Veliaj: “Në Bashkinë e Tiranës ka vetëm një stinë: stina e punës!”
Bashkia e Tiranës mban një tjetër premtim me nisjen e punës për ndërtimin e këndit të 11 të lodrave për fëmijë te “Ali Demi”, duke përmbushur angazhimin për të ndërtuar një kënd lojërash në çdo njësi administrative të qytetit të Tiranës. Kryetari i Bashkisë së Tiranës, Erion Veliaj, theksoi se edhe ky kënd lodrash do të shërbejë në të njëjtën kohë edhe për argëtimin e fëmijëve, por edhe si një hapësirë çlodhese për më të rriturit, e në mënyrë të veçantë për të moshuarit.
“Ky është këndi i lojërave numër 11 dhe besoj që teksa të gjithë janë futur në stinën e dimrit dhe të festave, dua të garantoj qytetarët se në Bashkinë e Tiranës ka vetëm një stinë, që është stina e punës. Pavarësisht nëse ka festa apo është fundi i vitit, për ne është gjithmonë një fillim i ri dhe një mundësi e re për t’i bërë gjërat për së mbari. Në këtë zonë kemi një hapësirë, e cila fatmirësisht është ruajtur dhe shpallur park; është një hapësirë fantastike sidomos për moshat e treta, por ajo që bëjmë sot është se rehabilitojmë dhe e plotësojmë me një hapësirë ekskluzive për fëmijët”, tha Veliaj. Ai theksoi se puna e nisur me këtë kënd është përgjigja më e mirë ndaj të gjitha debateve dhe një ogur i mirë për vitin e ardhshëm.
“Pas këndit të lojërave te liqeni, besoj se mënyra më e mirë për t’iu përgjigjur gjithë histerisë dhe paranojës është vetëm puna; puna ka qenë përgjigja jonë këtë vit dhe me punë duam ta mbyllim. Besoj se hapja e këtij fronti të ri, i cili do të mbarojë për një muaj, do të jetë një nisje e mirë e vitit tjetër për fëmijët”, u shpreh Veliaj. Ai theksoi se ndërtimi i këndeve të lojërave ka për qëllim jo vetëm të krijojë mundësi argëtimi për fëmijët, por edhe për t’i krijuar atyre kushte për t’u marrë me aktivitete fizike.
“Kemi dëshirë që viti tjetër të na gjejë me të rinj e fëmijë të shëndoshë, aktivë, që merren me sport dhe aktivitet fizik, dhe jo që kalojnë shumë kohë nëpër platformat elektronike”, shtoi Veliaj. Ai informoi gjithashtu se Njësia Nr.1 do të jetë përfituese e të tjera investimeve publike që Bashkia e Tiranës ka parashikuar të bëjë edhe për vitin e ardhshëm, siç është edhe ai për ndërtimin e 20 shkollave.
“Më vjen mirë që njësia 1 do të preket nga projekti i 20 shkollave të reja që do të financojmë vitin tjetër. Sigurisht, edhe njësia shpresoj të jetë pararojë në procesin e administratorëve të pallateve. Është një proces kyç, çdo qytetar i njësisë dhe i Tiranës ka marrë një letër personale nga unë, që shpjegon me detaje se si do të funksionojë ky proces. Detyra e administratorëve do të jetë sigurisht që të krijojë një harmoni dhe të ndihmojë me logjistikën në pallat, por sigurisht të mbajë edhe një sy hapur për terrene të tilla, që të sigurohemi që nuk vandalizohen, nuk prishen dhe kanë një jetëgjatësi sa më të madhe”, shtoi Veliaj.
Kryebashkiaku falenderoi për mbështetjen e dhënë në këtë rast nga Raiffaisen Bank, por edhe të gjithë donatorët e tjerë të cilët kanë qenë partner të Bashkisë së Tiranës edhe në një sërë punësh të tjera publike të realizuara gjatë këtij viti. “Dua të falenderoj shumë Raiffesisen dhe të gjithë ata punonjës që janë përfshirë në këtë filantropi dhe në këtë bashkëpunim, tregon që kompanitë shqiptare sot kanë një përgjegjshmëri të korporatës. Unë besoj që mënyra më e mirë se si reklamojmë vlerat tona, është se si i kthejmë ato në komunitet”, përfundoi Veliaj.
