Tre të rinj kanë shpëtuar mrekullisht pak pas mesnatës në lagjen “Rus” të Shkodrës, pasi një i moshuar dyshohet se ka qëlluar me armë drejt tyre.
Ata mësohet se ndodheshin në rrugë duke biseduar, kur 83-vjeçari F. H., dyshohet se ka dalë i armatosur në ballkonin e katit të pestë të banesës së tij në orën 00:30 (9 Janar) dhe ka qëlluar në drejtim të tyre.
Fatmirësisht plumbat nuk prekur asnjërin prej tre të rinjve ndërsa u dëmtua një automjet i parkuar.
Menjëherë në vendngjarje kanë shkuar forca të shumta policie duke izoluar zonën për shkak të rrezikshmërisë, ndërsa Forcat e Ndërhyrjes së Shpejtë janë futur nga balkoni i shtëpisë së 83-vjeçarit pasi i hodhën një zhurmuese, duke arritur që ta neutralizojnë dhe arrestojnë.
I moshuari para se të qëllonte mësohet se ka telefonuar policinë duke i kërkuar ndihmë pasi sipas tij jashtë kishte zhurma që po e shqetësonin. Disa minuta më pas mori çiften dhe qëlloi në drejtim të të rinjve.
Efektivët i bënë thirrje disa herë që të dorëzohet, por 83-vjeçari Fasli Hyka nuk ka pranuar duke mbushur çiften në shenjë rezistence.
Edhe pas ardhjes së Forcave të Ndërhyrjes ssë Shpejtë, sërish i moshuari nuk pranoi të dorëzohej. Pas pak minutash mbërriti edhe djali i autorit të dyshuar, F. H., por 83-vjeçari refuzoi edhe të birin me të cilin nuk kishte komunikim të mirë 3-4 vitet e fundit.
Në këto kushte forcat e FNSH hodhën zhurmuesen brenda banesës dhe arritën të futeshin brenda duke arrestuar të moshuarin F. H., pas një operacioni që zgjati për afro 3 orë e gjysëm.
83-vjeçarit pas arrestimit iu gjet çiftja me të cilën qëlloi në drejtim të tre të rinjve, si dhe një armë tjetër automatik kallashnikov që e mbante në shtëpi të cilat u sekuestruan në cilësinë e provës materiale
Çiften deri në vitin 2012 e kishte me leje ndërsa prej asaj kohe e mbante pa leje në banesë. Ndërkohë mësohet se Fasli Hyka vuan nga problemet e shëndetetit mendor ndërsa ka edhe disa sëmundje të tjera, si dhe ka humbur shikimin tek njëri sy.
Komshinjtë dhe tregtarët e lagjes Rus thanë se 83-vjeçari është një person problematik, i cili sipas tyre i ka kërcënuar edhe herë të tjera.
Në momentin kur F. H., qëlloi në banesë gjendej edhe bashkëshortja e tij e moshuar, e cila ndodhej e shtrirë në shtrat pasi edhe ajo është e sëmurë.
Tre të rinjtë u shoqëruan në polici për të dhënë një dëshmi ndërsa 83 vjeçari u arrestua.
Në këtë ngjarje morën pjesë mbi 50 forca policie ndërsa i pranishëm ishte edhe drejtori i policisë vendore të Shkodrës Edmond Sulaj. Policia po heton për ta zbardhur të plotë këtë ngjarje.
