Fitim Farruku dhe Halit Shehu të arrestuar pak ditë më parë pas një operacioni të SPAK në Dibër janë lënë në burg nga gjykata. Togat e zeza kanë caktuar masën e sigurisë “arrest me burg” për dy të arrestuarit.
Nga aksioni i finalizuar nga SPAK në Dibër u ndaluan Fitim Farruku, shef finance në Këshillin e Qarkut, Lulzim Dani polic bashkiak në Bashkinë Dibër, bashkëshorti i Drejtoreshës së Zyrës Vendore të Arsimit si dhe Halit Shehu, specialist pyjesh.
Si nisi hetimi
Prokuroria e Posaçme njoftoi se hetimet nisën pasi Halit Shehu tentoi të fillojë punë si mësues. Për këtë arsye ai ka kontaktuar Fitim Farrukun, të cilit i dha 100 mijë lekë. Ky i fundit i ka premtuar kundrejt shpërblimit që t’i sigurojë ndikim te drejtuesit e Zyrës Arsimore që të punësohet si mësues.
Pas marrjes së zarfit me lekë Fitim Farruku takoi burrin e drejtoreshës së Arsimit, Lulzim Dani. Ndërkohë, burimet thonë për abcneës.al se ka dyshime që operacioni u dekonspirua pasi, Lulzim Dani nuk i mori zarfin me lekë Fitim Farrukut.
Sakaq, Halit Shehu dhe Shefi i Financës së Këshillit të Qarkut, Fitim Farruku u arrestuan 2 ditë më parë. Burri i Brikena Danit, Dr. e Arsimit Dibër, Lulzim Dani u shoqërua dhe u la i lirë. SPAK përgjoi telefonat dhe përgjim ambiental, nuk arriti të provonte korrupsionin nga Lulzim Dani.