Arbitrja e parë në derbi: Nuk e besoja dot

Emanuela Rusta, arbitrja femër që mban stemën e FIFA-s, ishte për herë të parë në një derbi, ku bëri debutimin si gjyqtare linje, pas porte në sfidën Tirana-Partizani.

Tensioni gjatë 90 minutave ka qenë i madh, por ajo ia doli me sukses.

Në një intervistë për “Zona Gol” në “Supersport”, ajo tregon emocionet e këtij debutimi në Superiore duke u shprehur se në fillim nuk e besonte se do ishte pjesë e kësaj sfide me kaq rëndësi.

Më pas tregoi se gjatë ndeshjes ka pasur edhe komunikim në kufje me arbitrin kryesor, Enea Jorgjin, madje ka rrëfyer edhe një episod.

Ajo tregon:

“Kishte momente që duhej të komunikoja me Jorgjin. Në një moment, ekipi i Tiranës po kërkonte faull, dhe unë i thashë: ‘lojë, lojë, lojë.’ Për rastet që i kisha parë, isha e sigurt dhe ia komunikoja.”