Kryeparlamentari Meta: Kohëzgjatja, një mundësi për të gjithë që të kontribuojnë për një marrëveshje bashkëpunimi”

110
Kreu i LSI tregon arsyet e shtyrjes së regjistrimit të koalicioneve zgjedhore
Kryetari i Kuvendit, Ilir Meta, ka komentuar sot nga Fieri mbi afatin e regjistrimeve për koalicionet zgjedhore dhe kandidaturën për President. Kreu I LSI, e quajti përpjekjen për të vendosur një afat të ri për regjistrimin e partive dhe të koalicioneve, një kontribut për mbarëvajtjen e procesit zgjedhor . Në lidhje me kandidaturën për President, Meta tha se LSI ka shprehur vullnetin për dialog dhe se nuk ekziston asnjë emër I përveçëm. Gjithashtu sipas Metës koalicioni PS-LSI nuk është çështja më e rëndësishme dhe se vendimtare mbeten standardet e zgjedhjeve. 

19 prilli ishte afati i fundit për regjistrimin e koalicioneve zgjedhore, ndërkohë që ende nuk kemi një përgjigje dhe nga PD ka pasur reagime lidhur me këtë? 
Besoj që çdo përpjekje, e cila synon t’i japi mundësi, edhe opozitës në mënyrë të veçantë, që të përfshihet në procesin zgjedhor dhe në zgjedhjet e ardhshme, duhet konsideruar si pozitive dhe si konstruktive. Pasi dihet që Partia Demokratike dhe shumë parti të tjera opozitare, aleatët e saj, nuk janë regjistruar në Komisionin Qendror të Zgjedhjeve, as si subjekte dhe as si koalicion. Ndaj, unë besoj që kjo kohëzgjatje, ose kjo përpjekje për të vendosur një afat të ri për regjistrimin e partive dhe të koalicioneve, është një kontribut që jepet për mbarëvajtjen e procesit zgjedhor dhe njëkohësisht një mundësi për të gjithë që të kontribuojnë për një marrëveshje bashkëpunimi, e cila krijon kushte tërësisht normale dhe konstruktive për zhvillimin e zgjedhjeve të ardhshme.

Kjo është thjeshtë një lëvizje për ti dhënë kohë PD?
Kjo është një përpjekje për t’i dhënë më shumë kohë pa asnjë diskutim jo vetëm Partisë Demokratike, por edhe partive të tjera të opozitës, dhe të gjitha forcave politike për shkak të zhvillimeve të deritanishme për të bërë përfundimisht, jo vetëm regjistrimin në këtë proces zgjedhor, por edhe zgjedhjen e tyre sipas koalicioneve që dëshirojnë pasi në qoftë se do të merrnim në konsideratë këtë kritikë, atëherë do të ishte e pamundur formalisht për opozitën për të marrë pjesë në zgjedhjet e ardhshme.

Z. Meta, disa media kanë lakuar se ju në një bisedë me kreun e Partisë Socialiste, z. Rama, keni nxjerr emrin e Sali Berishës për kandidat për President?
Natyrisht që nuk ekziston asnjë emër i përveçëm pasi edhe për çështjen e Presidentit ne kemi shprehur vullnetin për dialog dhe për zhvilluar një proces bashkëpunues dhe mundësisht konsensual me opozitën. Është një tjetër tregues i përpjekjeve për normalizimin e situatës politike në vend dhe sidomos të procesit zgjedhor.

Do të ketë një koalicion PS-LSI në zgjedhjet e 18 qershorit?
Kjo nuk është çështja më e rëndësishme. Vendimtare mbeten standardet e zgjedhjeve. Procesi gjithëpërfshirës zgjedhor dhe i gjithëpranuar dhe për këtë nuk do të reshtin përpjekjet edhe në ditët e ardhshme në mënyrë që opozita të përfshihet në këtë proces. Kjo ka qenë edhe arsyeja që unë i kam dërguar edhe një letër Kryetarit të Partive Popullore, z. Daul, për të kërkuar ndihmën e Partive Popullore për të rritur mirëbesimin midis palëve në interes të një procesi zgjedhor që meritojnë qytetarët shqiptar si qytetar evropian, por që meriton edhe hapi tjetër që duam të hedhim të gjithë, ai i çeljes së negociatave me BE.

Vazhdoni t’i qëndroni idesë së krijimit të një qeverie “besimi”?
Vazhdoj t’i qëndroj idesë se duhet patjetër t’i japim besim të gjithë qytetarëve shqiptarë për një proces të dejtë, për një vend evropian, për zgjedhjet e ardhshme dhe për këtë duhet bërë çdo përpjekje, si nga qeveria aktuale dhe mazhoranca aktuale, por është e rëndësishme që këto përpjekje të bëhen edhe nga opozita përmes dialogut dhe kuptohet edhe tolerancës reciproke.

Ju do të shkoni në zgjedhje pa opozitën?
Unë këmbëngul që PD duhet të përfshihet në dialog dhe njëkohësisht nënvizoj të rëndësishëm çdo përpjekje për të afruar dialogun dhe për këtë shpresoj që edhe Partia Popullore Evropiane të japi kontributin e saj, pasi Partia Demokratike i takon kësaj familje mjaft të rëndësishme në Evropë, që e ka ndihmuar mjaft Shqipërinë dhe procesin e integrimit evropian të Shqipërisë, dhe natyrisht nuk dua të mendoj dhe të imagjinoj zgjedhje pa opozitën. Por dhe as nuk mund ta pranoj dhe as nuk mund ta mendoj që opozita gjithashtu nuk do të bëj përpjekjet e saj për t’u përfshirë në këtë proces përmes dialogut.

Meqenëse jeni në Fier, a keni një listë paraprake të kandidatëve për deputetë të LSI-së?
Nuk kemi, sepse ende nuk kemi hyrë në këtë proces, por sigurisht që kjo nuk është më e rëndësishmja.
Dejana Kallogjeroviç : Suksesi për ta çuar përpara Shqipërinë qëndron tek arsimi cilësor
Kryetarja e strukturës së studentëve në LRI, Dejana Kallogjeroviç ka zhvilluar një mbledhje me studentët e kryeqytetit. Me anë të një statusi në faqen e saj zyrtare në rrjetin social Facebook ajo theksoi se ata janë profesionistët e rinj që do punojnë për një Shqipëri më të mirë.
“Lëvizja Socialiste për Integrim e ka rininë prioritet të saj sepse besojnë se suksesi për ta çuar përpara Shqipërinë qëndron nëse ne punojmë për një arsim cilësor që nesër të përkthehet në punë cilësore e të mirëpaguara për gjithsecilin prej nesh,për shoqërinë tonë e mbi të gjitha për familjet tona”, u shpreh Kallogjeroviç.
Klevi Pojana:”LSI është e vendosur të dëgjojë çdo banor e shqetësim dhe ta përçojë atë në instancat e duhura lokale dhe qendrore”
Nënkryetari i Lëvizjes Rinore për Integrim, Klevi Pojana ka qenë i pranishëm në një takim me banorët e njësisë 8 në zonën e keqquajtur “informale”.Në fjalën e mbajtur gjatë këtij takimi Pojana theksoi se LSI është e vendosur të dëgjojë çdo banor e shqetësim dhe ta përçojë atë në instancat e duhura lokale dhe qendrore.“Infrastruktura, legalizimet dhe më shumë shërbime ishin shqetësimet kryesore të qytetarëve! LSI është e vendosur të dëgjojë çdo banor e shqetësim dhe ta përçojë atë në instancat e duhura lokale dhe qendrore”, u shpreh Pojana.