Firmat fantazmë duket se janë kthyer në një mundësi e artë përfitimi në tregun e pakontrolluar shqiptar. Kompania e tregtimit të naftës, Gulf, ishte një ndër shembujt ekzemplarë të skemës piramidale të firmave që hyjnë në tregun shqiptar pa u verifikuar më parë se kush qëndron pas tyre. Një nga administratorët e fundit të kompanisë “The Sun Petroleum Albania Trading” që furnizonte me naftë pikat e Gulfit në Shqipëri, gjeorgjiani Irakli Svanidze nuk ka qenë i përqendruar vetëm në fushën e përpunimit dhe nxjerrjes së naftës, por edhe në atë të telekomunikacionit, kryesisht në shërbime call-center. Administratori i “The Sun Petroleum Albania Trading” Irakli Svanidze, i cili dha dorëheqjen tre ditë më parë duke dorëzuar kërkesën e largimit në Qendrën Kombëtare të Biznesit, ka operuar me skemën fantazmë edhe në fushën e telekomunikacionit. Irakli Svanidze ka themeluar një shërbim call-center duke e regjistruar në Qendrën Kombëtare të Regjistrimit më 19 prill të vitit 2016 me emër subjekti “Puntocall”. Forma ligjore e call-center është “Shoqëri me Përgjegjësi të Kufizuar” ndërsa zyrat qendrore i ka të vendosura në “Rrugën Shkëlqim Fusha, Godina Albvizion, Kati i dytë”, të paktën kështu figuron në QKB dhe në të dhënat e pasqyruara nga Open Data. Ashtu si në rastin e kompanisë “The Sun Petroleum Albania Trading”, e cila zotëronte një kapital tejet të vogël për sipërmarrjen e saj, edhe në këtë rast gjeorgjiani e ka nisur punën e kompanisë me 1000 lekë të vjetra, të cilat nuk mjaftojnë as për ujë dhe kafen e mëngjesit. Ndërsa aktivitetin e ka shtrirë në shërbim call-center dhe shërbim klienti. Ajo që konstatohet nga dokumentet e zotëruara nga Tirana Today është fakti se Irakli Svanidze është emëruar administrator që nga dita e themelimit të saj deri në 18 prill të vitit 2021. Kjo shton edhe më shumë dyshimet se pas këtij administori fshihet një pronar që nuk identifikohet në Regjistrin Kombëtar të Biznesit, ndërsa ortak i vetëm rezulton sërish gjeorgjiani, Irakli Svanidze, të paktën deri në 10 prill të vitit 2017, kur ka bërë edhe çregjistrimin e kompanisë. Irakli Svanidze ka autorizuar tre shqiptarë, Aigest Milo, Dhimitër Tashi dhe Eniana Sadikaj për të kryer procedurat e mëtejshme në Qendrën Kombëtare të Regjistrimit të Biznesit. Në këtë periudhë, gjeorgjiani që administronte njëherësh kompaninë “The Sun Petroleum Albania Trading” administronte si ortak i vetëm edhe kompaninë “Punto-call”. Duke ndjekur ekstraktin historik të kësaj kompanie në Regjistrin Kombëtar të Biznesit, gjeorgjiani” Irakli Svanidze hap çështje në QKB duke depozituar kërkesën për likuidimin e “Puntocall” pas vendimit të gjykatës për çregjistrimin e kësaj kompanie. Pavarësisht se gjeorgjiani Irakli Svanidze e kishte afatin e administrimit të kësaj kompanie deri në vitin 2021 ai e ka mbyllur atë në vitin 2017, vetëm një vit pas hapjes së saj. Ai ka ndjekur të njëjtën skemë si në rastin e kompanisë “Sun Petrolium Albania Trading”, nga e cila Irakli Svanidze dha dorëheqjen tre ditë më parë, edhe pse ishte caktuar nga kompania kryesore offshore, “Universal Energy Group”, që të shërbente si administrator deri fundin e këtij viti. Gjeorgjiani Irakli Svanidze ka ndjekur të njëjtën skemë edhe me shërbimin call-center ashtu si në rastin e administrimit të kompanisë “Sun Petrolium Albania Trading”, duke e nisur me një kapital jashtëzakonisht të ulët investimi, ku njëra u mbyll dhe Gulf falimentoi. Kjo ka nxjerrë në pah edhe mënyrën se si operojnë “investitorët” e huaj në tregun informal shqiptar duke ndërtuar kompani fantazmë që falimentojnë “sa hap e mbyll sytë” dhe administratorët e saj zhduken pa lënë gjurmë, duke lënë pas një gropë financiare tek njerëzit thjeshtë. Këta të fundit bëhen viktima të këtyre kompanive që qeveritarët shqiptarë shpesh i prezantojnë me pompozitet si investime që gjallërojnë ekonominë e vendit, por që në të vërtetë po rezultojnë skema të mirëfillta piramidale.
Bardhi Quku/Tirana Today
