaninë e Madhe punojnë shumë dhe paguajnë taksa. Britania e Madhe duhet të luftojë bandat e krimit të të gjitha kombësive dhe të ndalojë diskriminimin e shqiptarëve për të justifikuar dështimet e politikave. Vënia në shënjestër e shqiptarëve (siç bënë disa me turp kur luftuan për Brexit) si shkaku i krimit të Britanisë dhe problemeve kufitare e bën retorikën e lehtë, por injoron faktet e vështira. Të përsërisësh të njëjtat gjëra dhe të presësh rezultate të ndryshme është çmenduri (pyete Ajnshtajnin!)”, shkruan Rama. Ndërkohë shqiptarët janë vendosur në qendër të polemikave të vazhdueshme politike gjatë ditëve të fundit, rreth emigrantëve që hyjnë ilegalisht në Britaninë e Madhe. Media Huffington Post ka deklaruar se për shqiptarët nuk pritet të ketë politika integruese, ndërsa citon deputetët, të cilët shprehen “kush ka ankesa për qëndrimin të kthehet pas që tani.” Ministrja e Brendshme, Suella Braverman, ka deklaruar së fundmi, se me politikat e saj të reja do t’i japë fund “pushtimit” të emigrantëve që mbërrijnë në brigjet britanike, duke shkaktuar reagime të forta për “gjuhën e saj të ashpër”. Emigrantët shqiptarë janë tashmë në qendër të debatit, të nxitur nga shqetësimet mbi kushtet me të cilat përballen emigrantët në qendrat britanike të përpunimit. Edhe pse qeveria kërkon largimin e refugjatëve, rreth 76% e të gjitha kërkesave për azil pranohen.
