Berisha u bën thirrje socialistëve: “Rama dështak, s’meriton të ndiqet më”

190

PD-ja ka ndaluar mbrëmjen e sotme në Njësinë nr.7 të kryeqytetit, ku dhe ka prezantuar kandidatët për deputetë. Kreu i demokratëve i bindur në mbështetjen dhe votën e elektoratit besnik të tij, ka preferuar tu kushtojë vëmendje socialistëve të vendit, duke i ftuar ata t’i bashkohen fitores së PD-së në 23 Qershor. Duke i kujtuar rivalit të tij politik “shuplakën” e tiranasve në 2011, Kryeministri Berisha ftoi socialistët të heqin dorë nga ndjekja e udhëheqësit të tyre dështak. “Njeriu që e përcollët nga dera mendon se do futet nga dritarja. Shoku Edi do mbetesh në autobusin tënd mavi për të bërë portretet me të gjitha ngjyrat që do të rilindësve të autobusit mavi. Thirrja ime për çdo socialist të Tiranës dhe mbarë Shqipërisë është, bashkohuni me ne, me idealet dhe aspiratat tona për integrimin në Europë. Është PD-ja që u faktua si lokomotiva kryesore në këto vite në rrugën europiane ndaj bashkohuni me ne për marrjen e statusit kandidat, bashkohuni me ne për punësimin , për të sjellë Tiranën në çdo banesë, çdo lagje, çdo rrugicë, kudo ku ju jetoni pa asnjë dallim. Bashkohuni me ne për ta bërë Shqipërinë vendin më të vizituar në rajon dhe më gjerë, për të garantuar së bashku shërbimet më të mira që meritoni. Le ta lëmë shokun e autobusit në ëndrrat e tij të sëmura, ta lëmë piktorin e dështuar në fatin e tij të dështuar. Njeriu që ju udhëhoqi duke kaluar nga disfata në disfatë nuk meriton të ndiqet më, bashkohuni me ne drejt fitores” deklaroi Berisha.