Mjeshtri Zhani Ciko, dekorohet me “Kryqin Austriak të Nderit” për Shkencën dhe Artin

121

 Njerëz të shquar, në faqet e “Telegraf”

Presidenti Federal i Republikës së Austrisë dekoron me “Kryqin Austriak të Nderit për Shkencën dhe Artin”, Dirigjentin dhe Drejtorin e Teatrit Kombëtar të Operës dhe Baletit në Tiranë, Mjeshtrin Zhani Ciko. Kjo dekoratë e lartë nderimi nga pala austriake, Maestro Zhani Cikos, iu dorëzua me ceremoni më 24 shator 2013 në Tiranë, nga Ambasadori Austriak Florian Raunig. Mjeshtri Zhani Ciko, i cili u lind në vitin 1945 në Tiranë, është që prej dhjetë vitesh Drejtor i Teatrit Kombëtar të Operës dhe Baletit. Ciko është jo vetëm një njohës dhe adhurues i kulturës dhe muzikës austriake, por edhe një drejtues dhe realizues i shumë veprave të kësaj muzike. Veçanërisht, gjatë viteve të fundit pati një bashkëpunim akoma më intensiv me Ambasadën Austriake në Tiranë, ndër të tjera në realizimin e projekteve të përbashkëta si “Vejusha Gazmore” në vitin 2011, “Flauti Magjik” në vitin 2012 dhe “Don Giovanni” në vitin 2013.  Përveç punës drejtuese dhe artistike, Maestro Zhani Ciko komenton rregullisht prej mëse 20 vitesh transmetimin e drejtpërdrejtë të Koncertit të Vjenës, në Radio Televizionin publik shqiptar dhe prej 10 vitesh organizon një event elitar si ballo e fundvitit “From Vienna to Tirana”, ku në fokus janë muzika dhe baleti austriak.  Si përmes punës së tij aktive në promovimin e kulturës dhe muzikës austriake, ashtu edhe në zgjerimin e bashkëpunimit dypalësh përmes projekteve kulturore në Shqipëri me mbështetje nga Austria, Maestro Zhani Ciko ka merita të mëdha, të cilat vlerësohen lartë nga Presidenti Federal i Austrisë, përmes akordimit të “Kryqit Austriak të Nderit për Shkencën dhe Artin”.