Ndërkohë që qytetarët shesin shtëpitë për t’u kuruar në spitale apo për të operuar familjarët, burokratët e Fondit Shqiptar të Zhvillimit lundrojnë mes milionave të taksapaguesve duke u siguruar stafit të vetë trajtime mjeksore, analizat e covidi, teste, shërbime spitalore, eko,skaner etj. me paratë e shtetit. Pas skandalit të milionave me pagat e sanitareve, shoferëve, shefave dhe rrogës 7 mijë euro të drejtorit, ky është një tjetër abuzim në kurriz të qytetarëve
Por, përse kanë benefite vetëm këta burokratë?!
‘Shëndetësia falas’ është një nga sloganet më të përdorur nga qeveria, por kjo shëndetësi falas kushton shumë tek xhepat e shqiptarëve, vetëm 4 koncesione paguhen 370 milionë euro nga taksapaguesit. Megjithatë raportet financiare tregojnë se shqiptarët kanë vështirësi të mëdha për të marrë shërbimin shëndetësor. U shpenzuan së paku 92 milionë euro gjatë vitit 2020 për shërbime spitalore dhe diagnostikuese private . Nga aeroporti i Rinasit kanë fluturuar mbi 565 chartera ambulancë drejt Turqisë dhe më pak drejt Italisë, duke u kushtuar pacientëve shqiptarë mbi 6.7 milionë euro për udhëtime . Ndërkohë për FSHZH parashikohet transporti për në spital jashtë Shqipërisë-bileta e avionit, shpenzimet për kirurgët, mjekët, anestezistët, madje edhe transplant i organeve, kujdesi psikiatrik etj. Madje, kujdesi për dhëmbët. Përfitime të tjera janë transporti me ambulancë rrugore dhe helikopter në rast emergjence. Sipas dokumenteve, punonjësit duhet t’i nënshtrohen kujdesit parandalues, check-up, një herë në vit.
Drejtori i Fondit Shqiptar të Zhvillimit, Dritan Agolli, është endur gjithmonë mes biznesit dhe karriges shtetërore. Karrierën në shtet e filloi në Bashkinë e Fierit, për t’u zhvendosur në vitin 2002 në Tiranë, duke punuar në Bashkinë e Tiranës. Fillimisht në Drejtorinë e Punëve Publike, më pas Drejtor Urbanistike dhe më pas Administrator bashkie, në një kohë që bashkinë e drejtonte Edi Rama. Agollit iu besua nga Rama pothuajse çdo vendimmarrje, duke u bërë jo vetëm një nga personat më të fuqishëm në administratën e bashkisë, por duke u shfaqur jashtë mureve të institucionit si “njeriu i Ramës”. Më pas, Agolli kaloi administrator i një firme private, nga ato që lakohen përditë si oligarkët e ndërtimit, firmë, e cila kishte fituar pafund tendera të majmë. Dhe, nga “Gener 2”, Agolli u katapultua Drejtor i Përgjithshëm i Fondit Shqiptar të Zhvillimit, në janar të vitit 2019. Një Fond i cili ka varësi direkte nga kryeministri, teksa fjalët “njeriu i Ramës” gjejnë vend edhe aktualisht. Përshkrimi i mësipërm për Agollin u bë për të treguar se ai, prej 10 vitesh ka mbajtur poste të rëndësishme në administratën shtetërore, të lakmueshme për shumëkënd.
Skandali i rrjedhjeve të pagave ka nxjerrë zbuluar disa nga pagesat marramëndëse për drejtorët e Rilindjes. Një prej tyre ishte edhe Dritan Agolli, i cili merrte një pagë prej më shumë se 7 mijë eurosh në muaj. Por, ky nuk është benefiti i vetëm, pasi Agolli tenderon dhjetëra miliona euro çdo muaj, në të gjithë Shqipërinë. Fondi Shqiptar i Zhvillimit ka hapur një tender me objekt “sigurimi i shëndetit për punonjësit e FSHZH-së”, me një vlerë rreth 60 mijë euro. Por, pavarësisht vlerës së tenderit, ajo që bie në sy janë benefitet që përfitojnë këta punonjës. Por, përse kanë benefite vetëm këta burokratë?!
