Prokuroria për Krime të Rënda ka dhënë sot pretencën për 9 të akuzuarit e çështjes “Xibraka”. Organi i akuzës ka kërkuar 13 vjet burg për Ermal Hoxhën, nipin e dikatorit Enver Hoxha, që është arrestuar në kuadrin e operacionit antidrogë “Xibraka”. Po ashtu, ka kërkuar edhe nga 14 vjet burg për secilin nga dy kolumbianët e arrestuar që ishin pjesë e rrjetit; në total, 126 vjet burg për të akuzuarit.
Konkretisht, prokuroria kërkoi:
1. I pandehuri Ilir Hyseni të dënohet me 14 vjet burgim
2. I pandehuri Genci Xhixa të dënohet me 15 vjet burgim
3. I pandehuri Arjan Dalipi të dënohet me 13 vjet burgim
4. I pandehuri Cesar Avila të dënohet me 14 vjet burgim
5. I pandehuri Valter Moreno të dënohet me 14 vjet burgim
6. I pandehuri Ermal Hoxha të dënohet me 13 vjet burgim
7. I pandehuri Sajmir Batku të dënohet me 15 vjet burgim
8. I pandehuri Gentian Gjonaj të dënohet me 14 vjet burgim
9. I pandehuri Kelmend Dalipi të dënohet me 14 vjet burgim
Në datën 17.12.2014, ka mbërritur në Prokurorinë për Krime të Rënda një informacion nga ana e autoriteteve gjermane mbi organizimin e një aktiviteti të trafikimit të një sasie lënde narkotike të dyshuar si kokainë nga Shqipëria drejt Gjermanisë.
Në datën 18.12.2014, Prokuroria për Krime të Rënda ka regjistruar procedimin penal nr.335 për veprën penale të “trafikimit të narkotikëve” e parashikuar nga neni 283/a i Kodit Penal.
Në bazë të hetimeve të Prokurorisë për Krime të Rënda rezulton e provuar se të pandehurit kanë krijuar një grup të strukturuar kriminal për trafikimin e lëndëve narkotike, në kuadër të të cilit ata kanë importuar në territorin e Republikës së Shqipërisë një sasi lënde në përmbajtje të së cilës ka qenë e fshehur kokainë.
Për ekstraktimin e saj, ata kanë ngritur edhe një laborator ku përpunohej lënda bazë që përmbante kokainën deri sa nxirrej në formën e saj përfundimtare, e gatshme për t’u shitur në treg apo trafikuar.
Prania e kokainës në një sërë lëndësh që ndodheshin të depozituara në enë, shishe qelqi, qese, kontenierë etj, të sekuestruara në magazinë, siç u përshkrua në mënyrë të detajuar më lart, provon plotësisht se në magazinën në Xibrakë ishte ngritur një laborator për ekstraktimin e kokainës nga lënda ku ishte fshehur më parë, me qëllim kalimin me lehtësi të kontrolleve në pikat doganore.
OPERACIONI XIBRAKU: NJOFTIMI I POLICISE SE SHTETIT ME 15 JANAR 2015
Policia e Shtetit në bashkëpunim me Prokurorinë e Krimeve të Rënda Tiranë, D.P.Q Tiranë, D.P.Q Elbasan, dhe DPQ Durrës, si dhe në bashkëpunim me autoritetet policore gjermane, pas një hetimi proaktiv disamujor, ku janë aplikuar të gjitha format dhe metodat bashkëkohore të hetimit, më datë 14.01.2015, finalizuan me sukses operacionin policor “Xibraku”.
Prej disa kohësh, Policia e Shtetit ishte duke hetuar për aktivitetin e këtij grupi të përfshirë në trafikun e lëndëve narkotike. Falë bashkëpunimit me partnerët ndërkombëtar dhe shkëmbimit të informacionit, u bë i mundur identifikimi i pjesëtarëve të këtij grupi, dhe mbajtja e tyre në kontroll si dhe dokumentimi i aktivitetit kriminal.
