VOJSAVA NELO është një poete e vërtetë, origjinale. Poezia e saj është poezi e një femre delikate; e brishtë, e ndjeshme. Një poezi që del nga shpirti. Transparente, e bukur, me nivel të lartë artistik, plot muzikalitet. Ka identitetin dhe figuracionin e saj, metaforat dhe mjete e tjera artistike. Nuk përzihet libri dhe emri i saj si autore me emra të tjerë. Poezia e saj është spontane dhe të kujton atë që thotë Tolstoi, shkrimtari gjenial i shek. XIX, “krijimtaria është si teshtima, që kur të vjen, nuk e mban dot”. Dhe Vojsavës i vjen për të shkruar dhe shkruan poezi siç e ndjen, siç e përjeton nga shpirti.
Dritëro Agolli
Vojsava Nelo
“Dëshiroj që poezia ime të mbërrijë kudo ku ka njerëz,
botë njerëzore, jetë, shpirt;
ajo buron nga shpirti im dhe shpirtrat le të jenë streha e saj”.
Gërsheti i prerë
E preva pa pyetur njeri.
Më kujtohet mirë,
si sot.
Vajza ime qau me furi
sa nuk ua tregoj dot.
Ishte e vogël atëherë
qau me dënesë. Çudi…
… Kërkonte me duart e vogla,
gërshetin mbi supet e mi!
Si sot e mbaj mend, e kujtoj.
Atë lot në syrin e zi.
Qante e vogla ime,
dhe prekte supet e mi!
Mbaj mend dhe vuaj së brendshmi,
gërshetin e prerë fare kot
sytë e përlotur të vajzës
mbushur papritmas me lot!
Si sot e mbaj mend, e kujtoj,
dhe iki, humbas në trishtim…
… Tinguj të largët, të zbehtë,
ndjekin nga pas shpirtin tim…!
Delvinë, 1995
Këtu punojnë magjistarët
Im bir, GENTI
BBN TECHNOLOGIES,
SHBA
“Këtu punojnë magjistarët”.
Shkruhet në hyrje të Institutit tënd.
E lexoj dhe e rilexoj,
dhe çfarë s’më vërtitet nëpër mend!
Sepse unë e di që ti bën shkencë.
Këtu thotë se bëni “magji”?!
Se jini magjistarë të vërtetë,
në këtë vend,
ku lulëzon dije dhe liri.
Unë e di se ti bën shkencë,
i shtrenjti biri im, dhe jo magji?!
Po kjo qënka shumë e vërtetë,
sepse e lexoj me sytë e mi:
– “Where Wizards Work”,
Këtu punon dhe im bir.
Të jetë kjo ëndërra e madhe
që gëloi herët në shpirtin e tij?!
Të jetë ky vegimi i artë,
Itaka zhuritëse, të jetë ?!
Dashuria e madhe,
e zjarrtë,
e birit tim të shtrenjtë?!
Ndoshta…, ndoshta…,
nuk e di…,
Rreth e qark vërtiten “magjistarë”.
Im bir më shpjegon me qetësi,
duke më përkthyer fjalë për fjalë!
Kush thirri poshtë dritares sime?!
Unë s’e kisha parë.
Por dita kishte çelë.
Një ditë e bardhë
E larë me diell.
Mbi trupin sorkadhe të hardhisë,
që nga gazi i kishte shkarë një pikë lot.
Mbi krahët e stërmunduar të zogjve shtegëtarë
që lanë kilometrat e fundit
e hyn në kraharorin tim,
sot.
Dhe unë s’e kisha parë?!
Po ti më thirre vetë.
Zëbukur si një e njohur e vjetër.
Më thirre në emër.
Vrap u çova.
U zgjata në eter:
– Kush thirri poshtë dritares sime?!
Ajo afrohej.
Më kapte duart.
Më lëmonte flokët.
E pashë. Pastaj e ndjeva.
E tëra brenda qenies sime.
Si brenda rrënjëve.
Si brenda sytheve.
Pëllëmbë për pëllëmbë të këtij dheu.
Unë e ndjeva…
Pranvera SHPËRTHEU
Çorovodë, 1988
Cikli ka poezi nga të gjithë librat e botuar ndër vite, duke filluar nga libri i pari, « Kur çelin ëndrrat », 1977, deri tek më i riu, « Muzgjet e Bostonit » 2018
Libri « Mbretëroj » është ribotuar (për shkak të shitjes), prandaj është dhe në dy kopertina, por është i njëjti. Ju mund të zgjidhni një prej dy kopertinave ; kë të mendoni.
Vojsava Nelo ka botuar ndër vite këto libra me poezi :
Kur çelin ëndrrat 1977
E qeshur 1982
Mbretëroj 1995
Mbretëroj 1996 (ribotim)
Idil në dy akte 1997
Benvenuta, Artemida ! 2001
Tretur tek puthja 2016
Gërsheti i prerë 2010
Muzgjet e Bostonit 2018
Me poezinë e Vojsavës është realizuar mbrëmja poetike-teatrore “EJA TË DUHEMI!”, vënë në skenë nga Teatri Metropol, me rastin e 100-Vjetorit të Shpalljes së Pavarësisë, Tiranë, 21 mars, 2012.
Vojsava Nelo ka botuar në prozë këto libra :
Mikesha e yjeve roman, 1998
Vajza e gjysmës së diellit roman, 2002
Të fshehtat e mikeve të mia roman, 2007
Gruaja me të zeza roman 2015
Nëpër vorbullat e mistereve novelë, 2016