Janë disa paketa të shërbimit mjekësor për stafin e FSHZH-së. Sipas dokumenteve që disponon janë vendosur disa limite maksimale të mbulimit për person. Paketa e parë shkon në 68,000,000 milionë, të tjerat nga 20,400,000 dhe 6,800,0006 lekë.
Por, janë edhe disa vende ku duhet të marrin shërbimin mjekësor. Vlera më e lartë është në të gjithë botën, përjashtuar SHBA, Kanada dhe Zvicer. E dyta në shtete të Bashkimit Europian, Shqipëri dhe Turqi. Të fundit në shtete të Bashkimit Europian, Shqipëri, Turqi.
Sipas dokumenteve, parashikohet edhe dhoma në spital. “Shpenzimet për dhomë dhe ushqim për çdo ditë shtrimi të të siguruarit në spital. Qendrimi maksimal si pacient i shtruar në një institucion spitalor në vit është i limituar me një kohëzgjatje maksimale prej 90 ditësh” thuhet në dokumente. Sipas tyre, parashikohet transporti për në spital jashtë Shqipërisë-bileta e avionit, shpenzimet për kirurgët, mjekët, anestezistët, madje edhe transplant i organeve, kujdesi psikiatrik etj. Janë parashikuar edhe trajtime pa shtrim në spital, kontrolle diagnostikuese, ekzaminimet me RXT, CT skaner, MRI skaner PET skaner, ekografitë, shintigrafi. Madje, kujdesi për aksidente dentare (trajtime të kujdesit emergjent për riparimin ose zëvendesimin e dhëmbëve të dëmtuar si rrjedhojë e një lëndimi të shkaktuar në gojë nga aksidenti. Përfitime të tjera janë transporti me ambulancë rrugore dhe helikopter në rast emergjence.
Sipas dokumenteve, punonjësit duhet t’i nënshtrohen kujdesit parandalues, check-up, një herë në vit. Ndërkohë, parashikohet edhe ndërhyrja kirurgjikale e kryer në një spital privat, kirurgji ditore. Në dokumente thuhet se punonjësit gëzojnë të drejtën e analizave diagnostikuese (me tampon) numri maksimal i analizave diagnostikuese për COVID-19 në vit është i limituar në 3. “Analiza serologjike për COVID-19, numri maksimal i analizave në vit është i limituar në 3. Shërbim ditor në rast, shërbim në rast mjekimi në spital publik, medikamente të rekomanduara nga mjeku, madje, edhe shpenzime mjekësore në rast shtrimi në spital privat për trajtimin e COVID.
Pak javë më parë, skandali i pagave nxori zbuluar FSHZH-në. Në listë figuronte se pagat nisnin nga 700 mijë lekë për rangun drejtues dhe deri në 70 mijë lekë për postet e ulëta. Në këtë institucion paga mesatare është 5 herë më e lartë sesa paga mesatare për të punësuarit në gjithë vendin.
Sipas listë pagesave të muajit prill 2021, rezultonte se 5 shoferët e Fondit Shqiptar të Zhvillimit kanë paga bruto nga 1500 dollarë (153120 lekë) deri 1900 dollarë (196 636 lekë) në muaj, afërsisht sa paga e një deputeti (156 770 lekë) dhe në disa raste më shumë se e një ministri (174 760 lekë).
Shoferi më i paguar ai që merr pagën rreth 1900 dollarë (196 636 lekë) konkurron me zëvendës kryeministrin për pagën. Drejtori i Fondit Shqiptar të Zhvillimit, Dritan Agolli përfiton një pagë prej afro 7 mijë dollarësh (701 100 lekë) në muaj. Ose 3 herë më shumë sesa shefi i tij, Edi Rama, që merr rreth 2200 dollarë (228 730 lekë) dhe Presidenti i Republikës, Ilir Meta që përfiton afro 2500 dollarë në muaj (257 000 lekë). Ndërkohë një punëtor pastrimi në Fondin Shqiptar të Zhvillimin përfiton bruto 1200 dollarë muaj.
