INTERVISTA/ Eltar Deda, deputet i PS-së: “Qarku i Fierit të zgjidhet në frymën e zbatimit të ligjit
Është media ajo që përcjell mesazhet e akuzave të ndërsjella, e Kryeministrit Berisha te Kryetari i opozitës, Edi Rama dhe anasjelltas, për moszgjidhjen e ngërçit politik të integrimit të Shqipërisë. PD-PS, edhe njëherë, sikurse ndodh në 21 vjetët e tranzicionit tonë, nuk munden të kapërcejnë dot politikën partiake dhe të vihen në funksion të aspiratës më të madhe të të gjithë shqiptarëve, që të bëhemi edhe ne pjesë e demokracisë europiane. Deputeti i PS-së, Eltar Deda, në intervistën për “Telegraf”, shpreh bindjen se, zgjidhja e problemit të Qarkut të Fierit duhet bërë në frymën e zbatimit të ligjeve. Ndërsa për ndryshimin e mandateve të deputetëve në disa qarqe, zoti Deda shprehet se kjo mund të deformojë procesin zgjedhor.
– Zoti Deda, përse Edi Rama ndryshoi qëndrim dhe ftoi partitë parlamentare të zgjidhnin nëpërmjet një tryeze tavoline çështjen e Qarkut të Fierit, derisa problemi është moszbatimi i vendimeve të gjykatave?
– Dua të theksoj që në fillim, se Kryetari i PS-së, Edi Rama, asnjëherë nuk e ka ndryshuar qëndrimin përsa i përket çështjes se zgjidhjes së Qarkut të Fierit. Gjithmonë ai dhe çdo përfaqësues i PS-së, kanë qenë, janë dhe do të jenë, për zgjidhje që u përkasin interesave të vendit dhe të elektoratit, i cili e ka shprehur mendimin e tij nëpërmjet votës së 8 Majit 2011. Ashtu si në rastin e Presidentit, po kështu edhe në rastin e Qarkut të Fierit, Kryetari i PS-së, është për një zgjidhje të problemit në tryezat e dialogut, në mënyrë që atë që e ka prodhuar politika, po politika t’i jap zgjidhje, nëpërmjet dialogut të partive parlamentare, në frymën e zbatimit të ligjit dhe të demokracisë.
– Nuk është bërë e qartë një gjë. PS-ja për 3 reformat, për të cilat duhet të japë konsensusin, a ka kundërshti, meqë nuk ka marrë pjesë në diskutimin e tyre, apo është në dakortësi?
– PS-ja nuk ka kundërshti në lidhje me 3 reformat, të cilat duan 3/5 e votave në Parlament. E rëndësishme është zgjidhja e ngërçit të krijuar nga ana e maxhorancës parlamentare, për mos zbatimin në realitet të ligjit. Gjë, e cila është evidente në rastin e Qarkut të Fierit, ku fitorja është e PS-së dhe me votë dhe me proces gjyqësor , por në praktikë mbahet peng nga PD-ja. Pra ky është rasti të tregohet si do të zbatohet ligji në Shqipëri.
– Ditët e fundit kultivohet mendimi që modeli i Fierit, mund të shërbejë nga PD-ja, edhe për të ndërhyrë në rezultatet e zgjedhjeve të 2013-s. Ky është edhe qëndrimi politik i PS-së?
– PS-ja është duke e ndjekur të gjithë situatën parapërgatitore në lidhje me ecurinë e procesit zgjedhor. Lëvizja e numrit të mandateve në Qarkun e Beratit dhe delegimi i tij në atë të Kukësit, me pretendimin e pakësimit të popullsisë në Qarkun e Beratit dhe shtimin e popullsisë në Kukës, përbën një element shumë të rrezikshëm, i cili mund të sjellë deformim e të gjithë procesit zgjedhor. Prandaj, çdo gjë e kryer nga maxhoranca, nëpërmjet institucioneve përgjegjëse shtetërore, do të jetë e monitoruar nga ana jonë si opozitë.
– Në qoftë se Kryeministri Berisha nuk tërhiqet për Qarkun e Fierit dhe i qëndron politikës që mbajti edhe të enjten në Kuvend, por afron mundësi të tjera kompromisi, PS-ja mund të dakortësohet, me çfarëdo tjetër, veç zgjidhjes së çështjes së Qarkut të Fierit?
– Siç e patë, Kryetari i PS-së, zoti Edi Rama, i ftoi përsëri të gjitha partitë parlamentare, të uleshin dhe të diskutojnë zgjidhjen e këtij ngërçi. Në mënyrë të tillë që, vetëm zgjidhjet nëpërmjet dialogut dhe konsensusit, mund të sjellin zhbllokim të situatës aktuale, që kërkesa për çeljen e negociatave për aderimin në BE, të mbështetet në vullnetin e mirë politik të të gjithë spektrit.
– Derisa PS-ja po përballet, jo vetëm me PD-në, por edhe me opinionin vendas dhe ndërkombëtar, për kundërshtinë për të mos dhënë konsensusin e saj për 3 reformat e statusit, a është e vendosur PS-ja, që të përballojë koston politike të një refuzimi për herë të tretë të statusit?
– PS-ja nuk ka qenë ndonjëherë shkaktare për bllokimin e marrjes së statusit për në BE. Përkundrazi, ka qenë dhe do të jetë gjithmonë në krah të çdo iniciative, e cila i shërben integrimit të vendit. Qenia fasade, thjesht për hir të integrimit, asnjëherë nuk ka për të dhënë rezultat. Vendi ynë, nuk po merr statusin, për shkak të kësaj qeverisjeje. Jo më larg, se para dy ditësh, ishte faktori ndërkombëtar, i cili theksoi se jo vetëm tre ligjet që përmbyllin reformën, janë kusht, por u shtuan edhe zgjidhja e çështjes së 21 Janarit, trajtimi i të përndjekurve politikë dhe zgjedhjet e ardhshme parlamentare. Kushte, të cilat trokasin në derën e qeverisë dhe jo të opozitës.
– Faleminderit!