Efekti i covid-19 / Farmacitë në Tiranë mungesë të theksuar termometrash. 10 fishohet çmimi

186
Sigal

Sot në farmacitë e Tiranës mund të gjesh disa lloje të tjera termometrash me zhivë ekologjike që kushtojnë mbi 900-1100 lekë, ose dhe ata elektronikë që kushtojnë minimalisht 1,500 lekë. Por edhe pse kjo shifër rëndon në xhepat e qytetarëve, pandemia i ka detyruar ata që t’i blejnë.

Në farmacitë e Tiranës aktualisht ka mungesë termometrash të zakonshëm me zhivë që para pandemisë kushtonin jo më shumë se 100 lekë.

Nga një vëzhgim i bërë në farmacitë e Tiranës për të parë nëse ka ende termometra të thjeshtë me zhivë dhe sa është rritur çmimi i tyre është konstatuar se shumica e farmacistëve të pyetur, u shprehën se termometri i thjeshtë me zhivë ishte mungesë në treg, kjo pasi depot farmaceutike që i furnizojnë nuk u kanë sjell më.

Edhe në ato farmaci që gazetarët mundën të gjejnë termometër të thjeshtë me zhivë çmimi i tyre është 10-fishuar. Kur gazetarët pyesin se pse ky çmim kur më parë nuk i kalonte as vlerën e 100 lekëve, farmacistja shprehet se çmimet ua diktojnë depot farmaceutike madje edhe se sa duhet të fitojnë këto të fundit.

Edhe pse në mungesë tek ndonjë farmaci edhe mund të gjendej ndonjë i tillë , pasi u kishte mbetur stok, por çmimi ishte i kripur aq sa farmacisti shprehej se ” më vjen turp ta shes kaq për Zotin”.

Farmacistët e lidhin mungesën e termometrave me dy arsye.

E para, për shkak të kërkesës së lartë që ka krijuar pandemia Covid-19 për produkte farmaceutike që bëri të mbaronin rezervat dhe së dyti për disa standarde të reja që aplikohen nga BE për importin e termometrave nga Kina.

Termometrat e thjeshtë me zhivë konsiderohen të dëmshëm, toksik dhe u është dhënë përparësi termometrave elektronikë apo me zhivë ekologjike. Këto termometra kanë një çmim të kripur për xhepat e qytetarëve.