Lista e gylenistëve /Turqia falenderon Shqipërinë për mbyllen e shkollave,

106
Sigal

Në një konferencë të përbashkët për shtyp në Ankara, ministri i jashtëm turk Çavushoglu shtoi presionin ndaj homologes së tij shqiptare, Olta Xhaçka, për të dorëzuar të arratisurit në kërkim, duke i dorëzuar asaj një listë të re me të dyshuarit që duhen ekstraduar.

Nga Hamdi Fırat Buyuk, BIRN

Ministri i Jashtëm turk, Mevlut Çavushoglu i tha homologes së tij shqiptare Olta Xhaçka, gjatë vizitës së saj në Ankara të martën, se Turqia është në pritje të ekstradimit nga Shqipëria të një numri të arratisurish. Turqia kërkon ekstradimin mes të tjerëve të kripto-mashtruesit të kërkuar Faruk Fatih Ozer dhe mbështetësve të Fethullah Gylen, të njohur shpesh si gylenistë.“Sot u mbajt gjyqi i katërt dhe gjyqi i pestë do të jetë më 10 nëntor. Me përfundimin e këtij procesi ligjor, ne presim që ky person të ekstradohet në vendin tone, sepse ai është një mashtrues që mashtroi shumë nga qytetarët tanë”, tha Çavushoglu në një konferencë të përbashkët për shtyp me Xhaçkën të martën. I dyshuar për organizimin e një mashtrimi masiv me kriptovaluta, Ozer u arrestua në Shqipëri më 30 gusht, pasi ishte në kërkim nga policia për më shumë se një vit. Çavushoglu tha gjithashtu se ai kishte dorëzuar një listë të re të të ashtuquajturve gylenistë të kërkuar nga Ankaraja. Presidenti turk Rexhep Tajip Erdogan dhe qeveria e tij akuzojnë Gylenin dhe rrjetin e tij për orkestrimin e një grushti të dështuar në vitin 2016 dhe e përkufizojnë rrjetin si “Organizata Terroriste Fethullahiste”, ose shkurt “FETO”. “FETO nuk është vetëm një kërcënim për ne, është një kërcënim për çdo vend ku ndodhet”, –tha Çavushoglu.“Sot, ne ndamë informacionin e nevojshëm në lidhje me ekstradimin e disa njerëzve (gylenistëve) në Turqi”, tha Çavushoglu dhe vlerësoi mbylljen e një shkolle në Shqipëri. Kolegji Mehmet Akif Ersoy u mbyll në shtator. Kryeministri shqiptar Edi Rama tha se shkollat e lidhur me Gylenin po mbylleshin sepse nuk plotësojnë standardet ligjore, por shumë dyshojnë se vendimi është marrë për t’i bërë qejfin presidentit të Turqisë. Mijëra institucione – universitete, shkolla, banka, kompani mediatike, OJQ dhe firma private – në pronësi ose të drejtuar nga anëtarë të dyshuar të rrjetit të Gylenit janë mbyllur në Turqi që kur autoritetet shtypën tentativën për grusht shteti në vitin 2016. Qeveria vazhdon t’u bëjë presion vendeve të tjera që të bëni të njëjtën gjë. Megjithatë, deri më tani, përveç disa shteteve në Afrikë dhe Azi me qeveri autokratike, shkollat e Gylenit kanë vazhduar të funksionojnë dhe shumica e vendeve kanë rezistuar ose e kanë shpërfillur Ankaranë për ekstradimin e ndjekësve të Gylenit. Shqipëria deportoi në mënyrë të diskutueshme një gylenist në Turqi në vitin 2020, i cili po përpiqej të ikte në Kanada dhe kështu iu bashkua Kosovës dhe Moldavisë, të cilat gjithashtu kanë kthyer në Turqi “gylenistë” të dyshuar, pavarësisht kritikave të ashpra nga organizatat e të drejtave, BE-ja dhe partitë e tyre opozitare.