Drejtuesi ALUIZNI-t lajmëronte gjithmonë personin anonim, për tërheqjen e lejes së legalizimit, një veprim sa antiligjor aq edhe korruptiv
Një fakt skandaloz është bërë objekt i kallëzimit penal ndaj drejtorit të degës së ALUIZNI-t në Elbasan, Kastriot Gurra. Dy ditë më parë shtetasi Flamur Harri, ka dorëzuar në Prokurorinë e Elbasanit një padi penale ndaj kreut të ALUIZNI-t, Kastriot Gurra 6 zyrtarëve vartës të tij, me pretendimin se, “kanë legalizuar në truallin tim të ligjshëm, duke bërë pronar një person tjetër, që nuk ka lidhje aspak me mua dhe pronat e mia”. Zoti Harri deklaroi për “Telegraf” se, “e kam bërë këtë kallëzim penal në adresë të Drejtorisë ALUIZNI-t të Qarkut Elbasan, i shokuar nga një njoftim në gazetën lokale “Info” për qytetarët që nuk kanë tërhequr lejet për ndërtimet pa leje, ndër të tjera, shikoj se në nr. rendor10 figuronte Fuat Ali Grada, (i ndjeri ka vdekur para pak muajsh), që ka bërë ndërtime pa leje pra të paligjshme në truallin e familjes Harri”. Sipas zotit Harri, “ky person ka bërë pas vitit 1992, shtesa dhe ndërtime pa leje në truallin tonë, për ta finalizuar në muajt mars, prill, maj të vitit 2014, duke bërë dhjetëra metra katrore ndërtime pa leje, në shkelje të ligjit”. Ndër të tjera, në kallëzimin penal ndaj drejtorit të ALUIZNI-t Elbasan thuhet se, “pronat e familjes Harri kanë një status të veçantë, pasi ato janë të konfiskuara për motive politike në vitin 1947 dhe na është kthyer me ligjin e të përndjekurve politikë. Për arsye të veprimeve korruptive të pushtetarëve, prona është në një proces të tejzgjatur gjyqësor dhe aktualisht çështja është në Gjykatën e Lartë. Përveç statusit politik, prona jonë ndodhet në mes të Elbasanit dhe jo në zona informale. Që nga viti 2005, kam vënë në dijeni drejtuesit e ALUIZNI-t që të mos kryhet asnjë veprim zyrtar pa mbaruar procesi gjyqësor. Sa herë janë ndërruar drejtuesit gjithmonë i kam vënë në dijeni me shkresa që të mos bëhen legalizime të paligjshme. Të njëjtën gjë kam bërë dhe me drejtuesin e ri Kastriot Gurra, i ardhur në krye të zyrës në vitin 2013”. Zoti Harri u shpreh se, “ky drejtues për habinë dhe zhgënjimin tim, tim lajmëronte personin anonim, për tërheqjen e lejes së legalizimit, një veprim sa antiligjor aq edhe korruptiv. Nisur nga këto veprime të dyshimta dhe legale, ai i ka kërkuar Prokurorisë Elbasan, nisjen e hetimit për këtë vepër penale të kryer nga drejtuesi ALUIZNI-t Elbasan duke i vënë në dispozicion organit të akuzës dosjen dhe hartat e pronave të tij. Nga ana e saj Prokuroria dje paradite ka nisur fletë-thirrjet ndaj drejtorit ALUIZNI-t Elbasan, Kastriot Gurra, duke caktuar si pikënisje të procesit ballafaqimin me palën paditëse. Dega e ALUIZNI-t në Elbasan, vitet e fundit ka qenë e përfolur dhe e denoncuar nga qytetarë dhe kryesisht ish-pronarët për shkeljet dhe abuzimet e zyrtarëve dhe ish-drejtuesve të saj. Në Prokurorinë e Elbasani ndodhen mbi 200 dosje penale ndaj zyrtarëve të kësaj dege.
Tefik OSMANI
