Të gjithë ata që janë gjobitur për mosrespektim të masave anti-covid, këtë muaj do të paguajnë gjobat në faturën e energjisë elektrike. Në të kundërt, do t’iu ndërpritet energjia elektrike. Drejtuesit e Operatorit të Shpërndarjes së Energjisë bëjnë të ditur se këtë muaj do të faturohen gjobat e vendosura që prej fundit të muajit tetor, në bazë të listës së dërguar nga Policia e Shtetit.
“Që në muajin janar një pjesë e gjobave kanë dalë në faturën respektive, dhe qytetarët kanë detyrimin për ta paguar. Në shkurt do filloj edhe pagesa, dhe në rastin që nuk paguhen gjobat, mund të cilësohen si debitorë dhe t’u ndërpritet energjia. Janë 55 mijë gjoba deri më tani, të tjera po vijnë”, thotë Elton Sevrani, administrator i Furnizuesit të Shërbimit Universal, OSHEE
Gjatë katër muajve janë vendosur 55.800 gjoba për mosrespektim të masave anti-covid. Pas verifikimeve të kryera nga OSHEE, ka rezultuar se 22 mijë shkelës nuk rezultojnë abonentë individual të operatorit të energjisë, si dhe kanë pasaktësi të tjera në të dhëna. Gjobat e tyre i janë kthyer mbrapsht Policisë së Shtetit.