Nga hetimet paraprake, rezultoi se bëhej fjalë për një grup të strukturuar, me një aktivitet kriminal me shtrirje ndërkombëtare të trafikut të narkotikëve nga Amerika Latine në Ballkan dhe me destinacion Europën Perëndimore.
Grupi kriminal siguronte lëndë me përmbajte të substancave narkotike, të cilat më pas i nënshtroheshin një procesi përpunimi dhe nxjerrjes së substancës së pastër kokainë, me qëllim përdorimin në tregun e brendshëm dhe atë ndërkombëtar.
Me qëllim përpunimin “profesional” të lëndës narkotike dhe përgatitjen përfundimtare të saj për treg, organizata kriminale kishte rekrutuar dhe angazhuar në përbërjen e saj, shtetas kolumbian, të arrestuar në këtë operacion.
Në kuadër të këtij operacioni policor, të shtrirë në tre qarqe, Tiranë, Elbasan dhe Durrës, u arrestuan:
1. Saimir Sadik Batku, vjeç 43, lindur dhe banues në Tiranë.
2. Fatmir Xhemal Hoxha, vjeç 48, lindur dhe banues në Tiranë.
3. Kastriot Haxhi Imeri, vjeç 47, lindur dhe banues në Tiranë.
4. Gentjan Hasan Gjonaj,vjeç 43, banues në Vlorë.
5. Arjan Zeni Dalipi, vjeç 50, banues në Elbasan.
6. Kelment Zeni Dalipi, vjeç 45, banues në Elbasan.
7. Cezar Adolfo Avila, lindur në Tunja Kolumbi, vjeç 67.
8. Walther Moren Juan Moreno, vjeç 42, banues në Bucaramanga, Kolumbi.
9. Ilir Skender Hyseni, vjeç 47, banues në Tiranë.
10. Ermal Ilir Hoxha, vjeç 40, banues në Tiranë.
11. Egest Dankësi, vjeç 27, lindur dhe banues në Elbasan.
U sekuestruan si prova materiale të lidhura me aktivitetin kriminal:
• Sasia prej 19 kilogramë e 416.2 gram lëndë narkotike e dyshuar kokainë.
• 77.727 kg e dyshuar si lëndë narkotike e llojit kokainë.
• 19.8 kg e dyshuar si përzierës i lëndës narkotike kokainë.
• 359.400 Euro.
• 2.769.000 lek të reja.
• 4150 Dollarë Amerikan.
• Janë sekuestruar pesë copë karta krediti dhe një cek me vlerë 4.500 dollarë
• Një armë zjarri automatik model 56.
• Një armë zjarri Revolver me mulli.
• Një armë zjarri e tipit pistoletë me kalibër 9 mm.
• Tre armë gjahu, shotgan, çifte dhe një teke.
• 174 fishekë të modeleve dhe kalibrave të ndryshme.
• 50 fishekë luftarake me calibër 9 mm.
• Katër automjete të tipeve të ndryshme.
• Një makineri vakumi e cilësisë së lartë.
• Një peshore elektronike.
• 25 aparate telefoni celulare.
• Janë sekuestruar pesë ora të markave të ndryshme.
• Janë sekuestruar edhe dy automjete.
• Janë sekuestruar aksesorë për prodhimin dhe paketimin e lëndës narkotike të llojit kokainë, si presa, peshore të llojeve të ndryshme, mikrovala etj.
• Janë sekuestruar sasi të konsiderueshme të substancave dhe perkursoreve, dhe përzierës që shërbejnë për prodhimin e substancave narkotike.
• Si dhe një sasi e konsiderueshme dokumentesh të ndryshme si mandate arkëtimi, kuponë tatimore etj, të cilat hedhin dritë mbi aktivitetin kriminal të shtetasve të lartpërmendur.
Hetimi i kësaj Organizate Kriminale u bë për veprën penale të “Trafikimit të Lëndëve Narkotike”, 283/a/2 “Organizimi dhe drejtimi i organizatave kriminale lidhur me prodhimin, fabrikimin ose trafikun e paligjshëm të narkotikëve“ 284/a, dhe “Armëmbajtje pa leje e Armëve dhe Municioneve Luftarake“ 278/2 dhe 278/5 të Kodit Penal.
