Kryeministri Edi Rama tha se qeveria do të ndjekë qasjen e përshkallëzimit të masave strikte, për të ngadalësuar përhapjen e koronavirusit, ndërsa iu përgjigj pyetjes së qytetarëve se çfarë do të ndodhë pas të dielës.
Në një komunikim Live në rrjetet sociale, Rama tha edhe njëherë se 80% e personave që do të preken nga koronavirusi do ta kalojnë pa simptoma, ndërsa shtoi se nuk është e nevojshëm të bëhen sa më shumë teste.
“Po dëgjoja kryeministrin britanik, i cili sot shpjegoi pse në Britaninë e Madhe nuk do t’i mbyllin shkollat e universitet dhe pse masat do t’i përshkallëzojë më ngadalë, është një qasje. Por ne do të ndjekim qasjen e përshkallëzimit strikt, për të ngadalësuar maksimalisht shpërndarjen e virusit. E përsëris, nuk është ideja të bëjmë sa më shumë teste, të kapim me teste të gjithë ata që kanë korona, koronën do ta marrin masivisht si një virus gripi, por njësoj si me virusin e gripit, siç tregon eksperienca e Kinës, 80% e jona nuk do ta marrin vesh kurën e patën apo nuk e patën. Ju e dëgjuat kancealaren gjermane që tha 70% e gjermanëve do të preken nga koronavirusi. 20% e atyre që do ndjejnë shqetësime dhe do ndjehen jo mirë, është 20% me të cilin duhet të kemi fokusin e vëmendjes. Nga këta, disa e kalojnë me rrufë, pak temperaturë, por nuk shkon në një gradë më të rëndë dhe janë 80% e 20% që e kalojnë në shtëpi. Pjesa tjetër ka nevojë për hospitalizim”, tha Rama.
